Breaking News; Hakha Rungtlang Ralkap Pakhat Hriamnam He A Zam!

Hakha Rungtlang LIB-266 ralkap sergeant pakhat hriamnam he PDF-Tamu sin ah aa dor
===============
Hakha hrambunh LIB-266 ralhraang Battation nih Sagaing ramthen, Tamu ah an chiah mi Outpost sakhan in Sergeant Cazi pakhat cu hriamnam he Tamu PDF Battalion No. 1 ah aa dor tiah theih a si.

“Sergeant pa cu September 18 ah kan sin a phan cang. Himnak ruah ah atu lawng ah thawng kan thanhnak a si. Amah he aa tlak mi tangka laksawng kan pek hnu ah a himnak hmun ah kan kuat cang. Hi hnu ah CDM a rak lut ding mi rammi ralkap pawl zong lunglawm tein kan in don hna ti chim ka duh,” tiah PDF-Tamu, Battalion No. 1 in Bo Ba Hman nih Mizzima ah a chim.

Sergeant pa min cu Khaw Ka Ling (Kawl ca in tial mi Laica in tial than a si ca ah cafang fonh a palh kho) a si i ralkap a tuannak kum li a si cang. Hakha hrambunh LIB-266 battalion in a si i A voi 18nak Sergeant Clerk training a kai mi a si. MA-3 meithal zun khat, zenthong zeimaw zat, kut cheh bomb pakhat a rak i put i PDF-Tamu, Battalion No. 1 ah a rak ap.

“Pumpak hlawknak ca ah ram uknak a chuttu hna kuttang ah riantuan ti lo in, rammi nih dawt mi ralkap si ding ah rammi lei ah raltha tein CDM rak tuah ding in forhfialnak tuah ka duh,” tiah Sergeant Khaw Ka Ling nih a chim.
Rammi an thah hna i ralkap kan luh ka i an kan cawnpiak mi pawl he an tuahsernak aa kalh tuk, rammi huat mi minung si ka duh lo ca ah CDM ka tuahnak a si tiah a chim.

Ralkap nih uknak hraamhraam in an lak hnu in Tamu peng chung ah CDM a tuah mi ralkap 14 le palek 35 an si cang tiah Pyithu Yinkhwin Program hruaitu pakhat cazin ning in theih a si.

Khayan peng check gate pakhat ah bomb a puak i Council ralkap pakhat le palek pakhat an thi. Yangon ramthen Khayan peng Depouk lamton check gate ah puahkehnak a chuak i ralhraang pakhat le palek pakhat an thi, hluamtuar pahnih an um tiah mit hmu tu nih an chim.

Puahkehnak a chauh hi zing suimilam 7:40 hrawng ah a si i ralhraang pakhat le palek pakhat hliamtuar an um tiah kan theih. “Hliamtuar pahnih hna hi an ke tan hau dirhmun an si” tiah khuami nih an chim.

Mah check gate ahhin aa chawklet mi poh hngalhpinak ca (Thohkhansa) an hal hna. Cun an check hna ning a fah deuh caah Bomb pahnih in kan puah nak a si tiah Khayan PDF chungtel pakhat nih Mizzima ah a chim.

Pulaw peng, Mihkyaung Thike khua pawng ah PDF nih ralhraang methal zun riat le Pyu Saw Htee pathum an tlaih hna. Tanintharyi ramthen, Pulaw peng Mihkyaung Thike khuate pawng ah Tualchung PDF phu komh le Council ralhraang hna cu October 21 in 24 tiang ni li chung an i kah hnu ah, October 26 ah PDF nih hmunhma thianhnak an tuah i ralhraang meithal zun riat, zenthong pawl, tangka tlawmpal le ralhraang sal Pyu Saw Htee pathum a nung in an tlaih hna tiah theih a si.

Mihkyaung Thike khuate pawng ah ralhraang LIB-285 Battalion le tualchung PDF phu a si mi Pulaw PDF, LPDF, PRPDF komh phu an i kap. An i kah hnu hmunhma thianhnak an tuah lio ah meithal zun riat, Council ralhraang uniform pawl, tangka, zenthong le Pyu Saw Htee (Pyithusit) pathum kan tlaih hna tiah Pulaw PDF nih an thanh.

Ni li chung ral an i dohnak ah ralhraang lei in Officer pakhat tel in paruk an thi i 20 leng hma an pu tiah Pulaw PDF nih an langhter. Credit: The Hakha Post