Zarh Khat Tluk Timit Kahdohnak Ah SAC Ralkap 20 Leng An Thi I, 40 Leng Hliam An Tuar
===============
Chin ramkulh, Hakha le Thantlang kar Timit kuanghrawn ah SAC ralkap le Chin ralkap hna cu zarh khat tluk fak ngai in an i kap. Cu kahdohnak ah cun SAC ralkap 20 hrawng an thi i 40 leng hliamhma an tuar, tiah CNF/CNA in chimnak nawlngeitu Salai Htet Ni nih a chim.
“Tutan kahdohnak July 3 in 8 tiang ah kanmah lei in 6 hliamhma an tuar, SAC lei ralkap 20 leng hrilh an si i, ralkap 42 hi siizung ah an phan tiah kan theih. Kahdohnak hmun in hnu an tolh, Hakha an phanh le phanh lo cu kan hngal lo” tiah Salai Htet Ni nih cun a chim.
May thla dih thawk ah Hakha in Thantlang lei ah SAC ralkap pawl cu rallam an sial i, July thla thawk in cawlcanghnak an thawk ṭhan caah kahdohnak a chuak. Hakha um SAC ralkap nih hriamngan in kah an bawmh hna pinah ral tuknak vanlawng in voi thum bomb an thlakhnawh hna, tiah theih a si.
Hakha in Thantlang lei ah battalion phu 5 in hmun khat ah ralkap thazaang 150 hrawng i ṭhen in hmun hnih ah rallam an sial. Kahdohnak ah SAC lei fak ngai in hliamh an si caah, Hakha um SAC ralkap hna cu bawmtu ding ah an thlahchap hna tiah theih a si.
Kahdohnak ah Chin ralkap nih meithal 4, kuanfang zun 1000 leng kan lak i, hmun hnih in rallam a sial mi SAC ralkap hna cu fak ngai in hliamh an ton caah phu khat ah i fon in hnu an tolh, tiah CNA in chimphuannak nawlngeitu nih a chim.
“SAC ralkap nih rallam an sial hi an khanghcia mi khua Thantlang hrambunh SAC ralkap sakhan ah ralkap thazaang chap an duh caah a si. Thazaang an i chap hnu ah hmunhma laak khawh an duh i cu caah atu bantuk in operations an tuahnak hi a si,” tiah Salai Htet Ni nih cun a chim chap.
Thongthlak a tong mi Daw Aung San Suu Kyi he nai teah tonnak kan nei tiah Thailand ram Foreign Affairs Minister Don Pramudwinai nih Indonesia ram ah tuah mi ASIAN ramchung Foreign Affairs Minister pawl ton biaruahnak ah a mah pumpak nih a chim hi a si.
Japan ram Kyodo thawngzamh nih July 12 ni ah a cunglei bantuk in a langhter hi a si. 2021 SAC cozah nih uknak a lak hnu in Daw Aung San Suu Kyi cu a voikhatnak bik Thailand ram Foreign Affairs Minister Don Pramudwinai he an i ton hi a si.
An rak i ton hi a luan cia July 9 lio ah a si i Daw Aung San Suu Kyi nih ASIAN Foreign Affairs Minister pawl sin ah biacah a kuat mi zong a rel piak hna tiah thawngpang a leng nain fiang in theih a si rih lo.
Thailand ram Foreign Affairs Minister Don Pramudwinai cu Indonesia ram tonpumhnak hlan ah a thli tein Naypyidaw ah a rak kal i a kal nak kong he pehtlai in thawngthanh nak zeihmanh an rak tuah lo tiah kan theih.
July 11, ah Mexican khualtlawng minung 6 phurtu helicopter cu Nepal Everest tlang sang cung ah cansualnak tong in aa citmi an dihlak an thi dih tiah theih asi.
Cansualnak a tong mi helicopter hi Lamajura hmunhma ah a tla tiah chim in nunnak liam mi ruak hi chatṭhat zohkhanh tu bu nih an fimhlawm hna tiah president Basanta Bhattarai nih a chim. Nunnak liam mi (Nu) pathum le (Pa) pahnih hi Mexican ram mi an si i helicopter khaltu hi Nepal ram mi a si tiah ṭuanvo ngeitu hna nih an chim.
Nepal chiatṭhat zohkhanh tu bu nih nunnak liam mi RUAK hi helicopter 2 hmang in an lak hna. A sinain, Sii-bawi nih ram dang mi an si ca ah an chungkhar sin kuat colh lo in embassy riantlai tu hna kut ah a chiah hma sa hna tiah an langhter.
Cansualnak a tong mi helicopter hi vawlei cung tlang sang bik zoh a duh mi hna khualtawng a phur tawntu a si tiah an langhter. Helicopter cansualnak a chuak ning hi zei ruang ah dah si hnga ti a tutiang in an theih fiang kho rih lo.