Breaking News: Falam khua Ralhrang Ralkap Eidin Zuarmi A Cawtu An Tam!

Falam khua SAC Ralkap Eidin Zuarmi A Cawtu An Tam!
========
Chin ramkulh, Falam khua Hall hmai ah, SAC kuttang um, General Administration le Municipal office zung riantuan tu hna I fonhin, nizaan September 12 zinglei sml 7 in eidin phun 16 an zuar i caan rau lo teah, an zuar khawh dih colh tiah, theih a si.

Sa cu market ah an cawk ko nain an cawknak man fawi deuh in an kan zuarh. Thilman a kai tuk lio ah hi ti bantuk man fawi tein an zuarmi hi cu, mipi hna lung i lawm sehlaw kanmah lei ah i fonh hna seh ti an duh caah man fawi tein an zuarnak hi a si tiah, khuami thil a caw ve mi pakhat nih a chim.

Voksa cuaikhat ah 12000 man kha 9000, in an zuar , arti pum 10 ah 3500 man kha 3000, Khachuan rang cuaikhat 3500 man kha 3000, khachuan sen cuaikhat 3000 man kha 2500 le Kalapee(ကုလားပဲ) cuaikhat 5000 man kha 4000 tiin man fawi tein an zuar tiah, theih a si.

Khuami pakhat nih cun, an zuar lioah cun, SAC nih security an lak piak hna i, SAC ralkap chungkhar hna zong nih an rak cawk ve caah, cawk ding hmanh hi kan i zaa hna lo, zinglei sml 7 in an zuar i sml 8 ah cun a dih colh cang tiah, khuami sinin kan theih. A luancia September 10 lio zongah khan SAC ralkap nih Hakha ah man fawi tein eidin an rak zuar bal cang.

Kan Myanmar Ramchung Ah Mirum Bik Minung pa (10)-2022. 10. Eike Tun – $1.2 million (2021 ah cun 1.2 Billion a ngei), Eike Tun hi Myanmar ram chungah a ngan bik mi Asia Wealth Bank i,managing director le vice chairman in Myamnar mipi nih an theih bik mi a si i Myanmar ram ah minthang cawhlehnak riantuantu minung pakhat a si ve.

9. Khin Shwe – $230 million (2021 ah cun 2.3 billion a ngei), Khin Shwe hi 2011 in 1016 tiangah Yangon ramthen ah Nationalities hluttaw mee kuang no.9 ah hluttaw chungtel in rian a tlai mi chawleh riantuantu mirum le ramkhel tama pakhat a si. Myanmar ram chungah a ngan bikmi riantuannak a si ve mi Zaykabar ah president in rian a tlai mi mirum pakhat zong a si.

8. Wunna Kyawhtin Htay Myint (2021 ah 2.5 cun 2.5 billion a ngei i kum 2022 ah cun 200 million lenghrawng hrang a ngei lai tiah zumh a si.)-Wunna Kyawhtin Htay Myint hi Myanmar ram chungah a biapi bik company a si mi Yuzana Company ah chairman a si i Myeik pengkulh, Pyithu Hluttaw ah Palai in kum 2011 in 2016 tiang rian a tlai mi a si pinah Southern Myanmar United Football Club a ngeitu a si.

7.Ne Win Tun – $320 million (kum2021 ah cun 3 billion a ngei)-Ne Win Tun hi Ruby Dragon Group company ah Chairman a si.

6. Michael Moe Myint (kum 2021 ah cun 3.7 billion a ngei ) – Michael Moe Myint hi Myanmar ram chungah Zinan serchuah riantuannak ah a biapi bik mi company pa 2 a drihtu a si i, chawleh riantuan nak ah mirum pakhat a si ve. Myint & Associates, a service provider le MPRL E&P, gas serchuahnak company an si.

7. Aung Thet Mann – $400 million (kum 2021 ah cun 4.2 billion a ngei) ,Shwe Mann Ko Ko tiin mipi nih theihngalh mi Aung Thet Mann hi Myanmar ramah chawleh riantuantu pakhat a si i, a tu ah a biapi bik Myanmar company a si mi Ayer Shwe Wah ah CEO a si. A pa min ah Shwe Mann a si i, Ralkap Bawi ( general) hlun pakhat zong a si bantuk in Pyithu Hluttaw i Speaker a si pinah Yangon Institute of Economics sianginn in buaih a ngah mi a si.

4. Zaw Zaw – $496 million (kum 2021 ah cun 5 billion a ngei) , Zaw Zaw cu chawleh riantuantu, chawleh chawhrol riantuantu, mi bomchantu pakhat a si pinah Max Myanmar Group of Companies ah hruaitu lutlai president zong a si.

3. Pyi Aung & Nay Aung – $510 million (Kum 2021 ah cun $5 billion leng), Aung Yee Phyo Company cu Myanmar ramah hrambunh a si i thing zuarnak le cinthlak serchuah nak company pakhat zong a si. IGE Group of Companies i Affiliate cu Pyi Aung & Nay Aung nih a ngeih mi a si.

2. Tun Myint Naing – $550 million (kum 2021 ah cun $5.5 billion a ngei) , Steven Law le Lo Ping Zhong tiah mipi nih theih mi Tun Myint Naing cu Mynamr ram chungah chawleh riantiuantu pakhat a si. Myanmar ram chungah a ngan bik mi pakhat a si ve mi riantuannak company a si mi Asia World ah managing director a si. Kawlram chungah ritthaisii leiin a min a lar taktak mi Lo Hsing Han i a fa a si. A nih hi Magway FC a ngeitu a si.

1. Tay Za – $900 million (kum 2021 ah cun $6.8 billion a ngei) , Tay Za cu Myanmar chawleh riantuantu ah mirum bik a si i Htoo Group company ah Chairman a si. A nih hi Than Shwe he aa kom taktak mi le chawlehnak a tuahti mi an si. Forbes Asia i cover ah a lang hmasa mi Myanmar ram chung ah mirum bik a si.

RELCHAP, Sagaing Peng Nyaungpinwon (ညောင်ပင်ဝန်း) Palik Sakhan Drone in Bomb Thlah Hnawh An Tong, Pathum An Thi, Pahnih Hliam An Tuar, Sagaing ramṭhen Sagaing peng Nyaungpinwon khua palik sakhan cu tualchung hriamtlaiphu hna nih drone in bomb an thlak hnawh hna i sakhan hmai thingkung tang i aa dormi SAC ralkap pakhat le palik 2 nih hliam an tuar tiah kan theih.

Hliamtuarmi hna Sii-inn kalpi dingin mawtaw cungah an hawi le palik 2 nih an khin hna lio ah bomb puah hnawh an tongṭhan i hliamtuar ṭhingmi SAC ralkap pakhat le palik 2 cu a hmunah an thi i sii-inn kalpi dingin a bawmtu palik 2 zong hliam an tuar ve tiah tualchung hriamtlaiphu pakhat si mi Knight Commanders in BeThanKyi (ဘယ်သန်ကြီး) nih a chim.

Nyaungpinwon palik sakhan ah hin SAC ralkap le palik 20 hrawng an um i khua luhchuahnak in mipi khualtlawngmi hna cu phaisa an hal tawn hna tiah tualchungmi hna sin in theih a si. Tutan kahdohnak cu Knight Commanders , Black Dragon (Special Tesk Force) le tualchung PDF phufonh hna i bawm in an tuahmi si tiah theih a si.

Takaung peng ah SAC ralkap motor 2 bomb puahhnawh in doh an tong, pahnih an thi, Mandalay ramṭhen, Takaung(တကောင်း) peng ah SAC ralkap motor 2 cu bomb puahhnawh le kahdoh an ton caah SAC ralkap 2 an thi tiah Takaung PDF nih an chim.

“Takaung in SAC ralkap motor pakhat in ralkap 10 hrawng le hriamthil a phortu motor pakhat cu September 11 chun suimilam 12:30 hrawngah Takaung in meng 4 hrawng ai hlatnak SinHngiatkone (ဆင်ညှပ်ကုန်း) khua luhnak ah pa-de-ta bomb lung 6 an hmanh mi in kan doh hna tiah” Takaung PDF lei nih an chim.

Bomb cu timhcia tein hmanh a si, kan hmanhnak hmun SAC ralkap motor 2 an phak lio belte ah an kar ah tualchung mi nih an i citmi motor pakhat karlak thlak in a kal caah, motor pakhat lawng bomb kan puahhnawh khawh hna, cu caah SAC ralkap lei a thimi le hlianhma tuar an tlawmnak hi a si tiah tuanvo ngeitu nih an chim chap.

Mizapi nih SAC ralkap hna he neihniam in um le, an motor he neih tein kal tibantuk tuahlo dingin le tualchung hriamtlai phu hna nih cathanh chuahmi zulhawk thil hna kha felfai tein zulhding, rikhiahmi caan a lonh hnu ah motor lampi hman tibantuk tuahlo ding in theihternak an langhter chih.

Rakhine ramkulh chung kahdohnak ruangah Maungdaw khuachung ah ralzaam 800 leng an karh, Rakhine ramkulh, Maungdaw peng chaklei ah SAC ralkap le AA kar kahdohnak a fah caah, tualchung mipi 800 renglo cu Maungdaw khuachung ah an i dor tiah mi bawmchantu phu hna nih media ah an chim. Hkamaungsait(ခမောင်းဆိပ်), Yanaungpin(ရန်အောင်ပြင်), Mitait(မီးတိုက်) telh in khua 10 leng in khuami hna cu ralzaam dirhmun an phan i, Maungdaw khuachung phungki sianginn hna le ralzaam sakhan ah dorter an si tiah an chim chap.

“Tukar hrawng cu SAC ralkap le AA kar i kahdohnak cu a fak ngai, SAC ralkap lei nih hriamngan an hman leng ah raltuknak vanlawng hmang in kahdohnak an tuah caah atu bantuk ralzaam dirhmun kan phanh hi a si” tiah tualchung mi pakhat nih a chim.

“A liamcia thla chung ah khan a zaam mi cu an um pah cang hna, tukar hrawng cu kahdohnak a fak i SAC ralkap nih hriamngan le raltuknak vanlawng hna an hman caah khua kiangkap ah hriamngan an tla, khuachung ah kan um ngam ti lo caah Maungdaw khuachung ah kan i dornak hi a si. Hmundang ah a zaam mi zong an um ṭhiam, Maungdaw khuachung ah ralzaam dirhmun in a ummi 800 renglo kan si cang” tiah a chim chap tiah theih a si.

Maungdaw peng chaklei ah a luancia July 18 thok in SAC ralkap le AA kar fakngai in kahdohnak a chuak. September 10 ah, Maungdaw peng thlanglei ah ummi SAC ralkap khah-mah-yiah 352 sakhan pakhat cu lakpiak an tong i, ralkap 4 le hriamthil tampi kan lakkhawh tiah AA nih cathanh an rak chuah.

Myanmar Ramchung Ah Covid-19 Zawtnak A Karh Than, Myanmar ram chungah Covid-19 zawtnak a thar in a karh ṭhan i nizaan September 11 ni, nikhat chung ah Covid zawtnak minung 189 an hmuh than tiah SAC ralkap kuttang um ngandamnak lei vuanci zung nih a thanh. SAC tangum Ngandamnak lei vuanci zung nih September 11, zaan suimilam 8:00 tiang cathanh an langhter ning ah chekhlatnak tuahmi 9,378 chung ah Covid-19 zawtnak a ngei tiah zawtnak hrik hmuhmi zatuak 2.01 an si tiah an langhter.

Covid -19 zawtnak aa chawnhmi minung 189 chung ah minung 173 hi ramchung in aa chawnhmi an si i, minung 16 hi ramleng in aa chawnhmi an si tiah ngandamnak zunglei nih an thanhmi ah cun an langhter. ” A tutan Covid zawtnak hi, raikhamsii aa chun mi hna cung zongah hmuh a si caah mah tein leng chuahlo in i runven a hau.

Covid zawtnak ruangah nunnak liammi an tlawm tilo caah mah tein i runven a herh. Leng chuahtik zongah mask hruk philhlo ding le, mask aa huplo mi kan hmuh hna zongah mask i huh ding in kan theihter ṭhan hna a hau” tiah Yangon khuachung ummi pakhat nih a chim.

Mipi ngandamnak kong he pehtlai in lakhruak i zohkhenh a herh caan ah, mi bawmchanhnak a tuahtu Yangon um volunteers hna zong nih Covid-19 zawtnak kong he pehtlai in zulhphung hna cu felfai tein mipi lei nih zulh ding ah theihternak an tuah ṭhan.

Myanmar ram pumpi huap Covid-19 zawtnak ai thok kum, 2020 kum in 2022 September tiang ah Covid zawtnak aa chawnhmi 616,663 an si i, minung 19,442 cu Covid zawtnak in an nunnak a liam tiah SAC ralkap kuttang um ngandamnak lei vuanci zung nih an cathanh chuahmi ah an langhter.

CDM ralkap minung 17 cu, Ministry Of Defense nih conglomhnak puai an tuah piak hna! National Unity Government (NUG), Ministry Of Defence, People Defence Force(PDF) nih kahdohnak an tuah kum 1 tlin camtuak lawmhnak ah tiin Gangaw pengkomh No. 3 Bataillon le No. 5 Bataillon in, CDM a tuah i PDF chungah a lutmi SAC ralkap 17 hna cu September 11 ni ah conglomhnak puai a tuahpiak tiah theih a si. Cu puai ah cun, Ministry of defence, vuanci U Ye Mon(ဦးရည်မွန်) nih conglomhnak roca a kuat hna tiah theih a si. Roca an kuatmi hna chung ah a tanglei bantuk in an tial;

CDM tuahmi ralkap le palik vialte nan dihlak upat awk a tlakmi NUG ralkap le palik ah kan in ruah hna. Mipi zawnruahnak le ram dawtnak thinlung he mipi lei ah dirin, SAC ralkap a dohtu nan dihlak upat kan in pek hna. Hi kong hi kan mipi nih an theih ahcun lawmhnak he an khat ve ko lai. SAC ralkap cu kan tei hrimhrim hna lai i, teinak THANTAR he lunglawm tein kan i tong than hna lai tiah an tial.

CDM ralkap hna cu, Gangaw pengkomh No. 3 le No. 5 Bataillon ah kumkhat dengmang ralkap rian a tuan cang mi an si tiah theih a si. Cu puai ah cun, pengkomh tuanvo ngeitu hna, Tat-Yin-Hmu, Duh-Tat-Yin-Hmu, Pah-Khah-Phah, Pah-Ah-Phah hna an i tel i cu hna nih cun, biaherh chimnak an ngeih hnu ah, CDM ralkap hna nih an i kenmi hriamthil peknak, CDM ralkap hna laksawng peknak hna tuah a si dih hnu ah, kan caanhmannak tlamtling tein kan donghter khawh tiah Ministry Of Defense nih cathanh an chuah.