Breaking News!
Taungoo Khuapi Thonginn Ah Kahdohnak A Chuak; Thonngtla 3 An Chuakzaam Kho
=========
Bago ramṭhen, taungoo(တောင်ငူ) khuapi thonginn ah kahdohnak a chuak i thongtla 3 hna cu an chuakzaam kho, tiah, tualchung mipi nih an chim. May 18 chunlai ah Taungoo khuapi um thonginn in zung ah an chuahpimi hna thongtla 3 hna cu an kirpi ṭhan hna lio ah an zaam i an kah len hna nain an chuakzaam kho, tiah Khit Thit nih a langhter.
“A chuakzaam khomi hna hi zung ah an chuahpi hna i an kirpi hna lio ah meithal chuh in an zaam, meithal kahnak a chuak nain an zaam kho. Mawlamyine khuapi um biaceihnak zung nih thah ding in (thihdan) nawl an chuahmi hna thongtla 3 an si tiin an chim, fiangte in kan thei kho rih lo, SAC ralhrang pawl an rak phan i lampi an kham dih” tiah tualchungmi pakhat nih a chim.
Cyclone Thlichia Ruangah Minung 455 An Thi; Chin Ramkulh Ah Inn 1,400 Renglo A Rawk; Cyclone thlichia ruang Myanmar ramchung, ramthen le ramkulh 7 ah minung 455 an thi i Chin ramkulh chungah thlichia nih inn 1,428 a hrawh tiah Ministry of Humanitarian Affairs and Disaster Management-NUG nih May 17 ah an langh ter.
Thlichia ruangah a thi mi hna cu, Rakhine ramkulh ah minung 431, Sagaing ramthen ah 4, Magway ramthen ah 15, Yangon ramthen ah 1, Ayerawady ramthen ah 1 , Mandalay ramthen ah 1 le Shan ramkulh ah 2 an thi.
Mah pin ah inn le lo a rawk mi hna cu, Sagaing ramthen chung ah inn 49, Magway ramthen ah inn 91 le Chin ramkulh peng 8 ah inn 1,428 an rawk. Rakhine ramkulh cu inn le lo a rawk mi a tam caah cazin khawmh suat lio a si i kan langhter kho rih lo tiah NUG nih an langh ter chih.
Cun thlichia ruangah Sangaing le Magway ramthen chung lawng ah pehtlaihnak hlei, Lam le mei tung 34 an rawk. Mah pin ah cinthlak nak lei kuang zong Ekah 42,517 a rawk. Thlichia ruangah har tongmi hna caah tangka in sing 640 renglo bawnh nak pek mi chung ah Chin ramkulh caah sing 100 bawmhnak pek dingin an thenphawt mi zong an langhter chih.
Cyclone Thlichia Ruangah Harnak Tongmi Caah USA Nih Dorllar Sing 2 Bawmhnak Pek; America ram nih Myanmar ramchung ah Cyclone thlichia nih harnak pek mi mipi hna caah US Dollar sing 2 bawmhnak kan pek lai tiah Yangon khua hrambunh US Embassy nih May 17 ah thanhca a chuah.
May 14 le 15 ah Myanmar ramchung ah a lutmi Cyclone thlichia ruangah inn le lo tampi a rawk mi kongah America ram zong nih kan in tuar pi hna tiah an langh ter chih. US Dollar sing 2 bawmh mi cu America cozah nih USAID sin ah a pek hi a si. Hi bawmhnak cu tualchung ah a cawlcang mi phu he i bawm in tawlrel a si lai.
US Dollar sing 2 bawmhnak pek ding mi chungah Rakhine ram le Chin ramkulh hna cu fakngai in an tuar caah caan karlak umnak ding, ti ngahnak ding kong, pawngkam le pum thianhhlimh nak caah bawmchan tu a si lai nak kong le hmailei zongah pehzulh in bawmhnak pek dingah timhtuahnak an ngeih nak kong thanhca chuah mi ah an langh ter chih.