Thawngpang Chia Fonh!
========
Sagaing ramṭhen, Kawlin peng, Khantha hmunhma ah SAC ralkap pawl an lut i khuami 16 an tlaih hna i cu chung ah 8 an thah hna tiah Kawlin Revolution – KR nih a thanh. SAC ralkap pawl cu May 28 ah Kyauktan khua Thitphu tlang ah an lut i ni 5 chung Kawlin pengkomh B01 he kahdohnak a chuak. Cu ni 5 chung kahdohnak ah mipi 16 an tlaih hna i cu chung ah 5 an luat ṭhan nain 8 cu SAC ralkap nih an thah hna tiah an thanh.
Kawlin Revolution – KR biachimnak nawl a ngeitu nih “An thah mi hna i June 5 ah kan hmuh hna”. An chungkhar zong nih thawng an theih cang. Mipi hna nih SAC ralkap he a hlatnak ah nan um a herh” tiah DVB ah a chim. Tlaih a tong mi hna hi Ko San Oo, Maung Win (a thih le thih lo theih rih lo) Inyar khua in Ko Tin Lwin Aung (a thih le thih lo theih rih lo), Banbwe khua in Ko Phoe Soe (a thih le thih lo theih rih lo), Mohwa khua in Ko Win Bo, Ko San Oo, Ko Win Naing, Ko Zaw Min, Ko Zaw Oo, Ko Moe Moe le Phatkhakone khua in Ko San Lin hna an si.
Thah a tong mi hna chung ah Phatkhakone khuami Ko San Lin, hi mipi uknak phu chungtel pakhat a si i Mohwa khua mi 6 hna hi cu hmunkhat te ah an tlaih hna i hmunkhat te ah an thah hna i an ruak kha Tasu tlang pawng ramlak ah an hmuh hna. Thah a tong mi hna sin ah sui le tangka tampi a um i zeihmanh a ngei lo mi cheukhat cu an thlah ṭhan hna tiah Kawlin Revolution – KR nih a thanh.
Sagaing ramṭhen, Monywa peng ah a um mi PDF sakhaan pakhat cu June 7 zinglei sml 5:00am hrawng ah luh hnawh an tong i PDF 4 an thah hna tiah theih a si.
Thazang 80 hrawng SAC ralkap phu 2 nih Yekansu khua pawng ah a um mi Monywa pengkomh B28, Company 2 sakhaan an luh hnawh hna hi a si tiah Black Dragon Battalion Commander K.M.S.G nih The 74 Media ah a chim. “Nu 2 hi cu tlik lo in an i thup. Pa 2 cu kuan nih a khen hna caah an tlik khawh ti lo hnu in an khangh hna. Zinglei te tlik peng a si caah tlik ding in timhtuahnak kan ngeih lio, kedan hna kan i danh lio ah an kan luh hnawh hi a si” tiah a chim.
Sakhaan luh hnawh an ton lio ah hriamngan le meithal leng ah cycle le phone telh in tangka sing 300 man hrawng an sung tiah theih a si. A nunnak a liam mi PDF chungtel hna cu Pa Kyaw Te (kum 16), Pa BE (kum 25), Nu Zin Zin Soe (kum 18) le Nu Khin Yadanar Moe (kum 20) hna an si tiah theih a si. Sagaing ramṭhen, Monywa peng, Yekansu khuate ah SAC ralkap pawl June 7 zinglei sml 4:00am hrawng ah an lut i hngakchia telh in khuami 5 an thah hna tiah theih a si.
Thazang 100 hrawng SAC ralkap pawl Yeksnsu khua an luh lio ah a zaam mi mipi cheukhat an tlaih/velh hna i khuami 6 cu an thah hna tiah khuami pakhat nih Khit Thit ah a chim.
“Pa 3, nu 2 le hngakchia 1 thah an tong. Nau a ngeihnak ni 5 lawng a si rih mi nu zong an velh. A fa te a nunnak a liam” tiah a chim. SAC ralkap pawl nih Yekansu khuate an thlok dih leng ah khua zong an khangh tiah theih a si.
Myanmar ram chung raldohnak ruangah SAC ralhrang nih meikhangh ruangah Khrihfa biakinn 70 leng a rawk cang tiah OCHA le Asia Roman Catholic Khrihfabu hna nih thawngzamhnak an tuah. February 1, 2021 kum in SAC. ralhrang nih hramhram in uknak a lak nu ah Khrihfa Biakinn 70 leng mei a khangh. Myanmar ram nitlak lei Chinram chungah Biakinn 62 leng meikhangh a si cang tiah Khrifa biaknak hrambunh thawngzanhnak (UCA) nih a chim.
Sagaing ramthen le Magwe ramthen chung ah Buddhist biakinn mei khanghmi he fonh ah biaknak inn 100 leng a si lai. SAC ralhrang nih Mipi ralkap an um lai tiah lunghrimh mi biaknak paoh cu meikhangh in an hrawh. Meikhangh mi biakinn vialte an dihlak in theihthlu a har ko tiah Karenni Nuhrin covo lei riantuanbu Saw Nanda nih VOA ah a chim. “SAC ralhrang nih biakinn cu ralkhamnak ah an hmang/um theo ton. Mipi ralkap nih biaknak hmun ah um hmun an la bal lo. A bik in Vawlawng nih biaknak inn, Mipi inn le lo, Sii inn, Sianginn ah bomb le meithal in a kah.
Mi zeipaoh zalong tein biaknak nawl a ngei ding a si. Cun, Ngandamnak le cacawnnak zong a ngei hau. SAC ralkap cozah a kai hlan zohtik ah Myanmar ram ah miphun a tambik cu Kawl (Bamar) an si, biaknak lei ah Buddhist biaknak an tam bik. Tlangcung mi le Buddhist biaknak a si lo mi paoh ah thleidannak a um peng. Nihin SAC ralkap a kai hnu ah Khrihfa biaknak inn le lo tampi a hrawk mi zoh tik ah lung a fak ko” tiah Saw Nanda chim chap.
Karenni (Kayah State) ah milu 350,000 an um. Roman Catholic biaknak ah milu 90,000 leng an si. Chinram ah milu 4780,000 leng an um. Khirhfa zatuak 87% an si. Myanmar ram ah Buddhist le Rohingya buaitan ah khan Kawlram minung a si mi poah nih Kawl biaknak (Buddhism) a pom a hau, timi thawngpang a leng ngai. Kawl biaknak dohdaal in bia chim lo ding, timi zong aa tel ve. Cun, kan hnulei deuh ah CHRO nih report ah USDP chan U Thein Sein cozah kai hlanah rak thokmi program pawl kha cozah thar kuttang ah a thli tein a kal peng rihnak kong te hna.
Cun, Chin miphun nih kan miphun le biaknak hmelchunhnak ah kan hmanmi vailam tung 13 an hrawhnak kong; biakinn saknak le remhnak kongah permit kan hal i a ngah lo lio ah Buddhist biaknak zalong ngai in a karhnak kong; tlangcungmi hna caah thanchonak, ti min put in Chin hngakchia thluak an tawlnak hna kong tehna, CHRO nih a von phozaar. Thein Sein cozah a kai hnu in vailam tung 4 an hrawh chap. Nihin SAC ralhrang a kai hnu ah Khrihfa biakinn meikhanghnak a tam tiah theih a si. crd-The Chinland Post