Breaking News; Kan Lai pathawng Tial Thang a rak kir than cang lai!!

Kan Lai Pathawng Tial Thang Aa Thua Than Cang Lai!
===================
Kan Chin miphun, Hakha fa , U.S ram, New York khuapi ah khua a sa mi Tial Thang cu Kawl holh in ကြေးစားရလဒ် ah Puai (3) teinak a hmu mi a si i, Puai (1) cu a sung ve i, puai khat tucu puai a piat. A donhgnak nak bik aa thuat mi Indonesia mi Sunoto cu Low Blow a si caah teitu um loin an puai a piat.

A tu i phomh than hnga ding ah April ni 26 lio ah min a thut cang tiah theih a si nain a tu tiang ah aa phomh rih lo. A sinain tukum a dih lai ah a rak kir than cang lai, aa phomh than cang lai tiah ruah a si tiin Tapology nih a tial. Khah, Tial Thang aa phomh than hnga ding ah nan ready cang hna maw, i ngeih cio a si cang ko hih.

Relchap,KIA Battalion 9 Sakhan Cu SAC Ralkap Nih Vanlawng In An Kah! Shan Chak lei KIA battalion 9 Kawng Sak Bum sakhan cu nihin zing in zaanlei tiang vanlawng 2 hmang in fak ngai in SAC ralkap nih bomb an thlak, tiah theih a si. Nihin zing suimilam 8 hrawng in chun suimilam 12 tiang Jet vanlawng in voi 10 bomb an thlak, cu hnu ah zaanlei suimilam 3 hrawng ah Helicopter pakhat in an kah ṭhan, tiah tualchungmi pakhat nih a chim.

Bomb thlaknak ruang ah phone line zong an phih dih nain atu ah cun a ngah ṭhan cang, Jet vanlawng in an kah chel, Helicopter in an kah chel a si. cupinah Nanphetka (နမ်ဖက်ကာ) khua in hriamngan in an kah rih, tiah Nanphetka khuami pakhat nih a chim.

Demoso Ah SAC Ralkap Nih Sianginn Pakhat An Kah I, PDF Nih Tualchungmi Bomb Khor An Cawhter Hna!: Kahdohnak a um lo nain, SAC ralkap nih drone hmang in Demoso tualchung mi hna cu an kah hna caah Sianginn le rianṭuantu hna umnak inn an rawk, tiah Demoso tualchung hriamtlai phu DMO Local PDF nih cathanh an chuah.

Nihin September 7, zinglei suimilam 1:45 hrawng ah Ngwaytaung(ငွေတောင်) hrambunh khah-lah-yiah 102 battalion nih drone hmang in Demoso sianginn lei ah bomh lung 6 hrawng an kah, tiah an langhter.

Cucaah Demoso peng chung um mipi hna le ralzaam mi hna nih mah le umnak ah bomb khor i cawh cio ding in le hriamngan puah thawng, raltuknak vanlawng thawng an theih tikah bomb khorchung ah hmunhma khuar colh ding in PDF nih mipi thawng an thanh hna.

Matupi le Mindat Khua Pawng Hrawng Khuami Dihlak Ngawt Cu India Ram Lei Ah An Zaam!, Chin ramkulh, Matupi le Mindat khua pawng ah SAC ralkap nih van lei kahdohnak an tuah ruangah le hriamngan hmang in kahdohnak an tuah caah tualchung mi hna cu an dihlak ngawt in India ram lei ah an zaam hna, tiah Matupi peng ralzaam pakhat nih a chim. A luacia August thlakhat chung ah ralzaam singkhat leng an karh, tiah UNOCHA nih September 5 ah cathanh an rak chuah.

Tualchung mi hna nih cinthlaknak an tuah kho ti lo, dumhau le Lei kuang hna cu kaltak in an zaamtak i, atu ah cun khuapi chung an kir khawh ti lo caah harnak nganpi an tong, bawnhchanh an herh ngai ko, tiah tualchung mi pakhat nih a chim.

July thla dih tiang ah ralzaam dirhmun a phanmi 860,000 renglo an si nain, August thla ah singkhat renglo an karh caah ralzaam dirhmun a phanmi hi 970,000 leng an phan. SAC ralkap nih hramhram uknak an lak hlan buainak ruang ah mah umnak hmun kaltak in ralzaam dirhmun a phanmi 330,000 leng an um i, ralzaam dirhmun a phanmi dihlak hi sing 13 renglo tiang an phan cang.

Sagaing Ramṭhen, Butalin Peng Inn A Khangtu SAC Ralkap 20 Hrawng Cu Bomb Puahnak In An Thi! Sagaing ramthen, Butalin peng, Dwintaung khua cu nizaan September 6 ah SAC ralkap nih an khangh i, an kirlei ah bomb kan puahhnawh hna, tiah Chindwin Brothers PDF nih nizaan September 6 ah an thanh.

Dwintaung khua in an kirlei ah SAC ralkap 80 cu Laymay(လေးမြေ) khua le Ngaingthumya(ညောင်သူများ) khua karah ah bomb kan puahhnawh hna. Cu bomb puahnak ah cun SAC ralkap 20 an thi i, 5 faak ngai in hliam an tuar. SAC nih hriamngan le hriamhme hmang in an kan kah ve nain kanmah lei hliamtuar um lo tein hnu kan tolh kho, tiah Chindwin Brothers PDF in ṭuanvo ngeitu nih a chim.

Cu kahdohnak ah cun Chindwin Brothers PDF, Daung Generation, Bu Lah Mauk Seik (ဗိုလ်လမုတ်ဆိတ်) le Royal Diamond hna an i bawm, tiah theih a si. Myinkin Peng Kungmaw Khua Ah PDF Ralkap 2 Thah An Tong, Tualchung Mi 2 SAC Ralkap Nih An Kah Hna: Sagaing ramṭhen, Myinkin peng Kungmaw(ကုန်းမော်) khua cu September 3 ah SAC ralkap nih an luhnawh i, PDF ralkap 2 an thah hna pinah tualchung mi 2 zong meithal in an kah hna, tiah Myinkin PDF nih an thanh.

Thah a tong mi PDF ralkap Mya Din, kum 35 le Soe Min, kum 25 cu meithal in an kah thah hna pinah an tuk, an velh hnanak hma a um, tiah theih a si.

“SAC ralkap pawl cu Kungmaw khua lei in rallam an sial i, khuami 10 leng an tlaih hna. Saihthar(ဆိတ်သာ) khua an phak ah an tlaih ṭhan hna. SAC ralkap nih an duhmi thilri vialte cu an i laak dih. PDF ralkap 2 ruak cu Saihthar khua ah kan hmuh hna. September 6 ah an ruak cu an vui hna,” tiah PDF an langhter.

SAC ralkap le Pyusawhti 100 hrawng cu Myinkin peng ah rallam an sial i, Kani peng lei ah an kal. Myinkin peng cu SAC ralkap nih internet le phone line an phih, tiah tualchung mi hna nih an chim. Nizan September 6 ah Tatchaung(တပ်ချောင်း) khua pawng ah umhmun a khuarmi SAC ralkap pawl cu Myinkin peng PDF nih hriamngan in an kah hna caah ralkap a thimi an um kho, tiah PDF lei nih cun an chim.

Tanintharyi Ah SAC Ralkap Le Phyosawhti 6 Cu PDF Nih An Thah Hna! D-Day kumkhat tlinnak ah tiin Kyunsu ah a ummi Phyosawhti pawl cu kan kah hna i, Phyosawhti 2 an thi, tiah Tanintharyi-PDF nih nihin September 7 ah an thanh. Tanintharyi ramthen, Kyunsu peng, Petain(ပဲတိုင်) khua, Myeik pengkomh, Bataillon 2 Tat-Khuai 2 le Tanintharyi-PDF hna nih tuzing suimilam 5 hrawng ah an kahdoh hna tiah theih a si. Cu kahdohnak ah cun Phyosawhti hruaitu U Ni Di Du telhin, Phyosawhti 2 an thi i, pakhat hliam a tuar, tiah kan theih.

Cun, September 4 zinglei sml 11 hrawng ah Tanintharyi peng Laythit-Thinchaungwa (ထိန်ချောင်း၀) khua pawng ah rallam sialmi SAC ralkap hna cu kan kahdoh hna i, SAC ralkap 3 le Phyosawhti 1 an thi i, 1 faak ngaiin hliam a tuar. Kanmah tualchung hriamtlai phu lei hliamtuar um lo tein hnu kan tolh kho, tiah tualchung hriamtlai phu hruaitu pakhat nih a chim.

Htaway-Htikhi Lam Kahdohnak Ah SAC Ralkap 10 Leng An Thi, PDF Nih Hriamnam Tam Ngai An Laak, Tanintharyi ramṭhen, Htaway-Htikhi(ထားဝယ်-ထီးခီး) lam ah rallam a sialmi SAC ralkap Khah Lah Ya 273 le Bo Aye Khui hruaimi PDF ṭangrual phu hna cu nizan September 6 ah an i kap i, SAC ralkap 10 nak tlawm lo an thi, meithal le zen-kuan zong an laak, tiah theih a si.

SAC ralkap pawl cu Kanpauk(ကံပေါက်) ah umhmun khuarmi an si i, Coastal Regional Military Headquarters kuttang Battalion pakhat an si. Cu kahdohnak ah cun PDF nih pistol zun 1, MA meithal zun 4 le zen-kuan tam ngai an laak, tiah theih a si.

Htaway-Htikhi lampi cu hmunhma thianhhlimnak kan tuah lai, tiah SAC ralkap nih timhlamhnak an ngeih caah PDF ṭangṭi phu hna nih, Htaway-Htikhi lam cu thla khat an kham i, zing sml 6:00 in zanlei sml 6:00 tiang kal lo ding in mizapi cu ralrin an pek hna.

Khin U Ah SAC Ralkap Cu PdF Nih Drone In An Kah Hna Caah Ralkap 12 An Thi, Sagaing ramṭhen, Khin U peng Innpatkwe(အင်းပတ်ဂွေ့) ah SAC ralkap Tat Ma(တပ်မ)33 le Pyusawhti nih check gate an tuah i, mitlungkal le khualtlawng mi hna cu phaisa an hal lengmang hna caah September 2 ah drone In bomb lung 6 kan thlak hna i, ralkap 8 an thi. Hliamhma pumi ralkap 4 cu Ye U khua phanh ka ah an thi, tiah Dragon Urban Guerrilla nih cathanh an chuah.

SAC ralkap nih hriamngan le hriamhme in an kah ko hna nain, PDF ṭangrual phu lei in a thimi le aa hliammi an um lo, tiah theih a si. Cu kahdohnak ah cun D.U.G.F (KU Dragon), Wolf Guerrilla (Ye U), KSO (Khin Oo), Brother of Lands Defense Force (BLDF), Northern Tigers Group, NAA-DF, FIRE DRAGON (Khin U), Burmese Revolution Youths, Spring Special Task Force, MYANMAR DEFENSE FORCE (Hydra Force), Khin Oo Dog Killers(KDK), Hero Army (Khin U) le ṭangrual phu hna i bawm in an kah hna, tiah theih a si.

Cupinah September 1 ah Pyusawhti pawl a phu in an umnak inn cu drone in bomb kan thlak caah Pyusawhti aa hliammi an tam. A luancia August 10 lio zong ah Ye-U le Depeyin motor lam ah khualtlawng mi pawl phaisa a haltu SAC ralkap pawl cu, drone in kan rak kah hna caah ralkap a thimi le aa hliammi an um, tiah an cathanh ah cun an langhter.

Kanphyo Khua Ah Umhmun Khuarmi SAC Ralkap Cu PDF Nih Bomb An Thlak Hna I Ralkap 2 An Thi: Sagaing ramṭhen, Ayartaw(အရာတော်) peng Kanphyo(ကမ်းဖြူ) khua sianginn ah umhmun a khuarmi SAC ralkap pawl cu nizan September 6 zanlei sml 5:00 hrawng ah drone in bomb kan thlakhnawh hna caah ralkap 2 an thi, tiah Zero Guerrilla phu in ṭuanvo ngeitu pakhat nih a chim.

SAC ralkap pawl cu 40mm zong in an kah hna, tiah theih a si. “Drone in bomb kan thlakhnawh hna i vawlei lei zong in 40mm in kan kah hna caah ralkap 2 an thi, 10 hliamhma an pu,” tiah Zero phu in ṭuanvo ngeitu Thet Kyi nih a chim. Cu kahdohnak ah cun Zero Guerrilla Myinchan, ZERO POWER(Sagaing) le DANGER FORCE EAGLE LOCAL PDF hna i bawm in an kah hna, tiah theih a si.

Kalaymyo Ah Umhmun A Khuarmi SAC Ralkap Cu PDF-Kalay Nih An Kah Hna I, Ralkap 4 an Thi!: Sagaing ramthen, Kalaymyo ah SAC nih umhmun an khuarnak hmun 3 cu September 4 zaan sml 11 hrawng ah PDF-Kalay le tualchung hriamtlai phufonh hna nih kan kahdoh hna i SAC ralkap 4 an thi, tiah PDF-Kalay nih an thanh.

“A tlawmbik SAC ralkap 4 cu kan mithmuh ah an thi i, hliamtuarmi zong an tam ngai, kahdohnak a dih in Ambulances 2 a ra i, hliamtuarmi le a thimi cu a thiar hna. Cu hnu ah hriamngan in an kan kah ve” tiah PDF-Kalay ralkap pakhat nih a chim.

USDP Party A Soiseltu Minung 9 Cu PDF Nan Si Tiin Ralbawi Lt. Col. Ye Lin Aung Nih A Tlaih Hna, Mandalay ramṭhen, Mahlaing(မလှိုင်) peng Hpucuai(ဖိုးကြွယ်) khuami Lt. Col. Ye Lin Aung cu Kachin ramkulh, Moemauk peng ah SAC ralkap battalion 142 hruai in a kal i, Mahlaing peng USDP party a soiseltu minung 9 cu ‘PDF nan si’ tiin ralkap a tlaihter hna i, an inn zong a hrenhpiak hna, tiah theih a si.

“Mahlaing khua cu USDP party an tam tuknak a si. Mahlaing khuami Ye Lin Aung hi misual taktak a si fawn. Taungyutey(တောင်ရိုးတဲ ) khuami 9 cu PDF an si, tiah Ye Lin Aung nih Meikhtilar( မိထ္ထီလာ) um SAC ralkap pawl a tlaihter hna,” tiah tualchung mi hna nih cun an chim.

Taungyutey khuami 9 cu PDF an si tiin a puh hna pin ah thimnak(election) ngeih lio ah khan USDP party ah vote an pek lo caah a tlaih hna, Mahlaing peng cu USDP party hmunram siseh tiin Ye Lin Aung nih a chim, tiah theih a si. Lt. Colonel Ye Lin Aung cu a nupi San San Naing le a fanu Tun Suh Aung he Kachin ramkulh, Dawhpung Yan khua ah a ummi an si, tiah theih a si.

D-Day Thanh Ni In Kumkhat Chung Ah SAC Ralkap 20,000 Leng Kan Thah Cang Hna, Ramchung ah hmunkhat tein hramhram uknak doh thawk ni, D-Day thanh ni in peng 250 chung ah Battalion 300 leng kan ser khawh i, cu chung ah peng 24 cu kan uk khawh i kan tlaih khawh cang, tiah caan karlak NUG cozah President Duwa Lashi La nih a chim. Nihin september 7 hi D-Day kum khat tlin camtuak a si.

President Duwa Lashi La nih cun, “D-Day thanh ni in kumkhat chung ah PDF le tlangcung hriamtlai an zapi fonh ah 1,500 leng nih ram le miphun ca ah an nunnak an pek. SAC ralkap lei in 20,000 leng kan thah ve hna pinah 7,000 leng hliamhma an pu. Ralhrang ralkap nih ramchung ah inn 30,000 leng an khangh,” tiah a chim.

PDF Battalion 300 leng kan ser khawh i, ramchung um peng 330 chung ah 250 ah cun hriamtlai phu an cawlcaang. NUG kuttang ah a um lomi hriamtlai pawl he zong a si khawh chung in rian kan ṭuanṭi. Peng 24 cu kan uk khawh cang, tiah NUG President nih a chim.

A ra laimi 2023 hi dohthlennak ah a biapi mi kum a si. Hramhram uknak kan tei khawhnak ding ah mizapi lungrual tein kan ṭanṭi a herh. Thazaang a ṭhawng tukmi SAC pawl doh ding cu a si kho lo, tiah a rak chimtu mifim cathiam tampi zong D-Day thanh hnu kumkhat a tlin hnu cun an biachim mi aa thleng ṭhan cang. SAC cu PDF nih an tei deuh hnanak kong le an hlawh a tlin ziahmahmi an cohlannak kong zong NUG President Duwa Lashi La nih cun a chim.

Yangon Ramṭhen, Shwepyithar No. 9 Sang Ah In Hra Uktu Pa PDF Nih An Thah, Minung 4 Hliamhma An Pu: Yangon ramṭhen, Shwepyithar(ရွှေပြည်သာ) peng No. 9 sang um, sang bawi zung cu PDF le Yangon Urban Guerrilla Army (YUGA-Mo 7 Eagles) phu nih nizan September 6 zan ah kan kah i, inn hra uktu pa a thi, tiah Shwepyithar Pah Kah Pha nih cathanh an chuah.

September 6 zan sml 7:45 hrawng ah No. 9 sang um, sang bawi zung cu PDF ṭangrual phu hna nih an kah caah inn hra uktu Aung Htu a thi i, 4 hliamhma an pu, tiah theih a si. Cupinah September 6 zan sml 9:10 ah No. 9 sang um, sang bawi zung ṭhiamṭhiam ah bomb puahkehnak a chuak ṭhan, tiah theih a si.

KNU Brigade 5 Hmunram Ah Nihnih Chung Kahdohnak A Chuak I, SAC Ralkap/BGF 13 An Thi, Karen ramkulh, Mutraw(မူတြော်) pengkomh ah September 2 le 3, nihnih chung ah SAC ralkap kuttang um BGF le KNU Brigade 5 hna kahdohnak a chuak i, SAC ralkap le BGF lei in 13 an thi, tiah KNU-Mutraw News sinin theih a si.

September 3 zing sml 6:00 hrawng ah Dwelu(ဒွယ်လိုး) peng ah a cawlcangmi BGF pawl cu Kawthu Lay Brigade 5 kuttang Battalion 102 nih, an kah hna caah BGF lei in 4 an thi, 5 hliamhma an pu. KNU Kawthu Lay lei in ralkap 1 a nunnak a liam ve, tiah theih a si. September 2 zing sml 6:28 ah Lutaw(လူသော) peng chung ah umhmun a khuar i a cawl cangmi SAC ralkap pawl cu Kawthu Lay Brigade 5 nih an kah hna caah SAC ralkap 8 an thi, tiah theih a si.

Cu kahdohnak ah cun MA-1 meithal zun 1, MA-2 zun 2, MA-3 zun 2, kutcheh bomb lung 4, RPG-7 kuan 1, phone lung 3, K-3 kuan 1132 le goon bomb lung 15 an laak, tiah theih a si. SAC ralkap le BGF cu KNU Mutraw pengkomh Brigade 5 ah an cawlcang i, nuhrin covo zong ni fatin in an buar, tiah KNU-Mutraw News nih an langhter.