Ngazun Peng Ah PDF Sakhan Pahnih Cu SAC Ralkap Nih An Laak
=============
Sagaing ramṭhen le Mandalay ramṭhen um PDF sakhan pahnih cu SAC ralkap nih an laak hnu ah PDF ralkap pakhat le ralkap pakhat hringtu a nu cu SAC ralkap nih an thah hna, tiah theih a si.
May 28 zinglei suimilam 9:00 hrawng ah Sagaing ramṭhen Ayardaw peng khuate ah SAC ralkap 50 hrawng cu rallam an sial in tualchung mi 28 zong ralphaw hman ding ah an tlaih hna i, PDF ralkap pakhat zong an laak. An tlaihmi hna chung in PDF ralkap pakhat hringtu a nu cu an thah i mei in an khangh, tiah theih a si. Cu bantuk ṭhiam in Mandalay ramṭhen, Ngazun peng hrambunh TGYR phu in ralkap pakhat cu SAC ralkap nih May 24 ah an tlaih i, an hrem hnu ah an thah, tiah theih a si.
Cu pinah SAC ralkap nih May 26 zinglei suimilam 6:00 hrawng ah Ngazun peng TGYR sakhan cu an luhhnawh i hriamnam le eidin thilri zeimawzat an laak, tiah TGYR nih an thanh. SAC ralkap pawl nih hin a luancia May 24 zinglei ah khan Ayardaw peng Taunghmua khua cu an khangh i inn 60 leng a ciamh pinah kum upa 4 telh in khuami 6 an thah hna, tiah theih a si.
SAC Ralkap Sing Hnih Le Cheu An Tling Ti Lai Lo Tiah NUG Nih A Ruahdamh; SAC ralkap chung in ral a tu khomi le zung ṭhumi dihlak fonh ah sing hnih le thongkul leng in sing hnih le thong sawmli(220,000-240,000) kar lawng an taang cang, tiah NUG runvennak zung nih an ruahdamh.
Ramchung ramleng ngiathlaitu hna nih cun SAC ralkap cu sing thum in sing nga kar an si lai, tiin an zumh ko nain cu tluk cu an taang ti lai lo, tiah May 28 ah NUG runvennak zung nih cun an langhter. Min Aung Hlaing ralbawizik a si hnu in Battalion pakhat an ser ning zoh ah Battalion pakhat ah ralkap 857 in 200 kar hrawng tam in upadi an ser, tiah NUG runvennak zung nih an langhter.
SAC ralkap nih ralkap le palik thar an khawmhnak ah harnak an tong ngaingai i cuhlan mithar an laak khawh biknak Myanmar ram laifang le nitlaklei hrawng zong ah mithar an khawm kho ti lo i, cuka hmunram a ummi hna cu SAC ralkap faak piin a dohtu an si cang. SAC ralkap rianṭuan a duh lo i, CDM a tuahtu ralkap le palik hi thong hleikhat leng an si i, kum hnih chung kahdohnak ah SAC ralkap thong sawmthum tluk an thi cang, tiah an langhter.
SAC ralkap cawlcangh ning a ngiathlaitu, US ram ummi Ye Myo Hein nih cun SAC ralkap hi an dihlak sing khat le cheu tluk hrawng lawng an taang cang lai, tiah May thla chung ah a langhter. Cu chung ah ral a tu khomi hi thong sawmsarih tluk lawng an si, tiah a chim. SAC lei nih cun an ralkap a thimi cazin an langhter bal lo caah SAC lei in a thimi zat an thanhmi hmuh ding a um lo.
CDF Le Gangaw PDF Nih Mindat-Kyaukhtu Lam Ah SAC Ralkap Pathum An Hrilh Hna; Chin ramkulh, Mindat khua in a ṭummi SAC ralkap 200 hrawng cu CDF Mindat, CDF Kanpetlet le Gangaw PDF hna i bawm in Mindat-Kyaukhtu lam ah May 29 zanlei suimilam 1:40 hrawng ah an kah hna. Cu kahdohnak ah cun SAC ralkap pathum an thi i, CDF Mindat ralkap pakhat hliamhma a pu, tiah theih a si. Credite; The Chin Post