Kalaymyo Peng Le Mawlaik Kahdohnak Ah SAC Ralhrang Officer Telh In 31 An Thi; Ralhrang Sakhan An Laak Khawh__NUG
=========
Sagaing ramṭhen, Mawlaik peng chung ah umhmun a khuarmi SAC ralhrang pawl cu luhhnawh in kahdoh an ton caah SAC ralhrang Officer 1 telh in 10 an thi, tiah National Unity Government of Myanmar (NUG) cozah in runvennak vuanci nih thanhca a chuah.
June 30, zinglei suimilam 5:15 tluk ah Mawlaik peng, Tawinn khua pawng ah umhmun a khuarmi SAC ralhrang Khah-mah-yiah 365, 366, palik le pyusawhti 50 hrawng hna cu mipi vengtu ralkap hna nih thazaang 80 tluk in an luhhnawh hna i, an kahdoh hna caah zing suimilam 11:45 tluk ah an sakhan an laak khawh, tiah theih a si.
Cu kahdohnak ah SAC ralhrang Officer 1 telh in 10 hrawng an thi i, hliam a pumi zong an tam pinah hriamthil tam ngai zong an laak chih khawh. Mipi ralkap in minung 9 nih hliamhma an tuar i, cu chung ah 2 cu an faak ngai, tiah NGU nih a langhter.
Kahdohnak a chuah hnu ah Kalaymyo in ra mi Mi-35 nih zing suimilam 8:00 tluk in 8:30 tiang voi khat, zing suimilam 11:10 tluk in 11:30 tiang voi khat, chun suimilam 1:50 in 2:20 tiang voi khat, Tada-U zong in chun suimilam 12:12 in 12:15 tiang, (A dihlak fonh) cunglei kahdohnak voi 4 tiang a tuah, tiah NUG nih a langhter chih.
Cu pinah Sagaing ramṭhen, Kalaymyo peng ah kahdohnak a chuak i, SAC ralhrang 20 an thi, tiah National Unity Government of Myanmar (NUG) cozah in runvennak vuanci nih a langhter. June 29, zinglei suimilam 10:30 tluk ah Kalay peng, Thazi khua pawng ah Myothar khua in rallam a rak sialmi SAC ralhrang le pyusawhti thazaang 70 hrawng cu Kalay pengkomh Battalion 4,5,6, Vakok-CNDF, Kalay peng Pah-kah-phah, Kalay khuapi UG phu hna fonh nih bomb puahhnawh in an kahdoh hna caah kaphnih kar kahdohnak faak ngai in a chuak, tiah a langhter.
Cu kahdohnak ah ralhrang lei in 20 an thi i, SAC ralhrang nih Tharzi khua nichuahlei um mipi inn 14 cu khangh in an hrawhpiak hna, tiah a langhter chih. (Hmanthlak: Mipi Ralkap Nih Mawlaik Sakhan An Laak Ah An Laak Chihmi Hriamthil Hna An si.
Kawlin Khuapi Ralhrang Nih Hriamngan In An Kah; Kum 8 Ngakchia 1 Telh In Mipi 4 An Thi. Sagaing ramṭhen, Kawlin khuapi Kyaw Zaya sang cu SAC ralhrang nih hriamngan in an kah caah kum 8 ngakchia pakhat telh in mipi 4 an nunnak a liam. SAC ralhrang nih an ruak cu an chungkhar hna sin ah an pe duh hna lo, tiah Kawlin info in ṭuanvo ngeitu pakhat nih a chim.
June 30, chun suimilam 12:00 tluk ah penguk zung chung um SAC ralhrang nih Kawlin atu bantuk in hriamngan an kah caah mipi inn 2 a rawk pinah mipi 4 an nunnak a liam, tiah theih a si. “Nunnak liammi 4 hna cu kum 60 upa pa 1, a nupi, an tupa kum 8 ngakchia 1 le kum 43 nu hna an si i, SAC ralhrang nih an ruak an laak hna. SAC ralhrang nih an inn pawl zong kulh in an phih dih” tiah a cunglei upa nih Khit Thit ah a chim.
Taze Ah Palik Pakhat Hriamthil He Mipi Sin Ah Aa Fonh; Tangka Sing 70 An Pek. Sagaing ramṭhen, Taze peng ah palik pakhat cu mipi sin ah meithal he aa fonh caah tangka Sing 70 laksawng ah an pek, tiah theih a si.
Mipi sin aa fonhmi palik pa cu February 23 lio ah Taze peng mipi ralkap Pah-kah-phah sin ah aa fonh hi a si nain a himnak ding ca ruah piak a si caah atu lawng ah thawng kan thanh hi a si, tiah mipi ralkap pakhat nih a chim.
“CDM a luhnak caan a sau cang i, atu hi hmunhim a phak cang caah cathanh thawngthanhnak kan tuah hi a si” tiah Khit Thit ah a chim. Palik pa nih G-3 meithal zun 1, khuan bawm 2, kut cheh bomb 1, 7.62 kuan 99, kuan kham angki zun 1 hna he aa fonh caah Pah-kah-phah nih tangka Sing 70 laksawng kan pek, tiah an langhter chih. Credit: The Chin Post