Thanwgpang Chia Fonh!
==================
Bago ramṭhen, Htantabin peng, Nyaungpinthar khuami ngakchia 7 telh in mipi 18 hna cu SAC ralhrang nih mein in an khangh thah hna, tiah tualchung PDF ralkap pakhat nih a chim. May 10, zinglei 10:00 hrawng in zanlei suimilam 5:00 tiang Kyauk-kyi peng le Htantabin peng ramri um Nyaungpinthar khua pawng ah SAC ralhrang le KNU,
PDF ṭangṭi phufonh hna karlak ah kahdohnak a chuak i SAC ralhrang lei 20 naak tlawmlo an thi, ralhrang bawi telh in 3 tlaihkhih an si pin ah hliamhma tuarmi zong an tam. SAC ralhrang thimi le hliam a pumi an tam caah ngakchia 7 telh in tualchungmi 18 mei in an khangh thah hna, tiah theih a si.
“SAC ralhrang thimi le hliam pumi an tam caah sualnak ngeilo mipi 18 mei in an khangh thah hna, atu tiang pehtlaiin kahdohnak a chuak rih, nunnak a liammi mipi hna cung ah kan ngaih a chiatuk hrianghran. Cu caah PDF ṭangṭi phufonh nih a dihdongh tiang kan doh lai” tiah tualchung PDF ralkap pakhat nih nunnak a liammi mipi 18 hna i an min cazin he Khit Thit ah a chim.
Sagaing ramṭhen, Chaung U peng, Ngayin khua cu SAC ralkap nih an khangh ruangah inn 200 hrawng an ciam i hriamngan kuan nih khuami pakhat zong a khen ruangah a nunnak a liam, tiah theih a si. May 11 zanlei ah SAC ralkap nih Ngayin khua cu an khangh i, khuami pakhat San Lin cu SAC ralkap hriamngan kuan hma in a nunnak a liam. A nupi zong hliamhma faak ngai a pu, tiah tualchung mi hna nih an chim.
May 11 zan ṭhiam ah SAC ralkap nih Chaung U khua sang pa thum cu an khangh ṭhan i inn 5 nak tlawm lo a ciam, tiah theih a si. Chaung U peng ah May 9 lio ah khan bazar i a kalmi SAC ralkap 2 cu PDF nih an rak thah hna pinah May 10 ah an motor zong bomb in an rak puahhnawh hna, tiah theih a si.
Sagaing ramṭhen, Yinmarbin peng Nabutaw khuami hna cu SAC ralkap nih an kah hna i tualchungmi 10 hliamhma an pu. Tualchung mi 1 cu SAC ralkap nih an thah, tiah tualchung mi hna nih an chim. May 11 zinglei suimilam 7:00 hrawng ah SAC ralkap cu Nabutaw khua ah an lut i a ruang um loin khuami cu an kah hna, tiah theih a si.
“SAC ralkap nih Nabutaw khua cu hriamngan voi tam ngai an kah. Khuami kan zam lio ah an kah kah i minung 10 nak tlawm lo meithal kuan nih a khen hna. Khuami pakhat Htey Naing cu an tlaih i an hrem hnu ah an thah. A ruak cu May 12 zinglei ah kan laak,” tiah khuami pakhat nih a chim.
Hriamngan kahnak in caw pathum an thi i, PDF he zong an i kah caah PDF lei in ralkap 2 an nunnak a liam pinah 1 hliamhma a pu, tiah an chim. SAC ralkap hna cu Nabutaw khua in May 11 zanlei suimilam 6:00 ah Banbuai khua lei an panh i cuka hmun ah cun an riak. May 12 ah Banbuai pengkomh khuate ah rallam an sial ṭhan i, tualchung mi hna zong ralphaw hman ding ah an tlaih hna, tiah theih a si.
SAC ralkap pawl cu Kani peng Layshi khua lei i rallam an sial ṭhan caah tualchung mi a thong leng cu ralhrial in an zam, tiah theih a si. Chin ramkulh, Tedim khua, Luaibual sang um Obed House sianginn ah rian a ṭuanmi Nu Cin Hau Vung(kum37) le Hakha si–inn ah rian a tuanmi Pu Lian Za Thawn(kum 32) hna cu a luancia May 2 khan Cycle pakhat cit ṭi in Falam khuapi in Hakha khuapi ah an kal i, zanlei suimilam 6:00 hnu in nihin tiang pehtlaih khawh an si ti lo, tiah Zalen nih a langhter.
Pu Lian Za Thawn cu Hakha um a chungkhar hna he a donghnak phone an i cawnh lio ah Chuncung an phan deng, tiah theih a si. An chungkhar le hawikom, chungkhat sahlawh hna nih an kawl len ko hna nain an konglam zeihmnah theih a si lo. An catlap le an thil hruk-aih pawl tu cu i ṭhenṭhek dih in Thlanrawn khuathar lam pawng ah khualtlawng hna nih an char.
Cu caah Pu Jerome Lian Za Thawn le Nu Cin Hau Vung @Sayamah LinLin hna cu an chungkhar hna nih chunzan rawl-ei chungpil lo le it kho lo in kan um hna caah an thawngpang theimi le a hmumi nan umsual ah cun (Viber, Whats app- 09767133283) ah pehtlaihnak nan kan tuahnak lai, tiah nawlnak zong an tuah chih.