Breaking News
Hakha Thawngpang Theihthanh A Si!
===========
Nihin May 23 zanlei suimilam 2:00-3:00 kar hrawng ah Hakha, Keisih sang, Sii-inn lam ṭhen ah SAC nih cycle licence an check i, mi an tlaihmi hna zong an um, tiah theih a si.
Thantlang Peng Khua Cheukhat Ah Saṭil An Zaw; Thantlang peng khua cheukhat ah saṭil an zaw ngai i a thimi zong an um len tiah theih a si. Thantlang peng Vuangtu khua ah caw, naa le sia hna cu an zaw i Sia 16 an thi cang. Vomkua le Salen zongah caw, naa le vok an zaw ngai ti a si!
An zawtning cu an ke-tin hram in a hma i cucu an liah tikah an lei a hma ṭhan. Cuticun rawl ṭam kho loin an um, tiah Vomkhua khua mi pakhat nih The Chin Post ah a chim. Vomkua ah hin caw 40 renglo an um i a dihlak in an zaw, a thimi cu an um rih lo. Hi saṭil zawtnak hi Laitlang ah a um bal rih lo mi a si i Kawlrawn lei in Mizoram ah caw a zuar mi hna nih an phawrhchih mi zawtnak (Kawl nih khu-na an timi) a si ko tiah khua mi sin in theih a si!
Rakhine Ramṭhen, Punakyun Peng Sinte Khua Inn 494 Cu Thlichia Nih A Hrawh! Rakhine ramkulh, Punakyun peng, Tawphiachaung hmunram um Sinte khua cu May 14 lio a hrangmi Mocha thlichia nih a den ruangah a khua ning tluk in a rawk, tiah tualchung mi hna nih RFA ah an chim.
Inn 535 a umnak Sinte khua cu thlichia ruangah inn 494 a rawk i inn 41 cu laak awk um loin a rawk cikcek. Khuami 200 leng cu umnak inn le lo ngei loin an vai i, phungki sianginn ah an i dor chung, tiah RFA nih a ṭial.
Tawphiachaung hmunram hi a hlan tein internet le phone line a hman khawh a si lonak hmun a si i, khuapi he aa hlat ngainak ah a ummi a si. “Khuami hna cu lothlawh le kuva cin in aa cawmmi kan si i, Mocha thlichia nih kan inn le lo a hrawh ruangah kan inn sak remh ṭhan ding cu chim lo nunnak ca ah eidin tirawl hmanh a har tuk cang,” tiah khuami hna nih cun an chim. Tawphiachaung hmunram a ummi Pushwepin le Pauktawpin khua telh in khuate 6 le khuate dang hna zong thlichia nih fak ngai in a den ve hna, tiah tualchung mi hna nih cun an chim.
SAC Ralkap Nih Thongtla Pakhat Thi Lak In An Velh! Thongtla Pawl Nih Duhlonak An Langhter; Mandalay ramṭhen, Myingyan khuapi um Bahu thonginn ah ramkhel thongtla hna cu SAC ralkap nih an tukvelh hna caah thongtla pakhat nunnak a liam, tiah theih a si.
SAC ralkap nih, Myingyan thonginn khan No. 2 ah a ummi Kyaw Min Naing, Thet Maung Maung, Kyaw Myo Tint, Zaw Zaw Aung le U Kar hna cu May 21 ah an auh hna i Kyaw Tint Oo le Aung Myo Thant zong nihin May 22 an auh ṭhan hna.
SAC ralkap nih an auhmi hna chung in U Kar cu an tukvelh i an hremnak ah a thi. Cu kong he pehtlai in a hawile ramkhel thongtla mi hna nih, ihnak khan cawngtu pa cu an hawipa U Kar thihlohnak kong an hal nain a hngalh lo pinah, thonginn uktu pa zong nih zeihmanh chimfianhnak a tuah lo, tiah theih a si.
SAC ralkap nih an thahmi U Kar hi Monywa ah SAC ralkap uk duhlonak rak langhter lio ah hruaitu pakhat a si. A hawile ramkhel thongtla hna cu rawl an pek hna zong ah ei duh loin duhlonak an langhter, tiah Tachileik News Agency nih a ṭial. Credite; The Chin Post