Breaking News: CDF – Mindat Le Ralhrang Phu Ni (14) Chung I Kah Loin Hnatlaknak An Ngeih

CDF – Mindat Le Ralhrang Phu Ni (14) Chung I Kah Loin Hnatlaknak An Ngeih
===============
Chin ramkulh, Mindat khuapi le peng chungah ralhrang phu le CDF-Mindat karlak kahdohnak ah mipi innle lo a chuak takmi hna le khua a zam takmi hna vialte anmah le inn le lo cio le khua cio ah an kir than khawh nakhnga caah ni 14 chung kahdohnak tuah lo dingin khuanu khuapa nih kaphnih karlak ah an tlangtlak hna i tonnak an ngeihmi hna cu ralhrang phu lei nih hnatlaknak an ngeih ve, tiah thawngtheih a si.

Nihin June 20, 2021 in July 4, 2021 tiang i kah rih loin ton biaruahnak kong cu khuanu khuapa pakhat nih BBC media sinah a chim. Khuami le mipi pawl anmah le inn cio teah an rak kir than khawh nakhnga caah khuanu khuapa nih kaphnih karlak ah biaruahnak an ngeihpiak hna, tiah a chim.

Ralhrang phu zong ralram ah chuak loin le CDF-Mindat hriamtlai phu zong ralram ah chuak lo dingin hnatlaknak an ngeih veve. Khuami pawl le anmah le inn teah an kir than khawhnak ding caah zalong tein an tlunkal khawh nakhnga ding caah timhtuahmi a si. A tlunkalmi pawl cu checkhlainak cu a um ko lai nain, kah lo a si lai. Mipi pawl nih tihphang nak um lo tein khuapi chung an luh than khawh nakhnga caah a si, tiah khuanu khuapa pakhat nih a chim.

Ralhrang phu nih an hrawk mi pawl zong remh thannak ding a si lai i, tuanvo a ngeitu pawl sinah thawngthanh nak tuah ding tu cu a si te lai. Khuanu khuapa pakhat nih an i ton biaruahnak kong cu BBC media sinah a chim. Khuami an rak kir mi paohpaoh cu hriamnam an i ken le ken lo checkhlainak cu tuah a si lai. Checkhlainak an tuah hna zongah ni 14 chungah tlaihkhinhnak a um lai lo, tiah biaruahnak le hnatlaknak an ngeihmi cu a chim chap.

Atu lio Mindat khuapi chungah a rak kir thanmi 20% hrawng lawng an si rih, tiah theih a si. Ralhrang uknak ralchanh in ralhrang phu pawl kahdohnak a tuah hnu ah Mindat khuapi cu May 13, 2021 ni ah ralhrang phu nih Martial Law an rak chuak. Chinland Defense Force (Mindat) hriamtlai phu le ralhrang phu pawl karlak ah khuapi chung kahdohnak ruangah khuami thong leng nih nun himnak kawl ah an zamh cio hna, tiah thawngtheih a si. BBC NEWS