Breaking News; Hakha ah Ralhrang nih Minung 10 leng an Tlaih hna i Ralkhamnak Phaw (လူသားဒိုင်း) ah an Hman Hna – Update

Hakha ah SAC Ralhrang nih Minung 10 leng an Tlaih hna i Ralkhamnak Phaw (လူသားဒိုင်း) ah an Hman Hna
———–
Nihin chun sml. 2:20 hrawng ah Hakha khua, Ruavazung Workshop ah rian a ttuanmi minung 4 le Rual-U thlanhmun ah thlan a sermi pawl cu SAC ralhrang nih an tlaih hna i Timit lam lei ah ral i khamnak phaw (လူသားဒိုင်း) ah an hman hna, tiah tlaih a tongmi minung pakhat nih The Chin Journal ah a chim.

Rian kan ttuan lio ah an ra i a kan tlaih. Kan kut ah hri in a kan ttem. Kanmah pali le Rual-U thlan a sermi hna he kan si. Hmai ah a kan kalter i, kan hnulei in SAC ralhrang 50 hrawng nih a kan zulh,” tiah a chim. An tlaihmi hna cu kut hrittem buin Timit lam, Chin Dwin Star dawr tiang an kalpi hna. Lampi ah an bawhter hna i an tuk an velh len chap hna.

“Ruahsur lak ah lam cung zong ah a kan bawhter. A velh zong a kan velh. Meithal zong in fak ngaiin a kan tuk. Chin Dwin Star dawr tiang cuticun a kan kalter,” tiah a chim chap. Ralkhamnak phaw ca ah an tlaihmi hna cu nihin zaanlei sml. 5:30 hrawng ah khan an thlah dih tthan hna, tiah thawngpang kan theih.

Hakhathar Khualuhnak Bomb Hmuh Ruang ah Minung 19 an Tlaih Hna. Nizaan October 20 ah Hakhathar khualuhnak motor lamkam ah bomb an hmuh ruang ah SAC ralhrang nih Hakhathar minung 19 an tlaih hna, tiah Hakhathar pastor pakhat sin in thawng kan theih.

Hakhathar khualuhnak i inn a pakhatnak bik Pu Aung Lan-Pu Ral Lan dawrkhaan he aa naihnak hmun ah bomb hmanhmi SAC ralhrang nih an hmuh ruang ah kiangkap a ummi minung 19 cu lunghrinh in an tlaih dih hna hi a si. Hakhathar khuami pakhat nih, “Nizaan zaanlei sml. 5:00 hrawng ah khan palik an ra i micheu an rak tlaih hna. Cun, zaan ah an ra tthan i an rak tlaih chap hna,” tiah a chim.

Tlaihmi minung 19 chung ah minung 6 hi nu an si i, kumtlinglo minung 3 zong an i tel. Cun, Bureau of Special Investigation (စစစ) zung inn a sami Kawlmi pathum zong tlaihmi ah an i tel. Hakhathar pastor pakhat nih, “An tlaihmi hna lak ah kum 16 pahnih le kum 7 ngakchia pakhat an i tel. Kum 16 nute hi cu midamlo ngai a si. Kum 7 ngakchia hi cu tu zing ah an rak thlah tthan cang. Cun, COVID-19 in a zaw ngaimi kum 60 nu upa pakhat le a dang COVID-19 mizaw pa pathum zong an i tel,” tiah a chim.

Pu Aung Lan – Pu Ral Lan te innchung i tangka ting 40, sui tumbul, sui banhrolh le suitthi zong an tlau hna. Atu tiang ah cun kum 7 ngakchiate lawng hi inn ah an ttinter rih. Nutung 5 le midamlo kum 16 nute hi palik sakhaan ah an chiah hna i a dang pa vialte cu Rungtlang ralkap sakhaan ah an kaipi hna, tiah a cunglei pastor nih a chim.

Ramthlo Inn 100 Leng SAC Ralhrang nih an Bauh, Vok/Ar Tampi an Thah. Nizaan October 19 ah Ramthlo khua ah SAC ralhrang pawl an phan i zaan khat an caam chung ah Ramthlo khua inn 100 leng an bauh, tiah khua mino hna nih The Chin Journal ah an chim.

Khua mino pakhat nih, “Kan khua hi inn 160 leng kan si. Atu kan zoh tawk ah inn 100 leng cu an bauhmi kan hmuh. Vok le ar tampi zong an thah. Vok an thahmi pakhat cu an kalpi kho ti lo i, buri in an rawn hnu ah cuticun an kaltak. Innchung thilri zei bantuk pawl dah an fir timi belte cu inn ngeitu pawl an rak tlun cio tik ah kan theih te lai,” tiah a chim.

Atu tiang a zaammi Ramthlo khuami pawl an khua ah an kir rih hna lo. Mino cheukhat lawng khua vehvat ah an vung kal ta. “Ni zeimawzat cu inn kan hlam ngam rih hna lai lo. Atu zong hi khua mino 15 hrawng khua vehvat ah kan vung kal ta bia a si,” tiah mino pakhat nih a chim. SAC ralhrang pawl zaan an riahnak biakinn tu cu an him ko tiah mino nih an chim. Credit: The Chin Journal