Breaking News; Dr Lian Hmung Sakhong nih Camp Victoria kah an timh nak kongah Min Aung Hlaing lehrulhnak a tuah!!

Dr. Lian Hmung Sakhong Nih CNA/F Headquarters A Simi Camp Victoria Cung Lei In Kahdoh Bomb Thlak An Timhnak Kong He Pehtlai In A Chim Mi!
================================
Dr. Lian Hmung Sakhong nih CNA/F Headquarters a simi Camp Victoria cung lei kahdoh bomb thlak an timhnak kong he pehtlai in “SAC ralhrang lei in an daih khawh ahcun an daih a hau, an ngol a hau, Cun tin in an daih lo, an ngol lo a siahcun kahdohnak fak piin a chuak lai. Camp Victoria cu ral lei target (Kahdohak hmun) a si lo. Mipi vialte an thut- umnak CNA min thut ningin caan karlak dirh mi mipi he pehtlainak, i chawnh biaknak sakhan pakhat a si. SAC ralhrang nih an timhtuah mi Map (hmunhma) le thawngpang pawl zong India cozah kan tuah dih cang” tiah a chim.

Dr Lian Hmung Sakhong, ” CNA/F kan Headquarters a simi Camp Victoria cu SAC ralhrang nih raltuknak vanlawng in bomb an thlak lai timi thawngpang hi a hung lar ngaingai. Cu kong ka chim hlan ah SAC ralhrang ii an sining dirhmun, Kan Chin ramkulh sining dirhmun chim hmasa ka duh. kum 2021 April ni 6-7 thawk in kan Chin ramkulh ah Lai meithal (Tumi meithal) in dohthlennak hram rak thawk a si. Cun Mindat lei zongah SAC ralhrang an rak kai.

Lai meithal (Tumi) meithal, Kutser Chin Rifle in SAC ralhrang cu kan rak kham hna. Cutin kham in Nihin ni tiangah kan Pathian a dawtnak thawngin Kan Chin ramkulh cu a kham kho mi sining dirhmun kan phan (kan Kham khawh). Min Aung Hlaing nih A-Naw-Ya-Tha ral sernak kahdohnak hram a rak thawk kaa ah CNA/F Headquarters a simi Camp Victoria cu ka laak lai, tiah a rak au-khuang.

A tu kum khat a rau cang nain Pathian a dawtnak thawngin CNA/F Headquarters a simi Camp Victoria cu kan kut chungah a um ko. A tu Zeiruangahdah cung lei raltuknak vanlawng hmangin kahdoh dingah timhlamhnak an ngeih timi kan zoh a siahcun SAC ralhrang lei nih kan Chin ramkulh lei ah A-Naw-Ya-Tha ral sernak telin ral ser nak a phunphun in an tuah.

A sinain ral sernak an tuah fatin hlawhtlinnak an hmu lo. Khah-Lah-Yah-203 lei in a zaam mi ralkap pakhat nih a chimphuan ning ahcun Tatyin pakhat ah minung pa zeizatdah an chiah hna timi cu theih dih cio a si cang ko nain, “a tu ah Tayin pakhat ah minung 30 hmanh an um ti lo” tiah a chim. Hi dirhmun in SAC ralhrang nih kan vawlei cu an hmunhim kho ti lo timi cu a fiang tuk mi a si cang.

Vawlei an humhim khawh ti lo caah cung lei ral in mipi vialte kahdoh an kan timh timi hi a pakhat nak bik ah chim ka duh. SAC ralhrang nih CNA/F Headquarters a simi Camp Victoria kahdoh an timh nak kong he pehtlai in an Target (kahdoh an i timh nak hmun) zoh tikah a pakhat nak bik ah Khrihfa kan ” Biakinn” aa tel. A pa 2nak ah Siizung aa tel. A pa 3nak ah Sianginn aa tel.

Cu pawl cu zoh tikah ral sernak, ral tuahnak, ralsiamnak kongkau a si lo. Mipi hna ii dai tein an thut-um khawh nak hmun cu an target (mipi an um nak hmun kah dingin timhtuahnak an ngei). Mipi pawl target in dohral tuah timh cu a um bal lo mi a si. Cucu ral lei in SAC ralhrang nih war crimes (sualnak) an tuah a si.

A pa 2nak in kan zoh tthan a siahcun Camp Victoria timi cu Thein Sein chan lio ii NCA minthut kan tuah hnu, an mah lei le kan mah lei kap hnih in ceihhmaitinak kan ngeih hnu ah kap hnih lungtling tein hun mi sakhan a si. Kan hun thawk in Camp Victoria sakhan cu ral sernak hmun ah hun mi sakhan a si lo. Mipi he pehtlainak caah hun mi sakhan a si. A tu Camp Victoria sakhan a um mi minung 60% cu mipi sawhsawh an si hna.

Then cheuh in a chuak mi IDP pawl an si. Kan cawm mi hna, kan zohkhenh mi hna mipi an si. Ka chim duh mi cu Camp Victoria sakhan a um mi minung 60% cu mipi sawhsawn an si, timi hi a si. Camp Victoria sakhan cu kan hun thawk in ral sernak, ral siamnak sakhan in kan tathmat mi lo (kan ruah mi a si lo). Mipi pehtlainak (chawnh biaknak) ah hun mi a si. Picnic, spots tuah nak hmun bantuk i kan ruah (Picnic spots bantuk in kan tathmat).

Khuai kaa hmun a um mi, zeibantuk minung poah nih training lak a ngah. Khrihfa phu kip in Gospel Team pawl zong rat a ngah. Hlasak a ngan. Concert tuah a ngah. Nuam tein umnak hmun sakhan pakhat a si. Cu ruang ah ral lei in target (kahdohnak timhnak hmun a silo) hmun a si lo. Hi sakhan kan rak thim kaate ah Tio tiva pawngkam ah hram kan rak bunh.

Cu Sakhan varal lei ah tlang a um, cu kaa hmun ah Assam Rifle zong an um. SAC ralhrang nih raltuknak vanlawng in kahdohnak tuah sehlaw India ramri lawnh loin a tuah kho lai lo, timi a fiang. A hram thawk tein timhtuah nak ngeih in kan rak thim mi hmun a si. A tak ah SAC ralhrang nih cung lei in kahdohnak an tuah a siahcun cung lei ral hman khawh lo dingin, Raltulnak vanlawng hman khawh lo dingin, Cung lei in kahdohnak tuah hna hmanhsehlaw India ramri lawnh lo a ngah lo. Cu caah timhlamhnak tha tein ngeih in kan rak tuah mi a si.

SAC ralhrang lei nih a thli tein an tuah mi Map kan zoh a siahcun India ramri lawnh loin kahdohnak an tuah kho lai lo. India ramri an lawnh hrimhrim lai. SAC ralhrang nih an langhter mi Map (hmunhma) thawngpang thil sining pawl cu India cozah sinah kan kuat dih cang. India cozah lei zong nih cung lei ral vennak (Air Space) hmunhim dingin nawl an kan peek cang. SAC ralhrang nih ramdang ramri lawnh loin kahdohnak a tuah khao lo. Cu drihmun a phak tikah SAC ralhrang an thil tuah pawl cu kan tuak tikah mipi kahdoh dingah,

Sual ngeilo mipi kahdoh dingah Ah Nang Pa ah an tuah mi bantukin sualngei mipi bomb thlak dingah timhtuahnak an ngeih mi War Crimes pakhat a si. Cu ruangah SAC ralhrang lei in an dawih khawh ahcun an daih a hau, an ngol a hau, Cun tin in an daih lo, an ngol lo a siahcun kahdohnak fak piin a chuak lai. Camp Victoria cu rel lei target (Kahdohak hmun) a si lo. Mipi vialte an thut- umnak CNA min thut ningin caan karlak dirh mi mipi he pehtlainak, i chawnh biaknak sakhan pakhat a si.” tiah a chim. Note-Chet EXpert ah lak mi a si ii aa tlak ningin ka vun leh tthan.

Matupi Peng Khua Cheukhat Tlawn Khawhnak Ding Theihpinak Le Lungtlinpinak Ca Khuabawi Nih An Ṭial Duh Ti Lo! Chin ramkulh, Matupi pengchung ah a ummi khua cheukhat tlawn duh tikah SAC ralkap kuttang ummi khuabawi nih khualtlawn theihpinak/lungtlinpinak ca an kan ṭialpiak ti lo, tiah tualchung mi an chim.

Khuabawi nih theihpinak ca an chuahpiak duh lo mi khua hna lak ah cun Walipan(ဝလံပီ), Walantae(ဝလံတဲ), Laysin(လေဆင်း), Vankai(ဗန်ကိုင်), Laylui(လေလွီး) le Tishing(တီရှိန့်) khua hna zong an i tel, tiah theih a si. “Matupi khuachung um mipi hna nih khuate lei umkal kan duh ko nain SAC ralkap kuttang um khuabawi nih theihpinak ca an kan ṭialpiak duh lo” tiah an chim. Cuka khuate lei ah kal a duhmi hna cu theihpinak le lungtlinpinak ca kan in ṭialpiak ti hna lai lo tiah phungning tein cathanh chuahmi a um lo nain khuabawi nih ca an ṭialpiak ti hna lo, tiah theih a si.

Atu bantuk in khuabawi nih theihpinak ca an ṭial duhlonak a ruang cu Htaeboi khua i SAC ralkap sakhan um ralkap pawl an riahcaw a cah caah a si kho, tiah an chim. Htaeboi khua SAC ralkap sakhan ah cun khuapi chung in riahcaw a phaklonak a thla reng lo a si cang caah an riahcaw a dih cang tiah thawngpang a leng. Cuka sakhan ah ummi SAC ralkap hna nih cun Htaeboi khua he aa naihnak khua ah riahcaw lak an duh caah atu bantuk in khuate lei tlawnnak theihpinak ca khuabawi nih an ṭial duhlonak a si kho, tiah an chim fawn.

Atu bantuk in khuabawi nih khuate tlun a duh mi hna ca ah theihpinak le lungtlinpinak ca an ṭial lo ruang ah le SAC ralkap sakhan ah riahcaw a dih tiah thawngpang a leng mi ruangah zeitik caan poh ah kahdohnak a chuak kho tiin tualchung mi hna cu thinphang in an um, tiah theih a si.

Pago ramṭhen, Shwe Gin le Kyaukkyi karah SAC ralkap sakhan 3 cu KNLA nih kan kah caah SAC ralkap 11 an thi, hriamnam le meithal kuan tam tuk kan lak, tiah KNU nih cathanh an chuah. KNU, Kawthulay hmunram Nyaunglaypin pengkomh Brigade 3 hmunram KNLA Battalion 7 le 9 hna i bawm in SAC ralkap Battalion 7 Thanseih sakhan, Battalion 9 Bawkahtar(ဘောကထာ) le Tonetakar(တုံးတံတာ) sakhan cu KNLA nih an lak, tiah theih a si.

Cu kahdohnak ah MA meithal zun 8, kuan 3070, 9mm meithal zun 2, 81mm zun 1, 81mm kuan 64, 60mm a saumi sun 1, 60mm a tawmi zun 4, 60mm kuan 113, RPG-7 zun 1, RPG-7 kuan 77, kutcheh bomb lung 28, Short Gun zun 1, Short Gun kuan 88, M14 lamhmi bomb lung 10, hridawh bomb 10, kuanbawm 27 le bomb kawlnak seh 1 cu KNLA nih an lak, tiah theih a si.

SAC ralkap sakhan pathum cu kan lak caah vanlawng in voi 20 hrawng an kan kah caah sakhan chung a ummi hriamnam a dihlak in kan la dih manh lo, tiah KNU nih an langhter. SAC ralkap sakhan pathum cu KNLA nih an lak caah vanlawng hmang in tualchung mi cu voi 10 hrawng timh ciammam in an kah hna caah tualchung mi a thimi le aa hliammi an um le um lo fiang in hngalh a si rih lo. November 12 le 13 ah SAC ralkap nih khuate pathum komh khua 18 cu timh ciammam tein kahdohnak an tuah caah tualchung mi 20,000 leng a himnak hmun ah an zam hna, tiah theih a si.

Yangon Ah Chin Pa Pakhat Cu Taxi Khaltu Nih A Velh Hnu Ah A Phaisa le Thilri A Firpiak! Yangon, Aungmingalar highway gate in Chin pa pakhat nih taxi a hlan i cu taxi khaltu pa nih Chin pa cu a velh hnu ah a phaisa le thilri a firpiak tiah theih a si. Cu phaisa chuh a tongmi Chin pa cu Mindat in ramdang kal ding ah Yangon a phanmi a si.

Taxi khaltu nih a velh i, a phaisa le thilri a chuh hnu ah lamka ah a chiahtak i, Chin pa cu lamkam ah zarhkhat chung a it. Bawmchantu phu nih an hmuh tikah Yangon Chin bawmchantu phu sinah bawmhnak an halpiak i khua ah an kirter ṭhan, tiah theih a si.

CDF-Hualngoram Nih LIANDO Hospital Honnak An Tuah, Chin ramkulh, Hualngoram ah , Hualngoram Peoples Organization CDF-Hualngoram nih tuah mi LIANDO Hospital honnak cu November 12 ah tluang te in an tuah khawh, tiah theih a si. LIANDO Hospital onnak ah hin HPO/CDF-Hualngoram hruaitu hna le Mizoram Lianpui khua in VC, YMA, MHIP, NGOs hruaitu hna nih an telpi hna i hruaitu hna nih biatawi chimnak an ngeih hna pin ah lawmhpinak ah Rs.5000 an pek hna.

LIANDO Hospital honnak a dih hnu in CDF-Hualngoram hriamnam thar a phan mi le mawṭaw thar an ngeih mi Pathian sin pek chanhnak zong an ngeih chih, tiah theih a si. LIANDO Hospital hi CDF-Hualngoram vennak in Ṭio kam ah hon a si i Mizaw ihkhun 8 le Operations khankhat a um, Mizaw zoh man laak a si lai lo. Mizaw a rak i zohtermi hna tu nih mahle sian tawk cio bawm chung ah chiah khawh a si. LIANDO Hospital hi Hualngoram mipi ca lawng siloin Mizoram lei mipi hna ca zong ah santlai ngai mi a si, tiah CDF-Hualngoram hruaitu pakhat nih cun a chim.

Kyaikmaraw Chaunghnakhua sakhaan cu KNLA le Red Dragon phu nih an kah, palek 4 le hriam an lak khawh, Mon ram, Kyaikmaraw peng, Chaunghnakhua palek sakhaan cu KNLA le Red Dragon phufonh nih an kah hna i palek 4 a nung in an tlaih hna, hriam zuun 7 le adang thilri pawl an lak khawh tiah Red Dragon phu nih a thanh.

Kyaikmaraw peng, Chuanghnakhua palek sakhaan cu KNLA phufonh le Red Dragon phu nih an kah hna i palek 3 an thi, 2 an zaam i 4 a nung in an tlaih hna leng ah hriam zong an lak khawh. Kahdohnak chung ah AK 47 zuun 1, M 16 zuun 4, G3 zuun 1, 60mm zuun 1, bomrap 2, AK 47 kuan 200, M16 kuan 500, G3 kuan 300 le 60mm kuan 10 hna an lak khawh tiah theih a si.

KNLA hruai mi hriamtlai phu pawl nih SAC sakhaan 3 an lak, KNU Brigade 3 hmunhma chung ah KNLA battalion 7 le 9 fonh in SAC Tanseik sakhaan, Bawkahta le Tungtanṭa sakhaan hna cu November 12 zinglei ah an lak khawh i SAC ralkap 11 an thi, hriam phun tampi, meithal phun 17 le kuan thong tampi an lak khawh tiah KNU nih a thanh.

SAC sakhaan 3 cu November 12 zinglei sml 4:00am ah an kah hna i zing sml 11:30am hrawng ah sakhaan 3 ning tein an lak khawh i him tein an kir kho. Tanseik sakhaan le Bawkahta sakhaan cu KNLA kekal phu nih an lak khawh i Tungtanṭa sakhaan cu KNLA Drone phu nih an hrawh khawh.

SAC sakhaan 3 cu an hrawh lio ah SAC ralhrang 11 an thi i hliam a tuar mi zong an tam tiah theih a si. SAC sakhaan chung in MA meithal zuun 8, kuan 3,070, 9mm zuun 2, 81mm kuan 68, 60mm a sau mi zuun 1, 60mm a tawi mi zuun 4, 60mm kuan 113, RPG 7 zuun 1, RPG 7 kuan 77, Grenade 28, Short Gun zuun 1, Short Gun kuan 88, M14 bomrap 10, adang bomrap 10, kuanbawm 27 le bomrap kawlnak seh 1 hna KNLA nih an lak khawh.

Sakhaan an thianh lio ah SAC nih vanlei in voi 20 hrawng an kah hna caah thilri a zapi tein an la kho lo tiah a langhter. SAC nih hramhram in uknak an lak hnu ah Brigade 3 hmunhma chung ah KNLA le KNDO nih SAC sakhaan 7 an hrawh khawh cang tiah theih a si.