A Unaupa Hreitlung In Thattu Thonginn Chung In A Zaam
=========
July 24, zing suimilam 9:30 tluk ah nunchung thongthlak ding in beiceihzung nih bia khiah piak cang mi a mah unaupa hreitlung in thattu Tuansianmuanga cu Champhai district thonginn chung in a zaam i zanlei suimilam 5:00 tiang ah a konglam zeihmanh theih awk umlo tiah theih a si.
Champhai district thonginn nih Zalen News sin ah theihternak a tuah ning cun, tonginn chung hnawmtam hlonhtu (sanitation motor) in leng ah hnawm hi thongtla pawl an hlonhter tawn hna. Cu bantuk ṭhiam in July 24, zinglei suimilam 9:30 tluk khan unau that tupa Tuansianmuang hi hnawmhlonh ah a kal ve i lengchuahnak gate a phak bak in a zaam colh tiah an langhter.
Thong zohkhanh tu hna nih a zaam ti an theih bak in kawl hram an thok colh a sinain, July 24, zanlei suimilam 5:00 tiang ah a konglam zeihmanh theikawk umlo tiah an langhter. Thuansianmuang hi kum 2021, June ni 23 khan a unaupa cu hreitlung hmang in a rak thah i biaceihzung nih a konglam ṭha te in hlathlainak a tuah hnu ah July ni 20, 2023; khan Champhai Addl. District & Session Judge nih thiam lo canter in nun chung thongthlak ding ah bia khiah piak mi a si tiah an langhter chih.
India-Myanmar Ramri Ah Thetse Le Lung Seh In Nan La Lai Lo Tiah HPO/CDF-Hualngoram Nih Cathanh An Chuah. India-Myanmar Ramri Ṭio tiva ah seh in thetse le lung laak lo ding in Mizoram ramkulh khua 10 fonh hruaitu hna simi Vanhnuailiana Group YMA le HPO/CDF-Hualngoram hna i tonnak an ngeih hnu ah CDF-Hualngoram nih atu bantuk in cathanh an chuah hi a si.
HPO/CDF-Hualngoram in ṭuanvo ngeitu pakhat nih “A bik in ṭio tiva chung ah ummi thetse le lung seh in a latu pawl hi Mizoram, Champhai mi deuh an si hna. Lung laaknak seh le thetse laaknak seh pawl zong an i hunh hna i phungning loin an laak hna caah caan a rauh ahcun pawngkam ṭhanchonak a rawk khomi a si. Myanmar ram in minung 1 lawng a latu a si. Kut in laak tu cu kan kham lo” tiah a chim.
Cu pinah ṭio tiva chung ah hmunthur a hlonh tu pawl zong dantatnak tuah hna dingin an langhter i ramri thluan ah rithaisii a zuartu pawl zong faakpi in tantatnak tuah kho ding in timhlamhnak an ngei, tiah cathanh an chuahmi in theih chih a si.
Kanpetlet Kahdohnak Ah SAC Ralhrang 5 An Thi; Bomb Lamhsualnak In Mipi 1 A Nunnak Liam. Chin ramkulh, Kanpetlet peng, Pakun khua pawng um Kaṭin tiva kam ah kahdohnak a chuak i SAC ralhrang 5 an thi, tiah CDF Kanpetlet nih cathanh an chuah.
July 23, chun suimilam 12:00 in 1:30 tluk tiang Kanpetlet khuapi ah umnak aa thlengmi SAC ralhrang pawl an chuah lei ah CDF-Kanpetlet he kaphnih kar kahdohnak a chuak i SAC ralhrang 5 an thi pinah hliam a pumi zong an tam ngai. CDF-Kanpetlet ralkap in hliamhma tuarmi le nunnak liammi kan um lo nain SAC ralhrang nih an hmanhmi bomb lamhsualnak in mipi 1 nunnak a liam, tiah an langhter. A luancia July 21 kahdohnak zong ah SAC ralhrang 2 an thi pinah 1 nih hliamhma faak ngai a tuar, tiah theihchih a si. Credit: Lungmili Media