Breaking News: CDF – Mindat Cu Khuami Bak Nih Lai Meithal Bak In An Bawmh Cang Hna! Ral Tei Lo Awk A Tha Lo!

Breaking News: CDF – Mindat Cu Khuami Bak Nih Lai Meithal Bak In An Bawmh Cang Hna! Ral Tei Lo Awk A Tha Lo!
==============
Mindat-Matupi lam ah ninga chung Kahdoh nak aa peh. November6, zinglei 11:30AM hrawng ah Meng 31 a rak phan mi Ralhrang Motor cu CDF-Mindat nih an kah hna.

Cu kah nak ah cun Mipi le CDF-Mindat i bawmh in motor lam pawng ruah ti luan nak le thingkung cung in an bawh hna. Tu-Me(တူမီး) meithal in Ralhrang cu neihniam tein an kah hna. Ralhrang 8 hrawng an thi i hliamhma pu mi an tam.

Ralhrang nih kan hnu zarh chung Matupi lei an rat lio ah Khuami hna ngeih mi Sia an thah, an ei piak hna. Inn le a chung thilri an hrawh piak hna caah Mipi hna zawng nih lungtho ralttha tein an kah ve hna.

November 7, Zinglei 9:00AM – 10:00AM tiang Meng 26 hrawng ah CDF-MINDAT le Ralhrang Motor hmai ah ke in a kal mi Ralkap an i kap. Ralhrang lei 10 an thi i a hnu um mi Ralhrang Motor in Hriamngan, Tank le raltuk nak meithal hna in an kah ve hna caah athi mi Ralhrang sin in an hriam pawl lak khawh asi lo. CDF-MINDAT lei in pakhat a phei ah hliam a pu. Lungretheih asi lo.

November 7, Zaanlei 2:30PM hrawng zawng ah Ralhrang an kal nak hnu thli tein a zul tu CDF-MINDAT nih Meng 25 hrawng ah an kah tthan hna.

I kah nak Nazi 2 tluk a rauh hnu ah CDF-Mindat nih Hriamngan in an kah ve hna i Ralhrang 8 tluk an thi i hliamhma a pu mi an tam. CDF-MINDAT lei hliamhma tuar lo tein hnu an kir kho tthan.

Meng 31 hrawng lampawng ah Ralhrang ruak an phum tak mi hmuh asi. Ralhrang Motor chung ah Ralkap lawng siloin Palek le Meithat zung ah a ttuan mi zg an i tel tiin ruah asi.

Ni 2 chung ah CDF-Mindat nih Kawl ralkap 18 kahthah. November 6 le 7 (ni 2 chung) Mindat le Matupi kar kahdohnak ah khuami nih CDF-Mindat an bawmh hna i Kawl ralkap 18 an thah hna, tiah kan theih.

November 6 zinglei 11:30 AM kahdohnak ah khuami nih an kan bawmh i Kawl ralkap 8 hrawng an thi i hliamh mi an tam, tiah CDF-Mindat nih an thanh. November 7 zing Meng 26 hrawng ah lamlai ah kan i tong i kataza lamcung ah Kawl ralkap 10 kan hrilh hna, tiah an thanh.

November 6 lio Thantlang inn an kanghchap mi inn 8 a rak si, inn 191 khangh cang. Kawl ralkap (Ralhrang) nih November 6 lio zinglei 5:30 AM hrawng in Thantlang khua inn an khanghchap mi hi a dihlak ah inn 8 a rak si i nihin tiang an khangh mi dihlak inn 191 a si cang, tiah kan theih.

Inn a kaang mi le inn ngeitu hna hi; “TABC PCH (Ngaktah inn) 3, Pi Khen Cia (Thangaw khuami) inn, Pu Al Hai inn, Pu Thawng Hnin inn, Saya Chan Kar Lian inn, le Sayama Sui Iang inn tiin a dihlak inn 8 a si, tiah Pu Ram Khar nih a chim.

Hi inn a kaang mi hi Kawl ralkap nih bomb an puah/kahnak ruang a si i hi ni ah CNA in Salai Soe Lin Naing mual a liam i 2 an rak i hliam. Kawl ralkap lei in a thi mi le aa hliam mi an um le um lo nihin tiang CNA/CDF lei nih cathanh an chuah rih lo.

September 18 zaan ah Sianginm sang inn 19, October 29 ah inn 164 le November 6 ah inn 8 an khangh i a dihlak ah inn 191 a si cang.