BREAKING NEWS: Heavyweight Championship ah Uk Lian Thang a sung!!

Breaking News:
==============
Heavyweight Championship ah Uk Lian Thang zong a sung! Naga pathau pa hi 129 kg in a rit, Uk Lian Thang hi 90 Kg a si. Voikhat veve an i tengh hnu ah rau tuk ṭangkawp in an i pai. A donghnak ah Naga pa nih a tei. Crd-The Chin Post

CDF-Paletwa Nih Mipi Sin Ah Forhfialnak Cathanh An Langhter, CDF Paletwa nih mipi si ah forhfialnak cathanh cu a tanglei bantukin an langhter tiah theih a si. Dohthlennak kan tuah timi hi zeitluk in dah harnak kan tuar khawh i kan ral a that ti i zuam a si lo, hranhram uknak hrawh ding tu khi kan i timhmi a si deuh.

Na pawngkam ah dohthlennak ah ai tel vemi pakhat kha keimah tluk hmanh na tuah kho lo tia sualphawtnak tuah ding si lo. Pakhat le khat kan dirhmun, kan ruahnak, kan ralțhatnak le kan thil tikhawh ning ai lawh cio lo caah san kan tlaihnak hmunhma zong a dang ve. Cucaah kan dirhmun le kan umnak hmunhma cio in kan ti khawh tawk in teimanthluk nak ngeiin tuan cio dingaj kan in forhfial ko hna tiah an langhter.

Shiataw Ah Riahcaw Chantu Helicopter Kah A Ton Caah SAC Ralkap 3 An Thi, Karenni ramkulh, Shiataw ah umhmun khuarmi Khah Lah Yah 428 Battalion SAC ralkap hna riahcaw chanh ding in a kalmi SAC ralkap Helicopter cu, October 19 ah KA le KNDF B17 hna nih naih tein kan kah caah SAC ralkap 3 an thi, 6 hliamhma an pu, tiah KNDF nih cathanh an chuah.

Cu kahdohnak ah SAC ralkap nih hriamngan an kah caah kum 15 tluk ngakchia pakhat le kum 50 tluk pa pakhat tiin minung pahnih hiamhma an pu tiah theih a si. SAC ralkap Brigadier nih Shiataw khuabawipa cu a auh i, hi hnu kahdohnak a chuah ahcun nan khua ning in kan khangh dih lai, tiin a tlerh tiah theih a si.

Kyaikhto(ကျိုက်ထို) Kahdohnak Ah SAC Ralkap 2 An Thi, Kyaikhto peng Kahdohnak ah SAC ralkap pahnih an thi tiah theih a si. Mon ramkulh, Kyaikhto peng Pinekone(ပိန္နဲကုန်း) khua pawng ah rallam a sialmi SAC ralkap le PDF karah, October 19 zinglei ah kahdohnak a chuak i, SAC ralkap 2 an thi, tiah Kyaikhto Revolution and Information Network nih an langhter.

SAC ralkap a thimi ruak 2 cu an vui colh hna. Cu hnuah khua chungah an lut i, inn an khangh caah inn 8 le cycle 3 nak tlawm lo a ciam dih. Cu hnu ah khuami thilri zong an hrawhpiak dih hna hleiah khuami 2 an tlau, tiah theih a si.

Natogyi(နွားထိုးကြီး)-Taungthar Lam Um SAC Ralkap Check Gate Cu PDF Nih Drone In Bomb An Thlak Caah Ralkap 3 An Thi, Natogyi-Taungthar lam ah umhmun khuar mi SAC ralkap check gate cu PDF nih drone in bomb an thlak caah ralkap 3 an thi tiah theih a si.

Mandalay ramṭhen, Natogyi-Taungthar motor lam um SAC ralkap check gate nih, khualtlawng mi hna cu hranhram in an check hna caah October 19 zanlei sml 3:00 ah drone in bomb kan thlakhnawh hna i SAC ralkap 3 an thi, tiah PDF nih cathanh an chuah.

Natogyi-Taungthar motor lam um Shwe Gyia In(ရွှေကြာအင်) khua phungki sianginn ah SAC ralkap cu umhmun an khuar i, khualtlawng mi cu checkhkatnak an tuah hna caah SAC ralkap check gate le sentari an cawnghnak inn cu PDF nih drone in bomb an thlak hi a si tiah theih a si.

Ramhnihnak A Phanmi Myanmar Rammi Hna Cu Myanmar Ram Kuat Ṭhan Lo Dingin UNHCR Nih A Nawl Hna, Myanmar ram in ramhnihnak ah a kalmi hna cu, SAC kuttang ah kuat ṭhan lo ding in tuanvo ngeitu cozah sinah rianrang ngaiin UNHCR nih nawlnak a tuah hna, tiah theih a si. An nun a himnak ding ca ah SAC kuttang in ramhnihnak ah a kalmi Myanmar rammi hna cu hranhram in SAC kuttang ah kuat ṭhan lo ding in ramkip cozah sinah UNHCR nih nawlnak a tuah hi a si.

Myanmar ram he innpa a simi ram kip ah, ralzam dirhmun in um khawhnak a sokmi Myanmar rammi hna cu, SAC kuttang ah an kuat ṭhan hna ti thawng kan theih caah nawlnak kan tuah hna hi a si, tiah UNHCR nih an langhter. Myanmar ram in ramhnihnak ah a kalmi hna cu ralzam sinak le i dornak an pek hna awk a si. Hranhram in Myanmar ram ah an kuat hna awk a si lo. Hranhram in Myanmar ram ah kuat ṭhan zong hi vawleicung ramkip zulh ding upadi he aa kalhmi a si, tiah UNHCR nih cun an langhter.

Malaysia-Myanmar ramhnih hnatlaknak in Myanmar rammi 150 cu a luancia October 6 lioah Myanmar ram ah an rak kuat ṭhan cang hna. Cu chungah CDM ti ralkap ralbawi 6 zong an i tel, tiah theih a si. CDM ti ralkap ralbawi 6 cu Malaysia ram um UNHCR zung ah ralzam sinak in ramchung umkhawhnak dingah a sokmi an si, tiah theih a si.

Manyu Gyi(မံယူးကြီး) Khua Sii-inn Hunnak An Tuah Lioah SAC Ralkap Nih Jet Fighter In An Kah Caah Nu Pakhat A Nunnak A Liam, Ngakchia 6 Hliamhma Fak An Pu, Sagaing ramṭhen, Banmauk peng Manyu Gyi khua sii-inn an hun lioah SAC ralkap nih, Jet Fighter in bomb an thlak caah nu pakhat a nunnak a liam i, ngakchia 6 hliamhma fak ngai an pu, tiah theih a si.

Nizan October 20 zanlei sml 4:20 ah SAC ralkap nih kahdohnak zeihmanh um loin bomb an thlak caah Manyu Gyi khua sii-inn hunnak ah a kalmi khuami Khin Mar Cho (kum 43) cu a hmun ah a nunnak liam pinah ngakchia 6 hliamhma fak ngai an pu, tiah theih a si.

“Zeihmanh kahdohnak um loin SAC ralkap nih bomb an thlak caah sii-inn hunnak ah aa kalmi khuami nu pakhat a nunnak a liam pinah ngakchia 6 hliamhma fak ngai an pu. Sii-inn zong a rawk dih. Sii-inn pawng ah a ummi inn 5 zong a kaang,” tiah Indaw Revolution – IR in ṭuanvo ngeitu pakhat nih a chim.

Hliamhma pumi ngakchia hi kum 14 le 15 tluk an si, cu pinah hliamhma pumi zong an tam ngaingai. Cheukhat cu an pumpaluk in bomb pelpawi nih a khen hna. Manyu Gyi khua sii-inn hi khuami hna nih anmah tein an i sakmi a si i, tiah a chim chap.

Khuami pakhat nih, “Kan khua sii-inn cu kanmah tein onnak kan tuah hnu zanlei zml 4:20 ah SAC ralkap Jet Fighter 2 nih bomb an thlak. Nu pakhat Khin Mar Chu cu a lu ah a khen caah a nunnak a liam colh. Kan sii-inn zong a rawk dih,” tiah a chim. Manyu Gyi khua sii-inn cu khuami nih anmah thazaang in kum 10 chung an sakmi a si i, sii-inn onnak an tuah lioah SAC ralkap Jet Fighter 2 nih bomb an thlakhnawh hna hi a si.

Walet Peng Ywataw(ရွာတော်) Khua Cu SAC Ralkap Nih An Khangh Caah 120 A Ciam, Tualchung Mi 4 Thah An Tong, Sagaing ramṭhen, Walet peng Ywataw khua cu SAC ralkap nih an khangh caah inn 120 a ciam i, tualchung mi 4 an thah hna, tiah theih a si.

October 19 zinglei ah Walet peng Ywataw khua ah SAC ralkap 30 hrawng an lut i, inn an khangh caah inn 120 a ciam. Khuami caw 6 le meheh 2 an thah hna. Walet peng hrambunh Bah Kah Tah zung zong SAC ralkap nih an khangh pinah computet 2, color printer 1 zong an hrawh. Kyats sing 17 man hrawng a ciam dih, tiah theih a si.

SAC ralkap cu Ywataw khua an luh lioah khuami 3 zong an thah hna, mizeidah an si ti fiang in hngalh a si rih lo. Ywataw khua in SAC ralkap pawl cu zanlei sml 3:00 hrawngah Magyi Tungpin(မကျီးသုံးပင်) khua lei ah an lan i, Htanaung Kaing(ထနောင်းကိုင်း) khuami Naing Ko zong an thah, tiah theih a si.

Nyaunglaypin Khuabawipa Meithal In An Kah I A Thi, Pago ramṭhen, Nyaunglaypin peng Gyawngta(ဂျောင်းတာ) khua khuabawipa cu, October 20 ah an kah i a thi, tiah theih a si. Nizan October 2:30 hrawngah Inn Wai khua pawngah rian herh a kal i a tlun lei ah Gyawngta khuabawipa Ne Win cu Kyaukgyi Guerrilla phu nih an kah hi a si, tiah Pago PDF in ṭuanvo ngeitu nih a chim.

“Zung rian herh in a kal i a si men lai, a biapi mi catlap zong tampi aa ken. Khuabawipa Ne Win nih tualchung mi hna harnak a pek lengmang hna caah kan thah mi a si, a fimhlawmtu Guerrilla phu zong khua leng ah an chuak kho cang,” tiah a chim chap.

Khuabawipa thah a ton hnu in SAC ralkap an phan i, a thihnak pawngkam hrawng cu checkhlatnak an tuah i, a ruak zong an kalpi, tiah theih a si. Kyaukgyi Guerrilla phu in bawino Meikkhe(မိုက်ခဲ) le a ralkap hna nih khuabawipa Ne Win sinah kutkhihnak cincik tuah khat, zung catlap, zung seal, register telh in thil cheukhat an lak tiah theih a si.

UK Prime Minister Liz Truss Nih A Rian A Dinh Taak Lai, UK ram Prime Minister a tuan cuahmah mi Liz Truss nih a rian ka chuah taak cang lai tiah thanhnak a tuah tiah theih a si. Siangpahrang sin zongah a rian ai dinhnak ding kong ka chimhchawnh dih cang, ka rian tlamtling dingin kai zumh ti lo caah ka rian ka chuah taak hi a si tiah a langhter.

“Chawleh chawhrawnak a tlamtlin lo lio le vawlei cung ramkip a buai lio saingah hi rian hi kai khinh mi a si, hi rian lian a ka khinh mi Conservative Party nih pek mi rian tlamtlinh dingah keimah le keimah zumhnak ka ngeih ti lo caah rian dinh ding ka chimnak a si” tiah PM Liz Truss nih a chim tiah theih a si. Amah rian a chawngtu dingmi Prime Minister ai thim hlan tiang rian ka tuan rih ko lai tiah a chim chih tiah theih a si. Crd-The Chin Post