Mandalay Khuapi Chung Ah A Cawlcangmi PDF Ralkap 8 Le Tualchung Mi 5 Tlaih An Si!
=====
Mandalay khuapi chung ah a cawlcangmi Royal Phoenix Guerilla Force (RPGF) hruaitu telh in ralkap 8 le tualchung mi 5 cu May 20 le 21 ah SAC ralkap nih an tlaih hna, tiah PDF lei sin in theih a si.
Royal Phoenix Guerilla Force (RPGF) hruaitu Saw Ba Ngein, hruaitu chang Kauk Kyi le ralkap 6 hna cu SAC ralkap nih an tlaih hna pinah tualchung mi 5 zong an tlaih hna, tiah Myanmar Revolution Hero Force-MDY in ralkap pakhat nih a chim.
“May 20 ah Mandalay khuapi chung khual riahnak khan pakhat ah RPGF hruaitu chang Kauk Kyi cu an tlaih i, a dang a hawile cu an inn ah an va tlaih hna. Tualchung mi 5 tu cu RPGF he pehtlaihnak a ngeimi an si lo,” tiah RPGF ralkap pa nih cun a chim.
SAC ralkap nih an tlaihmi tualchung mi nu 3 le pa 2 cu RPGF he pehtlaihnak zeihmanh a ngeimi an si lo i, mi sawhsawh an si. Dohthlennak ah aa telmi PDF hna cu bawmchan ngam ti hna hlah seh law, ṭih hna seh tiin hrocernak ah an tlaihmi an si, tiah RPGF ralkap pa nih cun a chim chap.
RPGF chungtel 8 le tualchung mi 5 an tlaihmi hna cu Mandalay le Sagaing ramṭhen ah ralhrang rian a ṭuanmi Royal Phoenix Guerilla Force – RPGF an si i, a puak khomi thilri he kan tlaih hna, tiah SAC nih an thanh.
Pazigyi Khua Ralhrial mi Hna Cu Eidin, Phaisa Le Thilri Bawmhnak Pek An Si; Kanbalu peng, Pazigyi khua ralhrialmi hna cu nihin May 23 ah S&C mei ral bawmchantu hna nih eidin, phaisa le thilri an bawmh hna, tiah theih a si. SAC ralkap nih bomb an thlak ruangah nunnak a liammi Pazigyi khuami 157 hna nih an tantaakmi chungkhar hna cu minung pakhat ah Kyats 30,000 cio an pek hna, tiah theih a si.
Cupinah khuami ralhrial hna cu facang tun 50, chiti cuai 225, cite cuai 250, hruk-aih hnipuan, ruahkham muka 5, sii-ai phun 100, nga chiahnak kuang 1,200, khohsuai ro tom 720, coffee tom 2, hangthlum thawl 600, muṭhai bawm ngan 10, changreu thuk 7 le nu hmanmi thilri tun 1(phaisa fang in kyats sing 220 man hrawng) an bawmh hna, tiah theih a si.
Thlichia A Tuarmi Rakhine Mi Hna Ca Ah Shan State Progress Party(SSPP) Nih Kyats Sing 1,000 Bawmhnak Pek; Mocha thlichia ruangah harnak a tongmi Rakhine rammi hna cu Shan State Progress Party(SSPP)/ Shan State Army(SSA) nih kyats sing 1,000 Arakan Army(AA) sinah bawmhnak kan pek, tiah SSPP nih May 22 ah an thanh. Mocha thlichia nih Rakhine ram cu faak tuk in a den i a rawkralmi a tam caah bawmhchanhnak rianhma a kal khawh nakhnga bawmhnak kan pek hna hi a si, tiah an langhter.
Thilchia a tuarmi Rakhine ram bawmhnak ah Ta’ang National Liberation Army(TNLA) nih kyats sing 500, NUG nih kyats sing 1,000, KIO nih kyats sing 3,000 le Myanmar National Democratic Alliance Army(MNDAA) nih kyats sing 1,000 cu AA sinah an pek cang, tiah theih a si.
Rakhine ramkulh chung, Sittwe, Punakyun, Kyaukdaw, Myo oo, Minpyia, Maypone, Pauktaw, Yathetaung, Buthitaung le Maungtaw peng cu thlichia nih faak ngai in a den caah inn rawkral a tam pinah minung nunnak a liam zong an tam, tiah theih a si. Credite; The Chin Post