Htantapin peng kahdohnak ah SAC ralhraang 20 an thi i ralbawi 3 a nung in an tlaih hna
================
Bago ramthen, Htantapin peng kahdohnak ah SAC ralhraang 20 an thi i SAC ralbawi pathum a nung in an tlaih hna tiah PDF ralkap pakhat chirhchan in Khin Thit Media nih a tial. May 10, zinglei suimilaam 10:00 hrawng thawk in zanlei 5:00 tiang Htantapin peng, Nyaungpintha khuate pawng ah KNU, PDF phu komh le SAC ralhraang hna kar ah kahdohnak a chuak i ralhraang lei 20 nak tlawm lo an thi, ralbawi pathum a nung in an tlaih hna tiah theih a si.
Kahdohnak ah a thi mi SAC ralhraang ruak hna cu Nyaungpintha khuachung khuami pawl dum ah an vui hna i, ralhraang nih ngakchia pasarih tel in khuami 17 cu mei khangh in an thah hna tiah theih a si.
“May 10, zinglei 10:00 in zanlei 5:00 tiang kahdohnak voi nga a chuak i ralhraang lei 20 nak tlawm lo an thi. 10 hma an pu, ralbawi rank pathum a nung in kan tlaih hna. Ralhraang uico pawl an fah caah ngakchia 7 tel in khuami 17 mei in an khangh hna. A thi mi ralkap ruak pawl cu khuami dum chung ah an vui hna,” tiah PDF ralkap pakhat nih a chim.
Htantapin peng Nyaungpintha khuate ah SAC ralhraang nih ngakchia 7 tel in minung 17 mei in an khangh hna; Bago ramthen, Htantapin peng, Nyaungpintha khuate ah ngakchia pasarih tel in khuami 17 cu SAC ralhraang nih mei in an khangh hna i an thah hna tiah tualchung PDF pakhat nih Yangon Khit Thit Media ah a chim.
May 10, zinglei suimilaam 10:00 hrawng in zanlei 5:00 tiang Nyaungpintha khuate Chaklei kam ah SAC ralhraang le KNU, PDF phu komh an i kap i, ralhraang lei a thi mi le hma pu an tam caah kum 10 tang ngakchia pasarih tel in khuami 17 cu SAC ralhraang nih mei khangh in an thah hna tiah theih a si.
“Ralhraang uico pawl an fah caah sualnak ngei lo khuami 17 mei khangh in an thah hna. A thi mi chung ah kum 10 tang ngakchia pasarih an i tel. A thi mi hna hi Nyaungpintha Chaklei kap ah a um mi khuami an si. An min kan hlathlai lio a si. Kahdohnak a um liopi a si rih. Khuami an thihnak kong ah PDF phu komh lei kan ngaih a chia tuk. Hi caah hin PDF phu komh nih a dongh tiang kan doh hna lai,” tiah PDF ralkap pakhat nih a chim.
Kalay peng Letpanchaung khua ah miakpi kuan voi nga a tla i minung pahnih hma an pu, inn pakhat a rawk; Nihin May 11, Kalay peng Chaklei, Letpanchaung khua ah SAC ralhraang nih an kah mi miakpi kuan voi nga a tla i nu pahnih hma an pu, inn pakhat a rawk tiah theih a si.
“Chun suimilaam 12:00 hrawng ah A Group ah bomb voi 3 a tla. Nu pakhat hma faak ngai a pu. Cun zanlei suimilaam 2:25 ah A Group ah bomb voi khat a tla than i Pu Hmachhuana te inn a kaang i a rawk dih. Bomb pakhat cu E Group ah a tla i nu pakhat hma a pu, tiah CNO-UCR nih a thanh. Tu zing suimilaam 6:00 hrawng in Yarzagyo khua ah PDF pawl le SAC ralhraang pawl an i kap i ralhraang pawl va bawmh ding in Kalaymyo in armored vehicle panga an kal tiah theih a si. Credite; The Hakha Post