Breaking News; Hakha mipi vialte rak i ralring uh!!

Hakha, Ralring tein mu…
=====================
Pa Tawi te nih a zarhzarh in mei an in hmihpiak/hmihkanh hna. Khikhi mei lam/hri a rawh/rawk ruang ah a si kho ko. Asinain, thil pakhatkhat tuah an duh ruang ah a si khawh zong kha philh bak hlah usih—cucu an zia le an keel a si.

Nu tlaihhrem, thil fir le ramh (ramh cu damiah taih) in caantha an laak tawn kha ciing ulaw, Crd-Salai KB Thawng Hakha le Falam khuachung cu mei a ratlonak zarh thum hrawng a si cang. Mei remh ding ah Mandalay in Engineer minung(17) Kalay anphan cang i Company riantuan tu hna nih an remh khawh ah cun Sikpar(Nov) 15 hlan ah electric mei a ngah lai tiah theih a si. Mei remhnak ah aherhmi hna cu tung a rawhnak hmun an phan dih cang tiah theih a si. Ref: Zalen

Chin ramkulh, Hakha Cawbuk sang check gate hngak SAC ralkap nih khualtlawng mi hna cu an dirter hna i, anmah an phone battery an tun hnuah an kalter hna, tiah theih a si. Khualtlawng mi pakhat nih, “Ka pi a dam lo ruangah Hakha ah kan kalpi i cawbuk check gate kan phak ah ralkap nih sentari an cawnghnak buk tiang rak kai u an kan ti caah kan kai, sau nawn an kan hren hnuah kan lan kho ṭhan,” tiah a chim.

“Kan phone an kan check hnuah khoika in dah nan rat tiah an kan hal. Nan cycle ah ah kan phone battery kan i tun ta lai an kan ti i, an i tun ko. Minutes 15-20 chung hrawng an i tun hnuah kal cang ko u an kan ti i an kan thlah,” tiah khualtlawng mi pakhat nih The Chin Post ah a chim. Hakha mei a rawh ruang ah a si lai, ralkap zong phone battery an ngei ve lo, an van a sang ngaingai. Ka pi dam lo ruangah hnawhnam ngai in Hakha kan kalpi i, atu bantukin harnak an kan pek i kan cycle ah an phone battery an i tunmi hi cu a poi ngaingai ko, tiah a chim chap.

Cun Cawbuk check gate hngak SAC ralkap le palik nih khualtlawng mi cheukhat cu zu cawkpiak ding in Hakha lei ah an kirter tawn hna, tiah theih a si. Zu cawkter a tongmi pakhat nih, “Khua lei kal ding in kai thawh i check gate hngak ralkap nih zu cawkpiak ding in zu dawr ah an ka kalter caah ka khuallam zong kai i tinh ning in ka phan kho ti lo. Ka cawkmi zu zong ding ve an kan ti ko nain ka duh lo,” tiah tiah The Chin Post ah a chim.

Chin ramkulh, Hakha ah mei a rawknak ni 13 a si cang i, meilul (pha zawng dan) le meihol a dih cang, tiah theih a si. Hakha dawr kip ah meilul kan kawl i cawk awk a um ti lo, an rak cawk dih cang. Hakha dawr ngan bik Pearl Store zong ah a um ti lo. A man zong a kai ngaingai i minung pakhat nih voikhat cawk ah bawm tam pipi in an cawk, tiah theih a si.

Mei hi caan sau nawn a rawk rih kho menmi a si tiah thawngpang a len caah cheukhat cu solar le battery an i cawk cio hna. Mi sifak deuh nih meilul bawm khat hnih te kan i cawk i, cu hmanh cu a dih cang. Meihol cawknak chinchin cu a har ngaingai ko, tiah tualchung mi pakhat nih a chim. Hakha ah Kawl leiin a ra mi meihol tunkhat ah kyats 15,000 le Lai meihol a tlawm bik kyats 18,000 a phan nain cawk ding a um ti lo. Meilul hi bawm khat ah kyats 1,500 in 2,000 kar a phan, tiah theih a si.

RELCHAP, Mandalay Ramṭhen Natogyi Peng Ah Mi Ruak 4 An Char, Mandalay ramṭhen, Natogyi peng Yedeih khua le Htantaw(ထန်းတော) khua kalnak lam cungah nizan November 4 ah mi ruak 4 kan char, tiah tualchung mi hna nih an chim tiah theih a si.

Ruak pathum chungah pa pahnih le nu pakhat hi an lu ah meithal in an kahnak hmuh khawh a si, tiah mi bawmchantu pakhat nih a chim. Ruak pathum charnak kong he pehtlai in Natogyi peng palik he naihniam in a ummi pakhat nih, “No. 8 sang um Than Myint Shwe(kum 59), no. 7 sang um Aye Myat Mon(kum 42) le min hngalh lomi kum 25 tluk pa pakhat an si,” tiah a chim.

Cu pinah nihin November 5 zinglei ah Natogyi peng Letpan khua le Zagyian( ဇဂျမ်း) khua kar lam kam ah mi ruak pakhat kan char ṭhan, anih hi Natogyi peng Suphyu khuami Saw Shwe(kum 55) a si, tiah tualchung mi pakhat nih a chim.
A luancia October thla lio zong ah Mandalay ramṭhen, Wundwin, Sinku, Myingyan le Myothar khua hna telh in peng 8 chungah thah a tongmi hi minung nak tlawm lo an si cang, tiah theih a si.

North Korea Nih Ramri Ah Vanlawng 180 A Zuanter Caah South Korea Nih A Lehrulh Ve, N. Korea nih S. Korea ramri ah raltuknak vanlawng 180 a zuanter caah lakhruak in raltuknak Jet Fighter kan zuanter ve, tiah S. Korea nih an langhter.

Nizan November 4 ah N. Korea nih S. Korea he ramri pawngah raltuknak vanlawng 180 cu a ṭhen ṭhen in a zuanter hna. Hiti an zuanternak a ruang hi American le S. Korea cu Korea tikulh pawngah raltuk an cawnṭi ruangah atu bantukin N. Korea nih vanlawng a zuanternak a si, tiah theih a si.

Vanlawng an zuanter hlan zong ah N. Korea nih hriamngan lung 80 tluk an kah i, cu chungah lamhlat kahnak missile bomb lung khat cu a tlolh, tiah theih a si. N. Korea nih miissile a kah pinah raltuknak vanlawng 180 cu ramri ah a zuanter caah S. Korea nih raltuknak vanlawng F-35 telh in Jet Fighter 80 cu ramri ah a thlah ve, tiah theih a si.

A luancia October thla lio zong ah N. Korea nih raltuknak vanlawng 10 cu ramri ah a rak zuanter caah S. Korea nih a raltuknak vanlawng a rak zuanter colh bal ve tiah theih a si.

US President Thimnak Ah I Tel Than Ding In Trump Nih Thanh A Timh! 2024 US President thimnak ah President hlun Trump cu thimnak ah cuh than a timhnak kong phungning tein thanh a timh, tiah thawngzamh cheukhat nih an tarlangh tiah theih a si.

Trump nih White House ah rak kir kho than ding in ka zuam lai, tiah a chim hnu in hi thawng hi a thangmi a si. Kan ram ahim khawhnak ding le kan ram hlawhtlin khawhnak ding ah a tu voikhat ka zuam than lai, tiah kan hnu zarh nili ni ah a dirkamhtu mipi he biaruahnak ah Trump nih cun a chim. Trump nih President thimnak ah cuh than a timhnak kong cu phungning tein Trump Campaign Department nih November 14 hlan ah an thanh khawh tiah, CNN, NewYork Time hna nih cun an tial.

Thailand Ram Ah A Lutmi Myanmar Rammi 23 Tlaih An Tong, Thailand ram Yanaung pengkomh le Kanchanaburi pengkomh ah phung ning loin a lutmi Myanmar rammi 23 le ngakchia 3 cu October 3 ah kan tlaih hna, tiah Thailand nawlngeitu hna nih an langhter tiah theih a si. Yanaung pengkomh Soomsaram hmunram ummi No. 25 ke ralkap nih ral an ven lioah khairiat puan in khuhmi motor pakhat cu kan lunghrinh caah checkhlatnak tuah ding in kan dirter ko nain a zam, tiah an langhter.

Motor chungah ngakchia 3, pa 8 le nu 3 kan tlaih hna. Annih hi KawTaung in Thailand ram ah a lutmi an si, tiah an langhter. Tlaih a tongmi hna hi Thailand ram le Malaysia ram ah rianṭuan ding in a kalmi an si i, nawlngeitu hna nih upadi ning in taza an cuai hna lai, tiah theih a si. October thla chungah Thailand le Malaysia ram chungah Myanmar tammi 2,000 leng tlaih an tong cang tiah theih a si.

Falam Nih Ti An Laknak Pipe A Kuai Caah Falam Khua Chung Cheukhat Ah Ti An Har, A luancia November 1 zanlei in Laiva tidil ah ti an laknak pipe in ti a zuh caah Falam khua chung cheukhat ah ti an har ngaingai, tiah theih a si.
November 3 in Laiva tidil ti an laknak pipe cu Falam sipin nih remh hram an thok cang. Ti an laknak hi Falam khua in meng 19 a hlatnak Tlangzar khua pawng ah a si i hmun pakhat ah ti pipe a kuai i, pe 15 a thuhnak ah seh in an hlai i an remh cuahmah, tiah theih a si.

Falam khuami pakhat nih, “Falam khua chung sang tam deuh nih Laiva ti hi kan tohmi a si, atu hi ti vate in a luangmi ti kan hman pah khawh rih hna caah tlam a tling deuh ngaingai nain zarkhat hrawng a rauh rih ahcun kan har ngai cang lai, ti cawk a hau mi dirhmun kan phan lai,” tiah a chim. Laiva tidil ti a lak mi a hmangtu hi Falam khua chungah inn 2,000 leng an si, tiah theih a si. Crd-The Chin Post

Video Zohnak-