Mindat Peng Kahdohnak Ah SAC Ralkap 10 An Thi, SAC Nih Jet Fighter Pahnih In Voi 7 Bomb An Thlak
=================
Chin ramkulh, Mindat peng, Shweaungthar khua Naw phura pawng ah kahdohnak a chuak i SAC ralkap 10 nak tlawm lo an thi, tiah CDF Mindat sinin theih a si. June 26 zing suimilam 7:20 hrawng in 8:30 tiang hrawng Shweaungthar khua, Naw phura pawng ah SAC ralkap le CDF Mindat hna cu an i kap i SAC leo 10 nak tlawm lo an thih pinah hliamhma pumi zong an tam. CDF Mindat in ralkap pakhat hliamhma hme a pu ve, tiah theih a si.
Kahdohnak a daih in SAC Jet Fighter pahnih nih zing suimilam 9:40 in 10:01 tiang voi 7 bomb an thlak nain CDF Mindat lei a thimi le hliamhma pumi an um lo, tiah theih a si. Cu bantuk ṭhiam in Mindat khuachung zong ah SAC ralkap le CDF Mindat kar kahdohnak a chuak i SAC ralkap lei a thimi le aa hliammi kan fehter kho rih lo, tiah CDF Mindat nih cun an langhter.
Mon ram, Ye peng, Hnitkayin khuate ah a um mi palek sakhaan cu KNLA le PDF phufonh nih an kah hna i SAC chungtel 9 an thi tiah Kyapyo phu nih an thanh. A luancia June 25 chun ah Hnitkayin khua palek sakhaan cu KNLA Brigade 6, B27 le PDF phufonh nih an kah hna hi a si i kahdohnak sml 2 leng a rauh hnu ah SAC ralkap 9 an thi i 1 aa hliam tiah theih a si.
Cu palek sakhaan ah palek an um lo ti nain SAC ralkap 30 hrawng nih hmunhma an khuar caah an kah hna hi a si tiah theih a si. Palek sakhaan ah kahdohnak a chuah dih hnu in SAC Helicopter Mi 35 pahnih nih Hnitkayin khua lei ah bom an thlak tiah theih a si.
Cubantuk vanlei bomthlak ruang le hriamngan ralkap (317) nih hriamngan an thlah ruang ah Hnitkayin khua minung 3 an thi tiah theih a si. Hliam a tuar mi 6 hrawng an um i Lamine sizung ah an thlop hna tiah theih a si. Palaw peng, Thayettapin khuate le Nyaungshinkone khuate in SAC kuttang pyusawhtee 2 an thah hna tiah Palaw PDF nih an thanh.
Palauk peng, Thayettapin khuate in pyusawhtee hruaitu chang U Myo Tin le Nyaungshinkone khua in U Sein Than hna cu June 24 zaanlei sml 4:30pm hrawng ah Palaw PDF nih an va thah hna hi a si. An thah mi hna pyusawhtee 2 sin in AK zuun 2, Kuanbawm 4, kuan 133, Grenade leng ah kahdohnak thilri pawl zong an lak khawh tiah theih a si.
Sagaing ramṭhen, Monywa khua ah a um mi Kah-Ngyah-Nah zung ah hmunhma a khuar mi SAC ralkap pawl cu PDF phu 9 fonh nih an kah hna i a thi mi zong an tam tiah Chindwin Attack Force nih an thanh. June 24 zaanlei sml 6:00pm hrawng ah SAC ralkap pawl cu PDF phu 9 fonh nih an va kah hna hi a si.
Kahdohnak chung ah SAC lei 15 an thi i hmundang in SAC ralkap tampi bawmh ding in an rat caah sakhaan la kho lo in an kir ṭhan tiah theih a si. Monywa The Boys, Monywa pengkomh B05, B07, B12, B22, B25, B28, Yinmarbin pengkomh B28 le MRDA hna bawm in kahdohnak an tuah theih an langhter. Kahdohnak chung ah a sung tuk mi SAC ralkap pawl nih mawṭaw dinhnak tual hnulei ah a um mi inn 2 le Kun (ကွမ်း) dum an khangh tiah theihternak an tuah.