Chin Ramkulh Peng 7 Ah Cyclon Thlichia A Fak Kho Tiah NUG Cozah Nih Ralrinnak Pek
=========
Mocha Cyclon thlichia cu dingteo in Chin ramkulh Paletwa, Mindat, Matupi, Hakha, Falam, Tedim le Tonzang peng hna ah fakngai in thlichia nih a den khawh mi ah aa tel tiah NUG cozah nih May 13 ah an langh ter. May 13 zinglei suimilam 8:30 NUG cozah tuanvo ngeitu zung hna cu i ton in Cyclon thlichia kongah a hlankan runven nak le a herh mi kong ceihkhan nak an neih hi a si.
Hi thlichia cu dingteo in Chin ramkulh telh in Rakhine, Magway le Sagaing ramthen hna ah thlichia a fak kho i Pago, Yangon, Mandalay, Ayerawaddy, Tanintharyi ramthen le Shan ramkulh ah cun a par lawng nih a phak khawh hna tiah a langhter chih.
Cyclon thlichia ruangah a hlankan i runvennak caah US dollar 1 million hman ding kong, Sagaing le Magway ramthen chungah ngunkhuai lak mi chung in zatuak (10%) hman a si lai nak kong, thlichia hrannak thawngpang cu mipi sin ah a caan hman tein thawngthanh ding le thlichia nih a phak khawhnak hmun um mi PDF le Pah-kah-phah hna he pehtlaihnak a rawk lo nak dingah tawlrel ding kong, ramleng lei bawmhnak a lut mi zong tha tein tawlrel ding kong le a dangdang kong zong biachah nak an tuah.
Khuati vanlei fimthiam hna nih Kawlram – Chin Ram zong ah Mocha Cyclone – Kokek thlichia le ruahfak May 10-15, 2023 kan tong kho tiah thawngthanhnak an rak tuah in May 9, 2023 ah Main Committee Meeting kan tuah i a tanglei bantuk in biachahnak kan ngei.
Mocha Thlichia le Ruahfak kan ton sual a si ahcun Khrihfabukip nih mahle si khawhnak lam in thazaang chuah cio ding
Kan umnak a him lo ahcun a tanglei langhter mi hmunhma hna ah dornak ngeih ding – Lau lo ding, Mocha Thlichia le Ruahfak kong ah thinphan tuk ding asi lai lo, thawngpang kan theihmi nih kan lau ter sawh hlah seh
Dornak Hmun-A tanglei langhtermi hmun hna ah fuhpanh cio ding in kan in sawm hna; a. Khuahlun, Innral-Farhual Dawrhlun Carson Hall & HBC, b. Keitheibo, Khuahel lam, Tlanghrawn – Olive UPC, Bethel le Cimmuai Chrsitian Fellowhsip, c. Dillo, Nawilei – MEC, Falam Christian Fellowhip, d. Khuathar – Carson Baptist Church, e. Lungphun Tlang – HTBC & Nazareth.
f. Nahau Tlang – Peter UPC, g. Pyidawtha – Peniel & Grace, h. Dawrthar (cunglei) – Agape, i. Dawrthar (alai) – Methodist & Zion, j. Dawrthar (tanglei) – UPC & IBC, k. Cawbuk – Galilee & Bethlehem, Phurh tlunhnak-a. IDPs Zung Motor 3 le Khrihfabu kip motor timhcia tein kan chiah, b. Khrihfabu motor vialte le sang chung ummi motor vialte cu bawmhherhmi caah timh cia tein chiah kan i zuam cio hna lai.
c. Pumpek riantuantu (Volunteer) tu Khrihfabu mino hna nih thilri lak bawmh a si lai. Eidin kong, a. Dornak hmun ah aa dormi hna caah Khrihfabu kip nih tirawl timhtuah asi, b. Dinti zong a herhning in tawlrel piak ding in timhtuah asi. Zohkhenhnak-a. Khrihfabu le sang le veng hrambunh in kan i zuanhnawh hna lai, b. Khrihfabu kip mino hna nih naihniam tein tlangtlaknak ngeih a si lai.
c. A herhning in HCMF in tuanvo ngeitu hna nih tlangtlaknak a ngeih lai, d. Ngandamnak lei zong a si khawh chung in tuanvo lak piak a si lai. Pehtlaihnak-Khrihfabu le sang le veng nih harnak ton ruangah bawmtu mino thazaang nan herh ahcun a tanglei Volunteer hruaitu hna sinah pehtlaihnak nan tuah khawh., 1) Pastor Peter Cung Bik – Phone no. 09- 881447895.
2) Pastor Bawi Zung Sang – Phone no. 09-256512830, Damlo, khawnden ton sual ahcun zeitik caan paoh ah a tanglei phone no ah pehtlaih khawh kan si. 1) Pu Sem Lian – 09-444772300. 2) Pastor Za Hnin Thang – 09-442001362. 3) Rev Ni Cung Thang – 09-421158480. 4) Pastor Sui Mang – 09-423661278
Mocha Cyclon thlichia nih fakngai in a hnursuan khawh mi Rakhine ramkulh le a pawngkam khua hna caah WFP- World Food Programme nih minung sing 4 thlakhat ca eidin tirawl bawmh ding in kan tawlrel tiah WFP nih May 13 ah thanh ca an chuah.
“Thlichia hran ding kong he pehtlai in WFP nih a chiabik in timhtuahnak kan ngeih bantuk in a tha bik zongin timhtuahnak kan nei.” tiah WFP palai Ms. Sheela Matthew nih a chim. Cyclon thlichia nih a phak khawhnak hmun hma hna ah a hlankan in tumhtuahnak ngeih a si bantuk in phurhtlunhnak, riantuan tu pakhat le pakhat i pehtlaihnak a rawk lo nak ding kongzong WFP nih fakpiin an i zuam tiah kan theih.