Breaking News, Kan Pale Nih Thawng Thanh Nak An Vun Tuah Taktak Cang Ko Hih!!

Chin Miphun Dohthlennak Kum 35 Tlin Camtuak Ah CNF Nih Cathanh An Chuah
===========
Chin miphun dohthlennak kum 35 tlin camtuak nihin March 20 ah CNF nih, Chinmi mahte khuakhan lairelnak kan ngah khawhnak ding le Federal rampi kan ser khawhnak ding ah tiin dohthlennak kan tuahnak kum 35 a tling cang, tiah an langhter.

SAC kan dohnak ah mizapi nih harnak le fahnak nan intuar bu ah a lamkip in nan kan bawmhchanh, nan kan kilkamhnak cung ah lunglawmhnak tampi kan ngei.

Chinmi kan covo laak ṭhannak ding ca ah ramkhel in siseh, kahdohnak in siseh, ramkhat le ramkhat i pehtlaihnak Ambassy khel in siseh hmai kan nor chin rih lai.

Kan miphun covo ngahnak ding ca ah kan zate in kanmah le ti khawhnak zawn cio in kan ṭuanṭi a herh. Cun, SAC he i bawm in rian nan ṭuanṭi hrimhrim lai lo, tiah CNF nih cun an langhter.

Nawlngeihnak latu ralhrang SAC nih mizapi an nunning a hrawhmi sersiam ṭhannak ca ah ramkhel hmuitinh aa lomi, zumhnak le pom ning aa khatmi bu le pumpak he rian kan ṭuanṭi lai.

Cu pin ah Chinland chung ah ukhruainak, humhimnak le upadi ning in rianṭuannak hna zong a tak in kan ṭuanchuah lai, tiah an cathanh ah cun an langhter.

SAC nih hramhram uknak a laak in 2023, February ni 28 tiang Chin ramkulh ah inn 1485 khanghpiak an tong tiah Data For Myanmar nih March ni 19 ah cathanh a chuah.

Data For Myanmar nih a langhter ning ah 2021 February 1 in 2023 February 28 tiang kum hnih luan chung ah Sagaing ramṭhen ah inn 47,778, Magway ramṭhen ah inn 9,019, Chin ramkulh ah inn 1,485 le hmun dang ramkulh le ramṭhen ah inn 2,177 hrawhpiak an tong tiah a thanhmi ah cun a langhter.

Chin ramkulh ah inn 1,485 khanghpiak an tonmi chung ah Thantlang peng ah hin a tam bik khanghpiak an tong i inn 1,299 a kaang. Falam peng ah inn 108, Hakha peng ah inn 35, Tedim peng ah inn 13, Kanpetlet peng ah inn 13, Mindat peng ah inn 10 le Matupi peng ah inn 7 tiin khanghpiak an tong.

Chin ramkulh ah a cangmi kahdohnak le buaibainak ruang ah India, Mizoram ramkulh ah ralzaam dirhmun in aa dormi Chin mi 50,000 hrawng an um tiah theih a si.

Arakan League For Democracy Party cu nawlngeihnak latu SAC he kan ṭanṭi lo bantukin kan party zong an sin ah register kan tuah lai lo, tiah ALD chimphuannak nawlngeitu Myo Kyaw nih a chim.

Kanmah he party lei in hawikom ngai a simi Shan National League For Democracy(SNLD) party zong nih SAC kuttang Election Commission sin ah register kan tuah lai lo an ti. Kannih ALD party zong February thla dongh ah register tuah lo ding in biachahnak kan ngei, tiah a chim chap.

“Kan party hi a hlan tein SAC sin ah register kan tuah lai lo tiin bia kan rak khiah cang ko. Kan party policy ning in hranhram uknak phung le hranhram uktu he i fonh lo ding ti a si caah, a luancia February ni 25, central meeting lioah central committee hna le peng hruaitu hna nih biakhiahnak kan tuah ṭhan,” tiah Myo Kyaw nih cun a chim.

“Kan party policy kan i tlaih peng caah SAC nih nawlngeihnak an laak thawk tein anmah he pehtlaihnak zeihmanh kan tuah hna lo pin ah tonbiatuahnak zong kan ngei lo,” tiah a chim.

1989 September 27 ah rak dirhmi ALD party cu 1990 thimnak ah Hluttaw ṭhutdan 11 ah teinak an rak hmu ve. Rakhine ramchung ah party ngan Arakan League For Democracy(ALD), Arakan National Party(ANP) le Arakan Front Party(AFP) an um i AFP cu SAC sin ah register an tuah cang, tiah theih a si. Cr-The Chin Post