Breaking News; Kan pasaltha hna Camp in thawngpang chia kho taktak an vun kan thanh e!!

Hniang 13 Kahdohnak Ah A Nunnak A Liam Mi Kan Pasaltha Salai Thang Hlei Tial Ruak An Hmuh!!
===============
A luancia mi Hniang thla ni 13 kahdohnak ah kan Chin ralkap pasaltha CNA minung pa 3 nih ram le miphun caah an nunnak an rak peek ii, Cu hna pa 3 chungah Salai Bawi Cung Nung le Thang Do Kap ruak cu an hmuh khawh hna ii, CNA camp ah Khrihfa kan phung ning tein ruak thlahnak le vuinak cu tlamtling tein an rak tuah cang hna, tiah theih a si.

Cun ni caan sau nawn a ruah hnu Sikpar ni 24 ah kan pasaltha Salai Thang Hlei Tial ruak cu an hmuh than ii, Cu ni Sikpar ni 24 ah a chuahsennak khua lei ah an tlun pi tiah, theih a si. Ram le miphun caah a nunnak a pee mi taktak mi chungkhar dihlak Bawipa nih tuar in khawh nak pee ko hna sehlaw, Hnem ko hna seh.

Sikpar 22, Magway ramṭhen, Gangaw peng, Zahaw-Ohhlah lam cung ah ralhrang ခလရ ၅၀ cu ral lam sial in an phanh caah mipi pawl a himnak hmun zaamding an bawmh hna lio ah YDF mipi ralkap kah an tong. Cu ti kah an ton ruang ah mipi ralkap Aung Naing (Kum 33) a nunnak a liam i ralkap Aung Kyaw Moe a kehlei baan ah an kah i hliamhma faak a tuar.

YDF ralkap pakhat zong a umnak theih a si rih lo tiah theih a si. Ralhrang hna nih Zahaw mi pakhat zong a lu ah an kah i a thi. Cun facang a hlep liomi sualnak ngei lo mipi minung pahnih zong an kah thah hna tiah theih a si. Crd-CNN

SAC Ralkap Nih Uknak A Lak Thla 21 Chungah Ram Pumpi Huap In Kahdohnak Voi 7800 Leng A Cang, Myanmar ram ah a luancia 2021, February 1 in 2022, November 15 tiang SAC ralkap nih hramhram uknak a lak thla 21 chung ah kahdohnak voi 7855 nak tlawmlo a cang tiah ISP Myanmar nih November 23 ah cathanh an chuah tiah theih a si.

Kayin ramkulh ah kahdohnak voi 4394, Sagaing ramṭhen ah voi 919, Kaya ramkulh ah voi 339, Shan ramkulh ah voi 291, Magway ramṭhen ah voi 341, Kachin ramkulh ah 213, Mon ramkulh ah 244, Pago ramṭhen ah voi 259, Chin ramkulh ah voi 588, Taninhtharyi ramṭhen ah voi 107, Mandalay ramṭhen ah voi 73, Rakhine ramkulh ah voi 48, Yangon ramṭhen ah voi 30, Ayeyarwaddy ramṭhen ah voi 8, Naypyidaw ah voi 1 a cang tiah an langhter.

Kahdohnak voi tambik a cannak Kayin ramkulh ah SAC ralkap nih tanglei lei lawng si lo in van lei kahdohnak zong voi tamngai an tuah tiah KNU in chim phuannak nawl ngeitu Pado Saw Tawni nih a chim. “ Atu hnu ah cun SAC ralkap nih tanglei leiin kahdohnak an tei ti lo tik ah, van lei kahdohnak in bawmhnak an tuah colh,

KNU brigade 8 hmunhma ah ni fatin in kahdohnak a phunphun an tuah” tiah a chim. SAC ralkap nih uknak an lak thla 21 leng chung ram pumpi huap pengkulh 191 ah kahdohnak a cang i, cu chung ah voi 3997 cu KNU brigade 5 Hpapun pengkomh chung ah a cang tiah ISP Myanmar nih an thanhmi cathanh chung ah cun langhter.

American Ram Supermarket Pakhat Chungah Meithal Kahnak A Chuak I, Minung 10 Hrawng An Nunnak A Liam, American ram Supermarket pakhat ah meithal tlaitu pakhat nih minung 10 hrawng a kah hna i an nunnak a liam, tiah theih a si. Virginia ramkulh Chesa Paraki khua ah a ummi Walmart Supermarket pakhat ah a luancia November 22 ah Super Market Manager tiah ruahmi pa nih minung 10 hrawng a kah hna hnuah amah tein ai that ve, tiah ṭuanvo ngeitu palik nih an chim.

Cu kahnak kong he pehtlai in zei ruang ah dah meithal kahnak a chuah ti mi kong bel fiang in hngalh a si rih lo. Palik nih cun Supermarket chungah minung pakhat nih a thahmi hna a si, tiah an langhter.

A luancia kum 2019 lio zong ah Texas ramkulh, El Paso khua Walmart Supermarket ah meithal kahnak a rak chuak i minung 23 an nunnak a rak liam cang tiah theih a si.

SAC Ralkap Nih Pauk Peng Sathein Khua An Khangh Caah Inn 241 A Ciam, Magway ramṭhen, Pauk peng Sathein khua cu SAC ralkap nih an khangh caah inn 241 a ciam tiah Pauk peng chaklei hmunhma um pah-kah-phah phu in tuanvo ngeitu nih a chim. Sathein khua cu SAC ralkap nih November 22 in 23 tiang ni hnih chung pehtlai in an khanghpiak hna caah tualchung mi hna an umnak inn 241 a ciam,

SAC ralkap nih Kawl biaknak an pathian lem zong an hrawh, cun Gwaykone(ဂွေးဂုံ) khua zong an khanghchih caah tualchung mi umnak inn 4 a kaang tiah theih a si. “Sathein khua cu inn 400 tluk hrawng umnak khua a si, SAC ralkap nih inn 242 an khanghpiak hna, zei bantuk thilri hmanh lakawk thalo in an ciam,” tiah Pauk peng chaklei pah-kah-phah in tuanvo ngeitu pakhat nih a chim.

Naupawi Lio Nu Pakhat Sii-inn Lei An Kalpi Lioah Motor Ai Let I Nu Pathum An Nunnak A Liam, Mandalay ramṭhen, Nyaung U peng, Nyaung U-Kyauk Pan Taung(ကျောက်ပန်းတောင်း) lam ah nizan November 23 chun sml 12:30 hrawngah chungkhar pakhat nih citmi motor pakhat ai leh caah mi bawmchantu phu nih an bawmh hna, tiah theih a si.

“Cu motor cu naupawi lio nu pakhat sii-inn ah a kalpitu a si i Nyaung U-Kyauk Pan Taung lampi metung 17/5 an phak ah rang tuk in a khalh ruangah ai let i nu pathum an nunnak a liam, naupawi lio nu cu a him,” tiah mi bawmchantu phu in ṭuanvo ngeitu pakhat nih a chim.
Motor ai citmi hi nu pali le pa pakhat an si i cu chungah pa pakhat le naupawi lio nu lawng an him, asinain hliamhma belte an pu, tiah theih a si.

SAC Ralkap Nih Pakokku Hrambunh PDF Sakhan Pakhat An Khangh, PDF Ralkap Pahnih An Tlaih Hna, Magway ramṭhen, Pakokku hrambunh Dragon Brothers Guerrilla sakhan cu, nizan November 23 ah SAC ralkap nih an khangh piak hna pinah PDF ralkap pahnih an tlaih hna, tiah Dragon phu in bawino Paing Kyi nih a chim.

Zanlei sml 3:00 hrawngah Pauk le Myaing lei ah rallam a sialmi SAC ralkap 80 hrawng a phurtu motor 9 an kai tiin thawng kan theih ahcun an kan luhhnawh cang, tiah a chim chap. “Sakhan ah a taangmi Chit Tey le Phu Lone cu ṭha tein sentari congh ding ah phone kan chawnh ko hna nain chawnh khawh an si ti lo.

Keihmah le PDF ralkap pahnih he sakhan lei kan va kal ahcun SAC ralkap nih an rak tlaih cang hna. Hriamnam tling in kan ngeih lo caah hnu ah kan kir ṭhan,” tiah bawino Paing Kyi nih cun a chim. Sakhan chungah a ummi facang tun 2, bomb le thilthuam hna cu SAC ralkap nih an lakpiak hna i tlaih a tongmi PDF ralkap pahnih zong Pakokku lei ah an kalpi hna, tiah theih a si.

NLD Hluttaw MP Pathum Hna Cu SAC Nih Thong Kum 20 Thlak Dingin Bia An Khiahpiak Hna,, Rampi nawlngeihnak latu Min Aung Hlaing nih thongtla cheukhat a thlah hna hnu ni tlawmpal a rauh ah NLD party Hluttaw palai pathum hna cu, Pathein thonginn ah kum 20 thong thlak dingin bia an khiahpiak hna, tiah theih a si.

Kum 20 thong thlak a tongmi hna cu Pathein ramṭhen Hluttaw palai Than Htuat, Tharpaung Pyituh Hluttaw palai Thein Htun, Tharpaung ramṭhen Hluttaw palai Aung Aung Oo hna an si, tiah theih a si. SAC kuttang Pathein thonginn chung biaceih zung nih rampi limhang thlaknak le rampi rawiphiarnak case in kum 20 thong an thlak hna hi a si, tiah NLD party chungtel hna sinin theih a si.

Thong kum 20 thlak a tongmi NLD Hluttaw palai pathum hna cu, SAC nih nawlngeihnak an lak hnu ah an i thup i thla khat a rauh hnuah SAC ralkap nih an rak tlaih hna. NLD party nih an khawmhsuatmi cazin ningin SAC nih nawlngeihnak an lak hnu in Hluttaw palai 90 tlaih an tong i, tlaih an ton i hren an ton lioah Hluttaw palai pahnih an nunnak a liam, tiah theih a si. Crd-TCP