Hakha Mizapi Nih Umkal Le Ṭhutdir I Ralrin Ding in Hakha Circle Council Nih Ralrin Pek!
========
Chin ramkulh khuapi Hakha um mizapi nih umkal le ṭhutdir i ralrin ding in Hakha Circle Council nih nihin May 25 ah ralrin peknak an tuah. Kum 2023 hnu in thla nga chung ah Hakha khuachung le a kiangkap ah ralhrang nih bomb tunh (landmine) mi in mizapi nih hliamhma fak kan ton a tam. Cu ruangah hriamnam le ralhrang kut in kan him khawh nakhnga ralrin a hau tiin Hakha Circle Council nih ralrin peknak an tuah.
Hakha cu ralhrang zong an tamnak a si rih bantukin ralhrang um hmun khuarnak pawng le a kiangkap ramlak ah siseh, ralhrang nih an palnak le an vahnak ramlak hna ah bomb (landmine) an tunh khawh mi a si caah mizapi nih hrial ding in ralrinnak thawng kan in thanh hna, tiah an langhter.
A luancia ninga hnu in Hakha khuachung ah khualcazin check, aa chawklet mi hnahnawh in phone check, cycle check le mizapi harnak a phunphun pek in ralhrang an hrang ngaingai. Cucaah mizapi nih kan umkal ṭhutdirnak kong ah ralring deuh in kan cawlcangh cio naklai thawng kan in thanh ṭhan ko hna, tiah an langhter chih.
Hakha Ah Bomb Puahnak In Minung 5 Hliam An Tuar, 1 Nunnak Liam! Chin ramkulh, Hakha khuapi ah bomb hmanhmi i lamhsualnak in minung 5 hliamhma an pu i, 1 a nunnak a liam, tiah theih a si.
May 24 ah meheh rawl kawl ding in aa thawhmi Pu Chan Kian cu meheh rawl a kawlnak in a ṭin ti lo caah a chungkhat nih nihin May 25 zinglei ah an va kawl i cu an va kawlnak ah cun Pu Chan Kian a tupa nih bomb aa lamh sual caah minung 5 hliamhma an pu, tiah tualchung mi pakhat nih The Chin Post ah a chim.
Pu Chan Kian chungkhar he naihniam in a ummi pakhat nih, “Pu Chan Kian cu Meheh rawl kawl ding in aa thawh i bomb aa lamhsual ruangah ka bawm u tiin a authawng zong a theimi an um. Nihin May 25 ah a ruak va kawl dingin Pu Chan Kian a chungkhat minung 7 hrawng cu an kal i, Chin ramkulh Ministers hna umnak inn lei kap ah bomb nih a puah hna caah minung 5 hliamhma an pu,” tiah a chim.
Hliamhma pumi hna cu pa 4 le nu 1 an si i, Hakha sii-inn ah an tlikpi hna. Pu Chan Kian tupa hi a orhlei ke a bul. A dang hi an ke, an baan le an ṭaang ti bantuk ah bomb pelpawi nih a peh hna, tiah theih.
SAC Ralkap Vanlawng Nih Thantlang Ah Bomb A Thlak; Kahdohnak zeihmanh um loin Thantlang ah nihin May 25 chun suimilam 12:00 hrawng ah SAC Fighter pakhat nih bomb a thlak, tiah theih a si.
Thantlang, CB bank ah nihin chun suimilam 12:00 hrawng ah bomb a thlak nain Thantlang lei ummi Chin ralkap an him dih, tiah theih a si.
Karenni Ramkulh, Demoso Peng Ni 10 Chung Kahdohnak Ah SAC Ralkap 40 Hrawng An Thi; Karenni ramkulh, Demoso peng ah a luancia May 14 in May 23 tiang kahdohnak a chuak i, SAC ralkap 40 hrawng an thi. KNDF le ṭangṭi phu lei in ralkap 8 nih ram le miphun ca ah an nunnak an pek ve, tiah theih a si.
Karenni ramkulh, Demoso peng nichuahlei Dawliakhu le Tanilarlay tlangcung kahdohnak ah SAC ralkap Captain 1 le ralbawi bo hnih 2 tel in ralkap 40 hrawng an thi i, ralbawi telh in hliamhma pu mi zong an tam, tiah KNDF nih cathanh an chuah. Tanilarlay khua tlangcung in Dawliakhu khua tlang lei ah rallam a sialmi SAC ralkap le KNDF cu May 14 thawk in May 23 tiang an fak ngai in an i kap, tiah theih a si.
Cu kahdohnak ah cun Loikaw um Ngwetaung le Hprosu hrambunh SAC ralkap hna nih nifatin ti awk in hriamngan he an bawmh hna pinah Fighter in voi 60 nak tlawm lo bomb a thlak, tiah theih a si. Ni 10 chung kahdohnak ah KNDF lei nih hriamnam zeizawzat an lak pinah ralkap hmanmi thilri tampi an laak i, SAC ralkap 2 an tlaih hna, tiah theih a si. Credite; The Chin Post