Hakha Khua Chungah Puahkehnak a chuak tiah theih a si
==================
Nihin May 6 zan suimilam 7:08pm ah Hakha khua chungah puahkehnak a chuak tiah theih a si. Viewpoint pawng hrawng in meithal thawng a thang. Mi chawkvai maw an kah hna asilole tlerhnak ah meithal an thlahmi a si ti cu hngalh a si lo. View Point inn an saknak zawn in meithal kuan a ceu ko, tiah tualchung mi pakhat nih The Chin Post ah a chim.
SAC Nih Rakhine Ramkhel Party 4 Cu Register Tuahnak Nawl An Onh Ṭhan Hna; AFP party telh in ramkhel party 4 cu Union Election Commission nih ramkhel party sinak register tuahnak nawl an onh hna, tiah theih a si. AFP, RSNUP, Myo party le Khami party cu UEC nih March thla chungah register tuah ṭhan khawh dingin an onh hna, tiah theih a si.
SAC kuttang UEC sinah ramkhel party si khawhnak caah register a tuahtu hi Rakhine kulh in party 6 an si i, cu chungah ANP le Myo party cu UEC nih register tuah dingin nawl an pe rih hna lo, tiah theih a si. “SAC sinah ramkhel party sinak register a tuah dingin a soktu hna cu chekhlatnak an tuah cuahmah hna. Register an tuahter hna lai maw tuahter hna lai lo ti cu SAC nih an lungtlingmi an hmuh hna ahcun UEC nih an cohlan ko lai,” tiah Rakhine ramkhel thiamsang pakhat nih a chim.
UEC sinah ramkhel party 60 leng cu register an rak tuah i NLD telh in party 40 cu March 28 ah UEC nih an rak hrawh, tiah theih a si. Min Aung Hlaing nih Myanmar ram hi zei a can lai a fian lo caah ram pumpi thimnak tuah ding hi a har ngai rih, tiah a chim.
Thabeikkyin Peng Khuate A Khangtu SAC Ralkap Kahdohnak Ah Ralkap 10 An Thi; Mandalay ramṭhen, Thabeikkyin peng khuate a khang i thilri a firtu SAC ralkap cu PDF ṭangṭi phu nih kan kah hna caah ralkap 10 an thi, tiah Taw Sin Yaing Guerrilla phu in ṭuanvo ngeitu pakhat nih a chim.
SAC ralkap 60 tluk nih May 5 zing suimilam 8:30 ah Latpankone khua le Sutaw khua an khangh caah Sutaw khua inn 15 a ciam. Cu pinah khuami an thilri mansung an firpiak hna lioah Thabeikkyin peng PDF hna nih an va kah hna i ralkap 10 an thi, 20 hliamhma an pu, tiah theih a si. “Kan va kah hna caah ralkap 10 tluk an thi i, 20 hliamhma an pu. Cu chungah kut ke a bulmi an tam,” tiah Taw Sin Yaing Guerrilla in ṭuanvo ngeitu pakhat nih a chim.
Kahdohnak a daih hnuah Takaung khua in mizaw phorhnak leilawng 3 nih ralkap ruak cu an va lak hna i, Takaung thlan hmun ah an vui hna. Cu kahdohnak ah Thabeikkyin Pah Kah Phah, Taw Sin Yaing Guerrilla le Takaung Pah Kah Phah hna i bawm in an kah hna, tiah Khit Thit Media nih a ṭial.
CDF-Matupi Nih Matupi SAC Ralkap Hmunpi An Kah, A Thimi Chungah Col. Soe Min Lat Aa Tel; Chin ramkulh Matupi i SAC ralkap hmunpi (စစ်ဗျူဟာ ဌာနချုပ်စခန်း) cu May 5 zanlei ah CDF-Matupi nih an kah i SAC ralkap 3 an thi. Cu chungah Col. Soe Min Lat aa tel tiah theih a si. Col. Soe Min Lat cu DSA zarh 42 nak in a dihmi a si.
Matupi SAC ralkap hmunpi cu Matupi peng, Matupi-Hakha lampi cungah a ummi a si. CDF-Matupi nih May 5, zanlei suimilam 4 hrawngah an kah i Col. Soe Min Lat telh in Major pakhat le mawtaw mawngtu pakhat an thi tiah CDF-Matupi Battalion 1 in chimnak nawlngeitu nih a chim. Credite; The Chin Post