SAC Ralkap Nih Lungkhar Tlang An Lak, Khuate Lei Caah Thinphang A Si Maw?
============
Timit i Lungkhar tlang cu June 12 zinglei ah SAC ralkap nih an lak khawh tiah theih a si. Kan Chin ralkap hna nih a si khawh chungin an ven ve ko nain SAC ralkap hi minung thazang an tam pin ah Hakha lei nih hriamngan in an bawmh fawn hna caah kan Chin ralkap hna cu Lungkhar tlang in hnu an tolhnak a si.
Lungkhar tlang an lak caah khuate lei hna cu an thinphang ngai tiah theih a si. A bik in Zophei tlang khua hna an lungre a thei. Hi kong he pehtlai in The Chin Post nih CNF/A chimnak nawlngeitu Pu Htet Ni kan hal tikah a tanglei bantukin a chim.
“Lungkhar tlang an lak ruangah khuate lei caah thinphan tuk ding a si lo. Lungkhar tlang in Zophei lei ah an lut kho hrimhrim lai lo. SAC nih an i timhmi cu Hakha-Timit lampi hi tlaih (control) i Thantlang ah thazang chap kha a si. Hakha-Thantlang lampi an tlaih khawh lonak dingah kan i zuam lai. Cuti ka ti tikah daithlang um khawh a si ko ka ti duhnak a si lo.
SAC zia cu nan theih cio bang Vanlawng in khuate zong a kah khawh ko. Cucaah ralring tein um cio ding a si ko. Lungkhar tlang ah SAC ralkap nih saupi hmunhma an la kho lai lo. Lak than dingin kan i zuam lai”.
Lungkhar tlang hi SAC caah siseh kan Chin ralkap hna caah siseh a biapi ngai mi hmunhma a si. Asinain Lungkhar tlang an lak ruangah khuate lei fawi tein an lut kho lai tinak a si lo. Ralring tein um cio hna usihlaw thinphang thlalau tuk cun um ding a si lo.
Thanlwin Tiva Kam Um SAC Ralkap Sakhan Pahnih Cu KNDF Nih An Laak; Karen ramkulh, Thailand-Myanmar ramri Thanlwin tiva nichuahlei kap ummi SAC ralkap Taunghla sakhan le Mesae palik sakhan cu KNDF le tualchung hriamtlai phufonh nih nihin June 13, zinglei ah an laak, tiah theih a si.
“Nihin June 12, zinglei ah kap hnih kar kahdohnak a chuak i SAC ralkap umnak Taunghla sakhan le Mesae palik sakhan cu mipi ralkap nih an laak khawh. Kahdohnak kong he pehtlai in a thi mi le hliamhma tuar mi hna kong ah biafiang thanh a si ṭhan te lai,” tiah Karenni tualchung mi pakhat nih a chim.
Kahdohnak a chuahnak Thailand-Myanmar ramri hrawng ah hin SAC ralkap nih hrambunh in sakhan le gate an chiah pin ah Mesae khuachung ah palik sakhan zong an chiah. SAC ralkap hna nih cun an umnak hmunhma hrawnglawng cu an uk khawh i a dang hmun tam deuh cu tualchung ralkap phu hna nih an uk dih, tiah a chim chap. Crd; The Chin Post