BREAKING!! Min Aung Hlaing Nih Sawmnak A Tuah!!

Min Aung Hlaing Nih Sawmnak A Tuah!!
===================
Ramchung ah a um mi humhma zakip vialte cu voivoi khat in thancho ter dingah i zuam hna usih, tiah Min Aung Hlaing nih sawmnak a tuah. October ni 7 ah tuah mi Pyidaungsuu phu chungtel tonbiaruahnak ah a cung lei bantuk in Min Aung Hlaing nih a chim nak hi a si.

“Ram chung ah a um mi hmunhma vialte cu voivoi khat in a thancho khawh nak hnga ding caah aa pehtlai mi, tuanvo a ngei mi vuanci zung lei nih hmun zakip zung vialte he tuanvo lakti dingin theihter sawm kan duh hna.” tiah Min Aung Hlaing nih a chim.

Khuapi, khuate, khua le ram thanchonak aa thlau nak hi hmaimilh (Phisin) khawh dingah Policy suaisam a si ko nain hlawhtling in tuanvo lak khawh a si lo caah a tu tiangah a thangcho lomi hmunhma tampi an um, pinah SAC ralhrang nih hramhram in uknak an laak hnu in thanhchonak lei a zuarhma chinchin.

Dawei Ah Rallam A Sialmi SAC Ralkap Kah An Ton Caah Pathum An Thi, Tannintharyi ramṭhen, Dawei peng Wakone(ဝကုန်း) khua pawng Dawei-Htikhi lam cungah rallam a sialmi SAC ralkap hna cu kan kah hna i ralkap 3 an thi, tiah Dawei PDF nih an langhter.

A luancia October 6 zaanlei sml 1:30 hrawngah Myatta(မေတ္တာ) lei kap in Dawei lei ah ke le motor in rallam a sialmi SAC ralkap pawl cu Kawthu Lay Army Companny 3 le PDF hna nih an kah hna i kaphnih kar kahdohnak hi mins 10 hrawng a rau tiah theih a si.

Rallam a sialmi SAC ralkap cu kah an ton caah hriamngan, hriamhme le seh meithal in PDF cu an kah kah ko nain PDF ṭangṭi phu lei in a thimi le aa hliammi um loin hnu kan kir kho, tiah PDF ṭuanvo ngeitu pakhat nih a chim.

Monywa-Yargyi Toll Gate Pawngah SAC Ralkap Bomb Puahhnawh An Ton Ruangah 10 Hrawng An Thi, Sagaing ramṭhen Yinmarbin peng Monywa-Yargyi(ယာကြီး) lam meng 5 toll gate pawngah SAC ralkap motor cu PDF nih, nizaan October 7 zinglei sml 5 in 8 kar ah bomb lung 3 in an puahhnawh hna caah SAC ralkap 10 hrawng an thi kho i 15 hrawng hliamhma an pu lai, tiah theih a si.

“Motor lam cu ṭha tein kan cawh hnuah thir zum tampi le bomb lung 5 ṭem chihmi kan phum hna. SAC ralkap motor cu bomb kan phumnak an phanh ah kan puahhnawh hna i, ralkap 10 in cunglei an thi lai. Bawmtu ralkap an auh hna i, an rak phanh hlan lo hriamngan in an kan kah,” tiah Chu Mai Mai thawngpang fiangternak phu nih an langhter.

SAC ralkap skat motor le i khamnak motor pakhat cu Aung Zeyar tlangpar in Banbuai khua lei an kal lioah PDF nih bomb in an puahhnawh hna hi a si. SAC nih nawlngeihnak an lak hnu in SAC ralkap pawl cu Banbuai khua ah umhmun an khuarnak kum khat tluk a si cang. Banbuai khuami ralhrial 1,000 leng cu eidin tirawl an har ngaingai, tiah theih a si.

Pauk Peng Ah Rallam A Sialmi SAC Ralkap Cu PDF Nih An Kah Hna Caah 7 An Thi, Magway ramṭhen, Pauk peng thlanglei ah rallam a sialmi SAC ralkap pawl cu nizaan October 7 zing sml 8:30 hrawngah kah an tong, tiah theih a si.

Thit Ngi Naung(သစ်ညီနောင်) khua pawngah SAC ralkap 300 hrawng cu lam hruang in kan bawh hna i, kan kah hna, tiah People’s Defence Force – Yenangyaung in ṭuanvo ngeitu nih a chim. PDF ralkap hna nih bomb in an puahhnawh hna lawng si loin hriamngan in an kah hna caah SAC ralkap 7 hrawng an thi lai, tiah bawino San Shia nih a chim.

Cu kahdohnak ah People’s Defence Force − Yenangyaung, Pakokku pengkomh 12 Battalion, le YRF Battalion hna i bawm in an kah hna. PDF lei a thimi le aa hliammi an um lo, tiah theih a si.

Kalaymyo, Chin Mibawmchan Tu Phu Caah Hlutmi Motor Cu Palik Nih An Tlaih I Thlakhat A Ruah Tiangah An Pe Hna Lo!!!
Kalaymyo, Chin mibawmchantu phu caah an hlutmi motor cu, Shwebo checkgate ah a luancia September 1 ah palik nih an tlaih i, a tutiang an pe rih hna lo tiah theih a si.

Shwebo check gate a hngaktu palik pa nih motor khaltu cu, Chin maw na si? Kawl dah na si? tiah a hal i, motor khaltu nih cun, Kawl ka si ko tiah a leh. Cu palik bawi pa nih cun Chinmi cu silaw cu, hi kaa hmun ah hin kan thah colh hnga? Chinmi cu an dihlak in a kan dohtu an si.

Zei ruang ah dah, a kan dohtu Chin misual hna motor cu na khalh? Chinmi he maw i pehtlaihnak nan ngeih? Nang cu Monywa khuami na si ko caah kan in thlah lai i na motor tu cu kaa hin kan fim lai an ka ti ii kei tu cu an ka kalter than tiah motor khaltu nih cun a chim. Toyota Alphard motor cu, Chin mibawmchan tu phu caah, Yangon ah an cawk i, Monywa check gate ah an tlaih hi a si.

Paletwa Pengah SAC Ralkap Nih Siangniamrun Saya Pakhat An Tlaih, Chin ramkulh, Paletwa peng siangniamrun saya Maung Win Than le tualchung mi 3 hna cu Miletwa(မီးလက်ဝ) B.E.H.S sianginn lei an kal lioah Laung Kadu(လောင်းကတူး) hlei ah SAC ralkap nih October 6 zinglei sml 9:00 ah an tlaih hna, tiah theih a si.

“Amah he tlaih a tongmi tualchung mi 3 cu an thlah ṭhan cang hna. Saya Maung Win Than cu SAC ralkap nih a hmai ah puan in an ṭem i sml pakhat chung hrawng ke in an kalter hnuah an hren,” tiah amah he ai niahniam mi pakhat nih a chim.

Tlaing a tongmi siangniamrun saya Maung Win Than(40) cu Rakhine ramkulh Sittwe(စစ်တွေ) khua ah a ummi a si i, Paletwa peng Miletwa B.E.H.S sianginn ah saya a ṭuanmi a si, tiah theih a si. Tlaih a tong vemi pakhat nih, “An kan thlah hlan lo chung paoh cu kudawng pakhat ah an kan hren. Saya Maung Win Than cu zeiruang ah dah an tlaih i an thlah ṭhan hnga lo ti cu ka hngal lo, cun khoika dah an chiah i an hren zong ka hngal lo,” tiah a chim.

Chin Ramkulh Falam Khua Ah, SAC Nih Eidin, Mehhang Man Fawi Tein An Zuar Than!! Chin ramkulh SAC cozah le Northwest Regional Military Headquarter hna hruainak in, Falam khua Town Hall hmaiah, nizaan October 7 zinglei sml 7 ah, SAC kuttang riantuan tu hna nih man fawi tein eidin, mehhang an zuarh than hna tiah theih a si.

Cu ah cun, Falam pengkomh Chairman U Saw Htun, Captain Aung Myo Htwe, Palik bawi Myo Win le a dang dang hna nih an telpi ve hna tiah kan theih. Mipi le cozah riantuantu hna khuasaknak caah a thahnem lai tiin facang, Chiti, cite, khachuan, kalape, cawsa, voksa, arsa, arti tibantuk hna cu, man fawi tein kan zuar tiah SAC nih cun, an langhter.
Facang pi – 2 ah 4600 ks,

Mepe chiti 816 gram(၅၀ ကျပ်သား) ah 6000, cite bawmthum ah 1000, khohsuai bawmli ah 1200, khanchuansen cuaikhat(၁ ပိသာာ) ah 3500, khachuan rang cuaikhat ah (၁ ပိသာာ) 6000ks, aalu cuaikhat (၁ ပိသာာ) ah 2500, arti pum 10 ah 2000ks, caw/na sa cuaikhat ah 9600, voksa cuaikhat ah 9600, arsa cuaikhat ah 9600, kalape cuaikhat ah 4000 tiin man fawi tein an zuarh hna tiah theih a si. A luancia September zong ahkhan Falam khua ah SAC nih eidin, mehhang cu man fawi tein an zuar bal cang.

Global Zephai Nih Chin National Army(CNA) Cu Motor Le Computer Cawknak Ah Dollar 40,000 An Pek Hna Vawlei cung ramkip um, Global Zephai nih Chin ralkap CNA ca ah motor, computer le thilri dangdang an herh baumi cawknak ca ah dollar 40,000 an pek(hlut) hna, tiah theih a si.

Global Zephai nih CNA ca ah motor, computer le thilri dangdang a herh baumi cawknak ca ah dollar 40,000 nan kan pekmi cung ah lunglawmhnak tampi kan ngei, tiah Chin National Front (CNF) Headquater, Camp Victoria in Fianance and Revenue Department Office nih lunglawmhnak cathanh an chuah.

SAC Ralkap Nih Hriamngan An Kah Caah Tualchung Mi 6 Hliamhma An Pu, 2 An Hliamhma Faak, October 7 zaanlei sml 1:00 hrawngah Myinpia peng Pha Laung Pin(ဖလောင်းပြင်) khua ah SAC ralkap nih pehtlaiin hriamngan an kah caah khuami 6 hliamhma an pu. Cu chungah 2 hi an hliamhma a fah caah Pauk Taw sii-inn ah an kalpi hna, tiah theih a si.

SAC ralkap nih khuachung ah timh ciammam in hriamngan an kah caah Khine Soe(8), Aye Ngein San(15), Maung Thein(29) le Maung Win Htey(20) cu hliamhma an pu i, Than Maung(60) le Aung Win(33) cu an hliamhma a fak ngaingai, tiah theih a si. AA nih Kyat Sin(ကြပ်စင်) hlei pawng ummi SAC ralkap cu an kah hna caah SAC ralkap nih timh ciammam tein khuachung ah hriamngan an kah tiah tualchung mi pakhat nih a chim.

A luancia October 2 ah Myinpia le May Pung pehtlaihnak ca ah hman bikmi Kyat Sin hlei ah umhmun an khuar mi SAC ralkap nih khualtlawng mi cu lam an kham hna. Rakhine ramkulh, peng cheukhat ah SAC ralkap nih hriamngan le hriamhme kahnak ruangah August le September thla chungah ngakchia telhin a thimi 8 an si i, 20 leng hliamhma an pu cang.

CDM Sii Sayamah Cu Thailand Palik Nih An Tlaih I A Zamnak Ah Tiva Ah A Zuang I A Nunnak A Liam, Karen ramkulh ah CDM sii sayamah(nurse) Thein Ki cu October 7 ah Thailand ramri tan dingin tanglam in a kal, cu lioah Thai palik nih an tlaih i a zam, a zaam pah ah tiva ah a zuang i a nunnak a liam, tiah theih a si.

“Anih hi CDM a tuahmi a si, a vapa he Thailand ah rianṭuan ding in an kal lioah palik nih an tlaih hna caah an zam i tiva ah a zuang. Anih hi kum 25 hrawng a si i fa pakhat a ngeimi a si,” tiah a nunnak a liammi CDM sayamah a hawinu nih a chim.

“Nawlngeihnak a duh tukmi hna hi ka huat tuk hna. Nanmah ruangah ka hawinu zong a nunnak a liam. Mifim mithiam hna zong ramdang ah an zam dih, rammi cu kan hmailei chunmang a um ti lo,” tiah CDM sayamah a hawinu nih amah pumpak social media ah a tar.

KNU Nih Thaton Peng PDF Hna Cu Bu Khat Ah A Fonh Hna, Karen National Union (KNU), Brigade 1 hmunhma chungah a cawlcangmi PDF hna cu KNU nih bu khat ah a fonh hna tiah theih a si. KNU Brigade 1 cu Mon ramkulh Thaton peng ah a um i cu an hmunhma chungah a cawlcangmi PDF bu 24 hna cu nawlpeknak pakhat tangah tlukruang tein an cawlcangh khawh nakhnga tiin KNU nih October 3 ah khan bu khat ah a fonh hna.

KNU cunglei (central) chimnak nawlngeitu Padoh Saw Taw Nee nih “Thaton peng ah bu 20/30 hrawng an um tikah anmah cio in an cawlcangh ahcun buainak kan tong kho. Cucaah pehtlaihnak ṭha ngeih i tlukruang tein an cawlcangh khawh nakhnga bu khat ah kan fonh hna. A bik in kanmah nawlpeknak (command) tangah an um dingmi kha a biapi” tiah a chim.

A luancia September 21 ah khan KNU Brigade 1 hmunhma chungah a ummi dohthlennak hriamtlaibu pakhat a simi Kyaikto (ကျိုက်ထို) Revolution Force (KRF) nih Denko Company ngeihmi detsi phawrtu leilawng (motor) cu an tlaih i a khaltu le a zultu cu an hren hna pinah detsi kalan (gallon) 4,000 cu an zuar fawn.

Cucu hramhram tlaihkhih (kidnapping) phunkhat a si caah KNU Brigade 1 zulhphung buar a si tiin KRF hruaitu hna cu dan an tat hna. KRF zong nih dantatnak cu an cohlan i KNU Brigade 1 ukhruainak cu kan zulh lai tiah cathanh an chuah. Cu ruangah atu bantukin nawlpeknak pakhat ah PDF bu 24 hna cu an fonh hna nak hi a si. KNU Thaton peng Brigade 1 nih ṭuanṭi hawi hna zulh dingmi zulhphung 25 an ser i cu zulhphung a zulmi lawng ṭuanṭi hawi ah cohlan ding ti a si.

KNU Thaton peng Brigade 1 i ṭuanṭi hawi hna tlangtlaknak kawmiṭi (မိတ်ဖက်ရေးရာ ကြီးကြပ်မှုကော်မတီ) chungṭuan pakhat nih “Zulhphung chung an luh khawh nakhnga kan tlangtlak hmasa hna, ṭuanṭi hawi ah kan cohlan colh hna khi a si. Cu hnuah kan sinah phunglut sinak (register) an tuah.

Minung thazang, hriamnam thazang ti bantuk ṭha tein an langhter. Kan sinah phunglut sinak a tuahmi bu 30 hrawng an si. Zulhphung ṭha tein kan zulh lai a timi lawng kan cohlan hna. Bu 24 cu phunglut sinak kan pek cang hna. A dang cu a ruang zeimawzat ruangah kan pe kho rih hna lo” tiah a chim.

NUG Nih 2023 Ah Ralhmai 6 On In Dohthlennak Donghter Dingah Timhtuahnak An Ngei, National Unity Government (NUG) nih hmaikum 2023 ah ralhmai 6 on in dohthlennak donghter dingah timhtuahnak an ngei cang tiah NUG chimnak nawlngeitu U Nay Bone Lat nih October 7 ah a chim.

U Nay Bone Lat nih cun “Fiang tein ka chim khawhmi pakhat a um. Cucu a fiang zau dingmi thil a si. Donghnak biakhiahnak tuahtu kahdohnak caah cu kum cu kan i thim cang. A herhmi hna kha kan zate lungrual in kan chuahpi cio a si ahcun kan dihlak in kan duhmi, rammi hna nih kan duhmi SAC khongton uknak hrawh ding kha a tlamtling ko lai. Lungrual tein kan ṭan ahcun cu kumkhat chungah biafiang a lang ko lai. Ahodah a sung lai i ahodah teitu a si lai ti a fiannak kum a si lai” tiah a chim.

NUG nih ramchung hmunhma zatuak 50% renglo an uk khawh cang i tlangcung hriamtlaibu 8 he hnatlaknak an tuah khawh cang. Cu an ukmi hmunhma chungah uknak, biaceihnak le phungzulhnak hna zong ṭha tein an kalpi khawh i phung a zul lomi le ṭhatlonak a tuahtu hna hrennak caah caankarlak thong (lock-up) 20 an sak i sualpalhnak 100 renglo bia kan ceih cuahmah tiah U Nay Bone Lat nih cun a chimchap. A bik in Sagaing le Magwe ramṭhen ah khua tampi cu NUG nih an uk caah SAC uknak a rawk ti khawh a si cang. Kahdohnak hmun cheukhat ah vanlawng kahnak hriamngan zong an bunh khawh cang. Crd-The Chin Post