Breaking News: Chin ramkulh Chungah Ralhrang Nih Sakhan An Sak!
India-Kawlram Ramri, Ti U (တီအို) Tiva Tlang Cungah SAC Ralhrang Ralkap Nih Sakhan An Sak!
========
India-Kawlram ramri, Falam peng chung Rih Khua Dar khuapi chung sang (2) nak tlang cungah Febuary 28 chun hrawng thawkin ralhrang ralkap 35 hrawng nih sakhan sakin an um tiah khuami nih an chim.
Febuary 27 ah khan helikopter in ralhrang ralkap 17 an rak chiah i, nizan chun thawkin Rih Khua Dar khuapi i thlanmual hlun pawngah SAC ralhrang ralkap 35 tluk nih sakhan an tuah. Inn ngeitu hna cu hmun dangah an thialter hna i, cuka ah an um. Cuka hmun cu a rem tuk. Mipi vengtu he hmunhma an i cuh bik a si ko tiah khuami pakhat nih a chim.
Atu bantukin SAC ralhrang ralkap hna cu khuapi hriang tlangcung ah hmunhma an laak tikah Kalaymyo leikap in a kalmi motor paoh cu Lai Tui khua ah an dinter hna i, thil sining an ngaithlai tiah theih a si.
SAC ralhrang ralkap hna nih Rih Tilipi in Falam khuapi kalnak lei, anmah sakhan lawngah an um. Atu sakhan an tuahnak thar hi Rih Khua Dar in Falam khuapi lei kalnak lampi pawngah a si i, Rih Khua Dar in Tidim-Kalay leikap ah a tummi motor lampi zong hmuh khawh a si.
Taal khua ah CNA/CDF le Ralhrang an i kap: A ni in hren dawh an si. Chin ramkulh Falam peng, Taal khua ah Falam in Hakha leiah a rak kaimi Ralhrang mawtaw 27 le Tank 2 telh mi phu le miphun hriamtlai phu Chin National Army (CNA) le Chinland Defense Force (CDF) bawm in nihin March 1 ah Taal khua ah kahdohnak a chuak tiah theih a si.
Hi kong ah, “March 1 zing in khua hauka ah an i kap i sml cheu hrawng a rau lai. Chun ah ralhrang pawl cu khuachung ah an i din. Khua chuah dingin an mawtaw he an i timhtuah i khua an chuah bakah kahdok a chuak ṭhan. Hmun hnih thum in sml. pakhat tluk hrawng cu an i kap lai dah tiah” khuami pakhat nih zaanlei sang ah The Chinland Post ah a chim.
Ralhrang mawtaw thluan pawl cu Taal khua kiangkap, khua chuah lai ah CNA/CDF he dohnak a chuak i, an mawtaw an kah piak lengmang hna caah khua lonhtak kho taktak loin [Hakha lei kalnak] khua chuah hauka ah an tap i tuzaan hi an riak kho men. Khua chungah rak kir ṭhan in riah khawh zong an si. Zeidah a lawh lai ti cu a fiang in chimkhawh a si rih lo tiah khuami nih cun a chim.
Nihin zaanlei sang tiang ah, Ralhrang nih khanghmi inn cu a um rih lo nain, khua sianginn pakhat cu hriamngan nih a khen tiah theih a si. Taal khuami hna hi Ralhrang Falam an phan ti thawng an theih February 27 hrawng in nu, hngakchia, tar le loriak a der thawm deuhmi hna cu Falam leiah an kalter cia cang hna tiah runvennak len an tuahmi kong khuami nih a chim.
Khua nigatthlai ah a tangta mi hi, Tlangval le Patung no 10 hrawng lawng an si i kahdohnak a chuah in ramlak ah an um ve tiah theih a si. Taal khua hi cozah rianṭuantu hna telh in Inn 39 khuasa an si i a tu bantuk in Falam in a rak kaimi ralhrang le CDF karlak kahdohnak a chuah ruangah khua an chuahtak dih nak hi a si tiah theih a si. Credit: The Chinland Post