Thlichia Nih Chin Ramkulh Chung Ah Inn 3,000 Deng A Hrawh – ICNCC
======
A luancia May 14 ah hrangmi Mocha thlichia nih Chin ramkulh chung ah tualchung mi inn, Biakinn le biaknak he aa pehtlaimi inn, rawlruk, sii-inn le cacawnnak sianginn telh in inn 2,774 a hrawh, tiah Interim Chin National Consultative Council(ICNCC) nih nizan May 23 ah cathanh an chuah.
ICNCC nih cathanh an chuahmi ah Matupi peng chung lawng ah inn 1,211 a rawk i, Chin ramkulh chungah inn rawkral a tam biknak a si, tiah an langhter. Paletwa ah inn 400, Mindat peng ah inn 654, Kanpalet peng ah inn 211, Thantlang peng ah inn 41, Falam peng ah inn 100, Hakha peng ah inn 105 an rawk, tiah an langhter.
Cu pinah sianginn 185, biaknak he aa pehtlaimi inn 102, ngandamnak zung he aa pehtlaimi inn 12, rawlbmruk 259 le Hall 6 an rawk i, inn zuat saṭil 69 an thi an thi, tiah an langhter. Inn rawk ral remh ṭhannak ding ah thirkhenh le chanpheo an herh i, hartongmi hna nih facang le sii-ai zong an chambau ngai, tiah an cathanh ah cun an langhter.
BungKhua IDPs Camp Ah A Ummi Hna Cu Ei Le Din An Harsa; Thantlang peng Bungkhua IDPs Camp ah a ummi hna cu ei le din an har ngaingai i chiti le cite cawk nak hmanh an ngei ti lo tiah theih a si.
March 24, 2023 ah a hnubik bawmhnak an hmuh a si i cu hnuin atu tiang bawmhnak an hmuh ti lo. Hi hlan ah cun minung pakhat ah MMK 30,000 an bawmh tawn hna nain cu bawmhnak cu an pe ti hna lo!
“May 7 ah pastor cheukhat le NGO riantuantu nih an kan veh i Camp a ummi nih kan harsatnak kan chimhruah ko hna nain atu tiang an kanbawm hlei lo, kan hlathlai tikah camp dang cu an bawmh ko hna ti kan theih i kan lung a nuam lo ngai” tiah Bungkhua IDPs camp ummi pakhat nih The Chin Post ah a chim.
Bungkhua IDPs camp a ummi hna cu ni camp lengah ni 15 cung nan um ahcun bawmhnak kan in pe hna lai lo an ti hna i bawmhnak an hmuhmi cu an i zat lo tikah Mizoram le hmundang ah riantuan in tangka aa hlawhmi, damlo ruangah sii-inn a kalmi le sianginn a kaimi hna cu camp ah an um lonak ni 15 cung a si ahcun bawmhnak an pe hna lo tiah theih a si.
“Bungkhua IDPs camp a ummi hna zohkhenhnak le bawmhnak kongah tuanvo ngeitu upa hna nih kan harsatnak hi kan theihthiam piak in khua kan khan piak zau hna sehlaw kan duh ko” tiah camp ah a um ve mi pakhat nih The Chin Post ah a chim. Bungkhua IDPs camp ah minung 485 an um tiah theih a si.
Chaung U Peng Ah SAC Ralkap Nih Pa Pali An Tlaih Hna Hnu Ah An Thah Hna! Sagaing ramṭhen, Chaung U peng Natyekan khua um SAC ralkap check gate ah pa pali cu SAC ralkap nih May 22 ah an tlaih hna i an thah hna, tiah Chaung U PDF in ṭuanvo ngeitu pakhat nih a chim.
Thah a tongmi hna cu May 21 ah Mandalay in, Sagaing – Monywa khuapi lei ah motor in an kal i, Natyekan check gate ah tlaih an tong. ‘PDF he naihniam in a ummi an si’ an ti hna ruangah an thah hna, tiah Chaung U PDF in ralkap pakhat nih a chim.
“Pa pali cu Hijet motor in Monywa lei ah an kal i, check gate pakhat hnu pakhat an tan dih ko nain Natyekan check gate ah tlaih an tong. SAC ralkap nih an phone an zohpiak hna i, lunghrinhmi an hmuh caah an thah hna. Hriamnam zong an i put lo,” tiah PDF pakhat nih cun a chim.
SAC ralkap thawngzamhnak nih a langhter ning ah cun, May 22 ah SAC ralkap nih Natyekan khua pawng i hmunhma thianhhlimnak an tuah lio ah bomb a hmanhmi PDF 4 cu an kah hna. PDF chungtel 4 hna ruak in kut ser meithal 3, kut ser bomb lung 5, 9mm kuan 13, battery 2, phone lung 2 le a dangdang thilri zong an lak, tiah an langhter. Credite; The Chin Post