Breaking News: Germany Foreign Minister Heiko Maas Nih Kawlram Kongah Ralrin Nak A Thanh Ve Cang

Germany Foreign Minister Heiko Maas Nih Myanmar ramchung Civil War A Chuah Kho Tiah Ralrin A Pek
==================
Ralhrang phu nih thla khat chung kahdohnak kan tuah rih lai lo, kan i din lai, tiah thawng an thanh ko nain, mipi pawl cu ningcang loin an thah peng rih ko hna. Cun, ralkap lei raltuk thiam hlei cawnnak le ral lei kherhlaitnak an tuah thiamthiam ko, tiah thawng theih a si. Ralkap nih uknak an lak hnu ah Myanmar ramchung civil war a chuah kho tiin Germany Foreign Minister Heiko Maas nih ralrin peknak a thanh hi a si.

Myanmar ramchung cu a ra laimi a rauh hlan ah tihnung thil a chuah cang lai. Ralkap nih mipi 500 leng an thah cang hna. Thongtla tampi zong ralhrang phu nih an chuak hna i, a zammi zong an tampi cang, tiah Heiko Maas nih nihin April 4, 2021 ni Funke thawngzamh sinah a chim hi a si. Vawleicung ramkip nih hramhram in uknak a laktu Ralhrang phu hi ruahnak a phunphun in cheu a hau, cu hnu ah Asean ram pawl zong nih ruahnak an pek lai i, ram mipi cungah zawnruahnak le biaruahnak an cohlang kho lai tiah a chim.

Myanmar ramchung ah Democracy a nun khawh lo zongah ramchung civil war a chuah ding le buaibainak fakpi in a chuah dingmi cu zei ram hmanh nih an duh cio lomi a si, tiah Heiko Maas nih a chim fawn. February 1, 2021 thawk in ralhrang phu uknak an lak hnu ah sandahpiahtu pawl cu a phunphun in thahnawnnak an tuah hlei ah a tlawm bik ngakchia 46 telh in mipi 550 leng an thah cang hna tiin AAPP nih an langhter.

Cun, Myanmar ram pumpi chungah minung 2751 an tlaih hna i, minung 126 cu warrant an chuah than, tiah theih a si. Ralhrang phu nih mipi sawhsawh an thah hna lawng si loin tlangcung hriamtlaih phu he zong an i kah tiah an langhter. Tlangcung hriamtlaih phu a simi hna Kachin Independence Army (KIA) le Karen National Union (KNU) he ral dohnak an tuah cuahmah i, vanlawng hmangin an kah hna caah mipi tam tuk an zamh cang, tiah an langhter.

Cu hnu ah Restoration Council of Shan State/ Shan State Army (RCSS/SSA) he zong ral thoh ding hi a nai tuk cang. Chaklei hriamtlaih phu a simi hna Arakan Army, Ta’ang National Liberation Army (TNLA), Myanmar National Democratic Alliance Army (MNDAA) hna zong nih ral dohnak pehzulh in tuah le tuah lo kan ruah lai tiah an chim. Ralhrang phu nih an tuahsernak zong hi ngol dingin an nawl hna.

Kawlram chung ralhrang phu cawlcanghnak cu mipi nih an cohlang kho bak lo caah le Federal Army dirh dingin le mipi nih mah pum venhimnak ding caah nawl peknak zong CRPH nih March 15, 2021 ah thawng an rak thanh. March 31. 2021 ni ah ralhrang phu nih thla khat kahdohnak kan tuah lai lo tiin thawng an thanh ko nain, tlangcung hmun ram chungah ralkap thazang a chap chin lengmang hlei ah Bangladesh rili ah raltuk thiamnak cawn dingin April 4 – 11, 2021 ni tiang an tuah lai, tiah thawngpang theih a si.