Hakha Ah Bomb Puahnak In Minung 5 Hliam An Tuar, 1 Nunnak Liam!
========
Chin ramkulh, Hakha khuapi ah bomb hmanhmi i lamhsualnak in minung 5 hliamhma an pu i, 1 a nunnak a liam, tiah theih a si. May 24 ah meheh rawl kawl ding in aa thawhmi Pu Chan Kian cu meheh rawl a kawlnak in a ṭin ti lo caah a chungkhat nih nihin May 25 zinglei ah an va kawl i cu an va kawlnak ah cun Pu Chan Kian a tupa nih bomb aa lamh sual caah minung 5 hliamhma an pu, tiah tualchung mi pakhat nih The Chin Post ah a chim.
Pu Chan Kian chungkhar he naihniam in a ummi pakhat nih, “Pu Chan Kian cu Meheh rawl kawl ding in aa thawh i bomb aa lamhsual ruangah ka bawm u tiin a authawng zong a theimi an um. Nihin May 25 ah a ruak va kawl dingin Pu Chan Kian a chungkhat minung 7 hrawng cu an kal i, Chin ramkulh Ministers hna umnak inn lei kap ah bomb nih a puah hna caah minung 5 hliamhma an pu,” tiah a chim.
Hliamhma pumi hna cu pa 4 le nu 1 an si i, Hakha sii-inn ah an tlikpi hna. Pu Chan Kian tupa hi a orhlei ke a bul. A dang hi an ke, an baan le an ṭaang ti bantuk ah bomb pelpawi nih a peh hna, tiah theih.
Karenni Ramkulh, Demoso Peng Ni 10 Chung Kahdohnak Ah SAC Ralkap 40 Hrawng An Thi; Karenni ramkulh, Demoso peng ah a luancia May 14 in May 23 tiang kahdohnak a chuak i, SAC ralkap 40 hrawng an thi. KNDF le ṭangṭi phu lei in ralkap 8 nih ram le miphun ca ah an nunnak an pek ve, tiah theih a si.
Karenni ramkulh, Demoso peng nichuahlei Dawliakhu le Tanilarlay tlangcung kahdohnak ah SAC ralkap Captain 1 le ralbawi bo hnih 2 tel in ralkap 40 hrawng an thi i, ralbawi telh in hliamhma pu mi zong an tam, tiah KNDF nih cathanh an chuah. Tanilarlay khua tlangcung in Dawliakhu khua tlang lei ah rallam a sialmi SAC ralkap le KNDF cu May 14 thawk in May 23 tiang an fak ngai in an i kap, tiah theih a si.
Cu kahdohnak ah cun Loikaw um Ngwetaung le Hprosu hrambunh SAC ralkap hna nih nifatin ti awk in hriamngan he an bawmh hna pinah Fighter in voi 60 nak tlawm lo bomb a thlak, tiah theih a si. Ni 10 chung kahdohnak ah KNDF lei nih hriamnam zeizawzat an lak pinah ralkap hmanmi thilri tampi an laak i, SAC ralkap 2 an tlaih hna, tiah theih a si.
Bungkhua IDPs Camp Ummi Hna Nih Bawmhnak Kan Hmu Lo An Timi Kongah GCHRC Nih Fianhnak An Tuah; Chin ramkulh, Thantlang peng, Bungkhua IDPs camp ah ralhrial in aa dormi hna nih bawmhnak kan hmuh lo tiin an chim kong ah ramchung i IDPs Camp a sakpiaktu Global Chin Humanitarian and Relief Committee(GCHRC) nih fianhnak cathanh an chuah.
GCHRC nih cathanh an chuah ning ah cun, WFP le KMSS bawmhnak nih IDPs bawmhnak pek dingmi a um sual ahcun bawmhnak aa thuat sual lai ti phan bawmhnak pe rih loin thil sining a fianh hnu ah tawlrel ṭhan te ding a si, tiah an langhter. WFP le KMSS nih bawmhnak an pek hna lo caah GCHRC nih bawmhnak an pek tawn ning in bawmhnak an pek colh lai i, Chin IDPs Management Coordinator zong Bungkhua a um lio a si caah bawmhnak pek dingmi zong a tawlrel pi colh lai, tiah GCHRC nih cathanh an chuah.
Salen, Bungkhua IDPs camp hi rambuai hnu 2021 March thla in GCHRC tawlrelnak in Chin mi dornak a ngei lo mi hna ca ah sak mi a si i, Tukum 2023 April thla in khua 3 (Thau, Hriangkhan le Hripi B) ah sakchap a si, tiah GCHRC nih an cathanh ah cun an langhter. Credite; The Chin Post