SAC Ralkap Nih Kawlin Ah Mipi Vengtu Ralkap Telh In Pa Panga An Thah Hna
================
Sagaing ramṭhen, Kawlin peng ah SAC ralkap nih Mipi vengtu(pah kah phah) ralkap pakhat telh in pa panga cu May 23 ah an thah hna, tiah theih a si.
Thah a tongmi hna cu mipi vengtu ralkap Nay San Aung(kum 22), Kyaukkar khuami sii saya Thein Aye(kum 44), Min Hlaing, Kyaw Min Thein le Phu Wa hna an si, tiah Kawlin PDF in ralkap pakhat nih a chim.
Mipi vengtu ralkap pa hi Loimauk khua pawng kahdohnak ah SAC ralkap nih an tlaih i an thah. Sii sayapa hi Loimauk khua pawng ah an thah i, ek khor ah an thlak. Pa 2 hi an khua ah an thah hna i pakhat hi Caw a cawnghnak ah an thah, tiah PDF pa nih cun a chim.
SAC ralkap pawl cu May 21 in rallam an sial i, May 23 ah Loimauk khua ah an lut. Khuami inn an hrawhpiak hna hnu ah PDF he kahdohnak a chuak. Loimauk khua ah zan khat an riak i, PDF hna cycle 10 zong an khanghpiak hna, tiah theih a si. Cu pinah Kutaungbu, caan karlak SAC ralkap sakhan in a chuakmi ralkap 70 leng zong May 22 in rallam an sial i, Yartaung le Maungkaw khuami inn zong an hrawhpiak hna, tiah theih a si.
Kalaymyo Ah Ngunkhuai A Pe Lomi Poh Dantat An Si Cang Lai Tiah Kalay Mipi Vengtu Phu Nih An Thanh; Sagaing ramṭhen, Kalay peng chung ah ngunkhuai pe loin rian a ṭuanmi hna cu dantatnak kan pek cang hna lai, tiah Kalay peng mipi vengtu phu nih cathanh an chuah. Ngunkhuai a pe lomi hna thilri vialte cu kan ukpen mi hmun le kanmah he ṭangṭi phu a simi hmunram chung ah luhchuahter lo ding le cawk zuar khawh a si lai lo, tiah an langhter.
Kalay khuapi chungah rian a ṭuan i, ngunkhuai a pe lomi poh cu dan kan tat cang hna lai. Rian tlaitu hna nih ngunkhuai an pek lawng ah rian an ṭuan kho cang lai, tiah Kalay peng thlanglei mipi vengtu in ṭuanvo ngeitu nih a chim.
Ngunkhuai a pemi rian tlaitu an um bantukin ngunkhuai a pe duh lomi zong an um ve. Cu ruangah ngunkhuai a pe duh lomi hna cu dan kan tat cang hna lai, tiah an langhter. Rian tlaitu hna nih ngunkhuai an pek dingmi chung ah SAC nih an chuahmi thilri cu an i tel lo, tiah Kalay peng mipi vengtu(Pah Kah Phah) nih an langhter.
Banmauk Peng Kahdohnak Ah SAC ralbawi 1 Telh In Ralkap 20 An Thi; Sagaing ramṭhen, Banmauk peng Kyawnglay khua pawng kahdohnak ah SAC ralbawi 1 telh in ralkap 20 an thi, tiah Banmauk Revolution – BR in ṭuanvo ngeitu pakhat nih a chim.
Banmauk peng Kyawnglay khua ah umhmun a khuarmi SAC ralkap cu May 24 ah Banmauk Revolution – BR nih an va kah hna i SAC lei nih vanlawng in kah an bawmh hna, tiah theih a si. Cu kahdohnak ah cun ralbawi 1 a thi i, a ruak la ding in a kalmi SAC ralkap pawl cu an kah ṭhan hna i 20 an thi. Kyawnglay khua zong an laak khawh i, vanlawng nih atu le tu kah a bawmh hna, tiah theih a si.
Kyawnglay khua pawng ah ni 6 chung hrawng kahdohnak a chuak i SAC ralkap a thimi an tam. Indaw peng in bawmtu ralkap an kalmi hna zong ABSDF le PDF nih nihin May 25 tiang an kah hna, tiah theih a si. Credite; The Chin Post