Breaking News: KNU Ralkap Doh Dingin An Kuat Mi Hna Ralkap 11 An Thi

KNU Tatmaha 7 hmun ram chungah Ralkap phu an kuat chap hna i, Minmei A Muai tuk Caah A tlawm Bik Ralkap 11 An Thi
====================
Karen National Union, atang um Karen National Liberation Army nih an uknak hmun ram chungah ralkap ralhrang phu thazang an chap hna i, ralkap motor pakhat cu minmei a muai tuk ruangah a let i, a tlawm bik ralkap 11 leng an thi lai, tiah khuami hna nih an chim. KNU/KNLA tatmaha 7 hmun ram chungah ralkap thazang chap dingin an kuatmi hna cu nihin March 29, 2021 ni ah minmei a muai tuk ruangah a hmun ah ralkap 11 an thi i, ralkap 15 hi fakpi in an i khawn tiah theih a si.

KNU nih an uknak hmun ram chungah ralkap thazang an chap chin lengmang hlei ah, ralkap ralhrang phu nih vanlawng in a kah hna caah khuami Karen miphun pawl cu minung thong leng nih khua an zamh tak cang i, dornak an kawl cang, tiah thawng theih a si. A liam cia March 27, 2021 ni ah KNU tatmaha 5 hmun ram chungah ralhrang phu pawl sakhaan pakhat cu Karen National Liberation Army nih an luhhnawh hna i, suumilam 1 hrawngah an chuh hna. Kawl ralkap le KNU karlak ah ral thazang lei an chap chin lengmang caah thinphang in an um cio hna. Tatmaha 5 hmun ram chung um khuami Karen miphun nih an chimhning ahcun Kawl ralkap lei nih vanlawng in an kah hna hi ni thum chung a si cang tiah theih an chim.

Tlangcung miphun pakhat a simi atu lio ah Ralhrang phu he a kah doh cuahmah mi KNU le KIA hi thlacam nak in bawmh cio hna usih. KIA le KNU hmun ram chungah ralkap thazang an chap chin hlei ah, vanlawng in an kah cang hna tikah khuami caah thinphang ngaingai a si cang. Thlacam tu in bawmh peng ko hna usih.