Mindat Peng Ah SAC Ralhrang Nih Vanlawng In Bomb A Thlak; Mipi 3 An Nunnak Liam!
=========
Chin ramkulh, Mindat peng, Wum-hkum khua ah SAC ralhrang nih raltuknak vanlawng in bomb a thlak caah mipi nu 3 an nunnak a liam, 1 hliamhma a tuar tiah theih a si. July 8, zinglei suimilam 11:00 renglo tluk ah bomb a thlak hi a si i nu 3 cu hmakhatte ah an nunnak a liam colh, tiah bawmchan tu hna nih an langhter.
“SAC ralhrang raltuknak vanlawng nih a kal lei ah bomb 1 a thlak, a kir lei ah bomb 2 pehtlai in a thlak ṭhan pinah Mindat khuapi ah umhmun khuarmi SAC ralhrang Khah-lah-yiah 274 nih thal bomb pawl in an kah hna caah Wum-hkum khuami ngakchia 1 telh in 3 an nunnak a liam hi a si.
Nunnak liammi nu pakhat hi a fa hnuk ding lio mi a si” tiah bawmchan tu hna chungin minung pakhat nih a chim.
Nunnak liammi nu 3 hna cu kum 8 ngakchia pakhat, kum 25 le kum 60 hrawng upa hna an si, tiah theih a si. SAC ralhrang nih khuachung um sianginn le a pawngkam mipi inn hna cu tinhchih in bomb a thlak hna, tiah mithmu tu hna nih an chim.
“Inn 2 le sianginn cu laak awk an um loh, hliamhma tuarmi zong a um caah kan thlopbul cuahmah liopi a si” tiah thawngthanh tu nih a chim chap.
Kan hnu United States Holiday chung kahthahnak le buainak a tam lio caan ah DC khuapi ah Lyft khalty kahthah a tong. Kahtah tong mi Nasrat Ahmad Yar kum 31 tluk upa hi zaanṭim hnu ah Metropolitan Police hna nih Lyft chung ah a ruak in an char tiah theih a si. Mi thattu ah ruah mi, minung 4 hna hi kahthah a chuahnak hmun in an zaam lio camera nih a tlaih manh hna tiah an chim chap.
Nasrat Ahmad Yar a hawipa Matthew Butler nih Washington D.C ABC sin ah a chim mi cu, Nasrat Ahmad Yar hi Afghanistan i U.S ralkap hna ca ah kum 10 chung holhlet rian a rak ṭuan mi si tiah a chim. “Kum 2022 ah khan Philadelphia ah i ṭhial in um hmun a khuar, mah cu ka hmun hnunung bik a si.
Cu hnu ah a chungkhar he lam neih deuh i um a duh ca ah D.C ah a rak i ṭhial ṭhan tiah a hawipa nih WJLA sin ah a chim. Nasrat Ahmad Yar nih hin a nupi le a fa le 4 a kaltaak tiah a chim chap. Hi kong he pehtlai in, misual mithat tu phu hna hi ṭuanvo ngeitu palik nih an kawl lio hna si tiah an langhter.