Monywa Hrambunh PDF Sakhan Pakhat Cu SAC Ralkap Nih An Hrawh Dih!
========
Sagaing ramṭhen, Monywa peng hrambunh Area 71 PDF sakhan pakhat cu SAC ralkap nih an luhhnawh i an hrawh pinah tualchung mi pakhat zong an thah, tiah theih a si. May 31 zinglei suimilam 8:00 hrawng ah Chaung U in SAC ralkap pawl cu Jummer motor pahnih he an chuak i, sakhan cu an luhhnawh, tiah Area 71PDF in ṭuanvo ngeitu nih a chim. SAC ralkap nih PDF sakhan cu an khangh ruangah hriamnam telh in kyats sing 300 man hrawng a rawk, tiah theih a si.
SAC ralkap nih ralphaw hman ding ah an tlaihmi pa pakhat zong an thah, tiah Area 71PDF nih cun an langhter. May 28 lio zong ah Monywa pengkomh, Ayardaw peng um Danger Force LPDF sakhan pakhat cu SAC ralkap nih an rak luhhnawh i kyats sing 300 man hrawng an khanghpiak hna pinah kum 50 tluk PDF ralkap nu pakhat zong an thah, tiah theih a si.
SAC Ralkap Nih Ywathit Khua An Khangh Ruangah Tualchung Mi 3,000 An Zaam; Sagaing ramṭhen, Shwebo pengkomh Khin U peng, Ywathit khua cu SAC ralkap nih nihin June 1 zinglei suimilam 5:00 hrawng in an khangh ruangah tualchung mi 3,000 leng an zaam, tiah theih a si.
Khin U peng, Ye U-Nyaungpinthar motor lam kam um inn 300 hrawng a umnak Ywathit khua cu SAC ralkap 50 leng le pyusawhti nih kahdohnak um loin an khangh, tiah Khin U peng thawngpang thanhtu phu in ṭuanvo pakhat nih a chim.
“Khuami hna cu zaam manhnak caan zong an ngei lo i inn zeizat a kangh ti zong theih khawh a si lo. SAC ralkap le pyusawhti hna cu Ywathit khua phungki biakinn ah an lut. Tualchung mi an tlaihmi hna zong an tam lai,” tiah a chimchap.
SAC ralkap le pyusawhti pawl cawlcanghnak ruangah Ywathit, Chantharkone, Nyaungpinchan, Segyi le Muthar khua in minung 3,000 leng an zaam, tiah theih a si.
Ywathit khua a khangtu SAC ralkap pawl cu May 31 zinglei ah Pindaung khuami hna facang cu leeng 20 tluk in Ye U khua lei i an kalpi lio ah PDF nih drone bomb lung 8 an thlakhnawh hna, tiah theih a si.
SAC ralkap nih nawlngeihnak an laak hnu in Khin U peng chung lawng ah khuate 74 an khangh cang i, inn 5,000 leng a ciam. Ralhrial in minung 30,000 tluk an zaam, tiah Khin U thawngthanhtu hna nih cun an langhter.
Hakha Baptist Association Hruainak In Composing Training (Hlaphuah Cawnnak) An Tuah; Hakha Baptist Association(HBA) hruainak in hlaphuah cawnnak(Coposing Training) ni thum chung an tuah, tiah theih a si. HBA hruainak in HBA Diamond Jubilee Hall ah hlaphuah cawnnak cu ni thum chung tuah a si i, Saya Hniang Ceu Ling nih a cawnpiak hna. Town Church vialte sawm dih an si i, an dihlak minung 20 an kai kho, tiah tualchung mi pakhat nih The Chin Post ah a chim.
HBA Diamond Jubilee Hall an sak hnu in hlaphuah cawnnak a voikhatnak an tuah hi a si. Church pakhat ah minung 2 tiang kai a ngah i, aa tel kho lomi zong an um, tiah theih a si. Composing training hi May 29 – 31 tiang ni thum chung an tuah i, zing suimilam 10:00 in 3:00 tiang cawnnak an ngei, tiah theih a si. Crdt;The Chin Post