BREAKING; CNF nih nawlnak a tuah!!

CNF Nih Sawmnak A Tuah!!
=====================
Kan nu hrinram Chinland sersem nak ah nu le pa, miphun, biaknak timi thleidannak um lo in zapi in i teltum dih dingin CNA/F nih Chin mipi sinah nawlnak le sawmnak a tuah. CNA/F nih Chinland sersiamnak ah i teltum dih dingin sawmnak Poster cu mipi lei nih pakhat le khat, khat le khat sinah Sharing (phozar) ding, tiin sawmnak le nawlnak tuah a si.

Nu, Pa, Miphun, Biaknak’ ti um loin hlettlainak tuah khawh a si i, pehtlainak poster cu Phone number le emial lawng siloin Chinlandinformationcenter zongah hlethlainak tuah khawh a si nak kong zong theihternak an tuah. Salai Hte Ni phone no. +916909751721, +918798565564. Crd: Chinland Information Center

Relchap, OoBo Thonginn In Ramkhel Lei Thongtla 100 Hrawng A Thli In An Ṭhial Hna, Khuapau dohthlennak chung ah tlaihkhih a tongmi ramkhel lei thongtla hna chung in minung 100 hrawng cu Mandalay OoBo thonginn in hmundang ah a thli tein an ṭhial hna tiah theih a si. October 8, dei hlan deuh ah OoBo thonginn in ramkhel lei thongtla minung 100 hrawng cu kee 10 ngei motor in hmundang thonginn ah an ṭhial hna tiah, Mandalay ramkhel lei tuaktaan tu hna sin in theih a si.

OoBo thonginn in ramkhel lei thongtla minung 100 hrawng cu Shan ramkulh Ngyuang Shwe(ညောင်ရွှေ) thonginn ah an kuat hna tiah theih a si. A luancia thla zong ah Oe Bo thonginn in ramkhel lei thongtla hna cu Myinchain thonginn ah SAC ralkap nih an rak ṭhial cang hna, cun Yangon le Insein thonginn in ramkhel lei thongtla hna cu Tayawaddy thonginn ah an rak ṭhial hna tiah theih a si.

Matupi Pengchung Ah Hmanhmi Bomb Kong Ah CDF-Matupi Nih Thawngthanhnak An Tuah, Chin ramkulh, Matupi pengchung ah SAC ralkap nih hramhram uknak an lak hnu in tualchung kahdohnak cu atu le tu a cang i, kaphnih kar kahdohnak ah hmanhmi bomb ruang ah kum 6 ngakchia pakhat telh in minung 4 an nunnak a liam cang, minung pakhat bomb hliamhnak ruang ah a kee tanpiak a tong tiah theih a si.

SAC nih an hmanhmi bomb ruang ah minung 2 nunnak a liam i, minung pakhat nih hliamhma a tuar. SAC hriamngan kahnak ruang ah kum 6 tluk ngakchia pakhat a nunnak a liam, tualchung hriamtlai phu lei hmanhmi bomb ruang ah tualchung mi pakhat a nunnak a liam ve. Cucaah a bik in vawlei tang phummi bomb ruang ah tualchung mi hna cu ni fatin thinphang in an um tiah theih a si.

Bomb hmanhmi kong he pehtlaiin CDF-Matupi nih tualchung mi hna cu umkal i ralrin ding in le, leng chuah tuk lo dingin ralrin peknak an thanh ko nain, zing zaan pawcawmnak kong ruah ah tualchung mi hna cu leng ah an chuah tawnnak hi a si.

CDF-Matupi nih “dohthlennak caan a dih rihlo caah, bomb thianhhlimhnak kan tuah kho rih lai lo, bomb thianhnak seh a um cangko nain, kan mah lam thianhhlimhnak ca lawng ah hman a si rih, CDF-Matupi nih SAC ralkap lei hmanhmi bomb siseh,

kan mah hmanhmi bomb siseh kahdohnak a dih hlan chung cu bomb thianhhlimhnak kan tuah khawh rih lai lo caah mipi nih CDF-Matupi thanhca chuahmi cu ṭha tein nawl zulhding le, kahdohnak a chuahnak hmunhma le SAC ralkap nih rallam an sialnak hmunhma hna ah asi khawh ah cun kal lo ding le khualeng chuah lo ding hi a biapituk mi a si” tiah CDF-Matupi in ṭuanvo ngeitu nih a chim.

Minkin Peng Chindwin Tiva Ah SAC Ralkap Kahdoh An Tong, 5 An Thi, Sagaing ramṭhen, Minkin peng Chindwin tiva ah SAC ralkap cu kahdoh an ton caah SAC ralkap 5 an thi tiah Chindwin-Ranger nih an thanh.

SAC ralkap motor 13 cu Chindwin tiva an pal hnu, Taungphyu(တောင်ဖြူ) in an chuah tlawmpal, Hpatkhat(ဖက်ခက်) khualonh ah Chindwin Ranger, MKPDF battalion 2, ṭat-khua 3, MKPDF battalion 3, ṭat-khuai 3 phufonh nih October 11, zinglei suimilam 9:30 hrawngah an kahdoh hna. Kahdohnak hi suimilam cheu hrawng a rau i SAC ralkap 5 an thi tiah theih a si.

Kahdohnak chung ah a thimi ralkap hna cu Taungyataw(တောင်ယာတော) in Minkin lei ah tung-bing in an kalpi hna. Kahdohnak chung ah SAC ralkap motor pahnih in a khu fakngai an chuak tiah theih a si. SAC ralkap lei nih Chindwin tiva kam um khua hna cu an duhnak hmunpoh an kah caah Mataw khua in Caw cawngtu pakhat cu kuan nih a hliamh i a nunnak a liam tiah Chindwin-Ranger in ṭuanvo ngeitu pakhat nih a chim.

Banmauk Ah SAC Bomb Hmanhmi Lamhsualnak In Tualchungmi Nu 2 An Nunnak A Liam, Sagaing ramṭhen Banmauk peng ah SAC nih vanlei kahdohnak nihnih chung an tuah hnu in nihin October ni 11 ah kahdohnak a chuak ṭhan tiah theih a si.

Banmauk khua ah a luancia October ni 4 ah kahdohnak fak a rak chuak i SAC ralkap nih vanlawng in nihnih chung bomb an rak thlak. Cu kahdohnak ah cun SAC lei in a thi mi le ai hliam mi an tam pin ah hriamnam zeimawzat zong an rak laak bal cang tiah theih a si.

Cu kahdohnak a chuahnak pawng cu SAC nih bomb an hmanh dih caah meh hang kawl ah a chuakmi tualchungmi nu 2 cu SAC bomb hmanhmi lamhsualnak in an nunnak a liam i an chung le dang zong hliam an tuar, cun SAC nih duhpaoh in meithal an puah ruangah tualchungmi pakhat zong kuan nih a khen i hliam a tuar tiah tualchungmi hna nih an chim. SAC ralkap nih bomb an hmanhmi tampi a um rih caah tualchungmi hna nih ramlak ah i chawhvah lo dingin Banmauk Revolution nih ralrin peknak cathanh an chuah.

October 10, Ni Khat Chung Ah SAC Ralkap 80 An Thi, 20 Nih Hliamhma An Tuar Tiah NUG Nih Thanh, October 10, ni khat chung a cangmi kahdohnak ah SAC ralkap chungtel 80 an thi tiah National Unity Government-NUG nih cathanh an chuah.

SAC ralkap a thimi zat hi atu langhtermi nak in a tak ah a thimi an tamdeuh kho i, October 10 nikhat chung ah SAC ralkap 20 nih hliamhma an tuar tiah an langhter. NUG nih mah tein i runvennak ding ca thawngthanhnak a tuah kum khat chungah SAC ralkap chungtel 20,150 leng an thi cang i, 7,000 leng nih hliamhma an tuar tiah an thanhmi ah an langhter.

PDF le tualchung hriamtlai phu lei in minung 1,500 luan hrawng an nunnak a liam, SAC ralkap nih rampi huap in a hipkhawhnak hmunhma hi zat ceo hmanh a si tilo tiah NUG caan karlak president Duwa Lashi La nih a chim.

Monywa Ah Private Motor Chung Cuangmi SAC Ralkap Le Pyusawhṭi Bomb Puahhnawh An Tong, 2 An Thi, Sagaing ramṭhen, Monywa khua luhnak ah SAC ralkap le pyusawhṭi phu chungtel nih khalhmi private motor cu nihin October 11, chun suimilam 12:00 hrawng ah bomb puahhnawh an ton caah minung 2 an thi tiah Golden Egale Force-Monywa nih cathanh an chuah.

Monywa kah-ngiah-nah-nah(ကညန) zung in private motor he civil thuam i hruk in a chuakmi SAC ralkap motor cu Natluhtaitpan(နတ်လူထိပ်ပန်) sang, Minkyaung(မင်းကျောင်း) lampi ah padeta bomb lung nga puahhnawh an tong tiah theih a si.

Bomb puahhnawh an ton caah an i citmi motor kee cu a choi i, motor lu lei zong a sop dih. Motor hmailei ah a cunagmi SAC ralkap 2 zong a hmun ah an thi colh, minung pakhat nih fakngai in hliamhma a tuar tiah tuanvo ngeitu nih a chim.

Monywa Economic Bank Hmai Ah Tualchung Mi Pakhat Meithal Kah A Ton Caah A Nunnak Liam, Sagaing ramṭhen, Monywa Economic Bank hmai ah, SAC ralkap kahdoh an ton hnu in tualchung mi pakhat cu meithal kah a ton caah a nunnak a liam tiah Monywa khuami nih an chim.

A luancia October 9, chunhnu suimilam 2:30 hrawng ah Monywa, khua helnak lam le general Aung San lam kam ah ummi Myanmar Economic Bank hmai ah SAC ralkap hna cu Myanmar’s Royal Dragon Army(MRDA) nih bomb puahhanwh an kan doh hna tiah MRDA nih October 10 ah cathanh an rak chuah.

Kahdohnak a dih hnu ah SAC ralkap lei nih tonghmang loin meithal an kahnak ruang ah tualchung mi pa pakhat kuan nih a hliamh caah a nunnak liam tiah tualchunh mi nih an chim. Mi bawmchantu phu chungtel pakhat nih meithal kahnak ruang ah nunnak liammi pa cu October 10 zinglei ah Myananda(မြနန္ဒာ) thlaan hmun ah kan vui tiah a chim.

Taze Kahdohnak Ah SAC Ralkap 20 Nak Tlawmlo An Thi, Hliamtuar An Tam, Sagaing tamṭhen, Taze peng Shweṭa(ရွှေတ) khua pawngah rallam sialmi SAC ralkap le Taze PDF kar ah October 11, zinglei suimilam 9:00 hrawng ah fakngai in kahdohnak a chuak. Cu kahdohnak ah cun SAC ralkap 20 nak tlawmlo an thi i, minung 20 hrawng nih hliamhma an tuar tiah theih a si.

Minung thazaang 100 hrawng he rallam sialmi SAC ralkap le pyusawhṭi phufonh hna cu Bu Ti Sait(ဗိုလ်သိစိတ်) hruaimi Taze PDF, Shwebo pengkomh battalion 6, battalion 7 le tualchung hriamtlai phufonh hna nih hriamngan, hriamhme le sniper in kan kahdoh hna tiah ral hmaikal ralkap pakhat nih a chim.

“Kahdohnak thawkka ah SAC ralkap 6 ruak hmuh an si, hmai an fon rih caah kan kahdoh ṭhan hna i minung 4 an thi ṭhan, 20 leng nih hliam an tuar, cun sniper kahnak in pakhat a thi ṭhan. SAC ralkap hna hi a hlan tei a thimi an ralkap ruak hi hloh an duh caah an phurh peng” tiah tualchung hriamtlai phu lei in ral hmaikal ralkap pakhat nih a chim.

Mie Sedap Khoh-suai Ah Telhmi Hmathak Nih Cancer A Chuahter Khawh Caah Singapore Food Agency Nih Zuar Ti Lo Dingin An Kham, Mie Sedap ready made khoh-suai ah telhmi hmathak chung ah rungrul thahnak dat aa tel tiah hmuh a si caah, zuar tilo ding in Singapore Food Agency(SFA) nih 2022, October 11 ah cathanh an chuah.

Singapore ramchung ah a lutmi cu ready made khoh-suai phun ah rungrul thahnak dat simi ethylene oxide cu hmathak chung ah an telhchih tiah hmuh a si caah, zuar tilo ding in October 6 ah khan an rak langhter.

Ni hin October 11, tiang zarh khat chungah thawng thanhnak voithum tiang chuah a si cang i, Mie Sedap khoh-sui phun 6 cu zuar tilo ding in an hnon ter hna. Ready made khoh-suai chung ah telhmi hmathak ah telhchihmi ethylene oxide cu, cancer zawtnak a chuahter khotu dat pakhat a si tiah theih a si.

Nay Pyi Taw Lai Fumtomnak Bu Nih A Voi (1)Nak THO An Tuah, Kawram khualipi Naypyitaw khua ah Lai Fumtomnak Bu nih a voi (1)nak Tho an tuah tiah theih a si. THO tuahnak hmun ah Naypyitaw khuapi chungum mi Laimi (Hakha/Thantlang) inn 62 leng chungin minung 160 hrawng an chuak kho i hlunghlai ngaiin an tuah khawh tiah theih a si.

“Naypyitaw ah hin Laimi a si ko mi zong nih Laimi nih kan ngeihchun THO tuah hi an rak thei bel hna lo i a tuah zong rak tuah a si bal lo, tutan hi a voikhatnak kan tuah khawh a si” tiah tuanvo ngeitu pakhat nih a chim. Tukum a voi (1)nak an tuah mi THO caah a dihheu mi dihlak cu Pu Thla Bik te chungkhar nih tuanvo an laak piak dih hna tiah theih a si. Crd-The Chin Post

Taze Peng Kahdohnak Ah PDF Ralkap 4 A Tlaumi An Ruak In An Char Hna, Sagaing ramṭhen, Taze peng Deyauk(ဒယ်ရောက်) khua pawng ah October 8 lah Sagaing hrambunh Tatma 33 SAC ralkap le PDF kar kahdohnak a chuak i, PDF ralkap 3 an thi i 4 an rak tlau.

A tlaumi PDF ralkap 4 cu October 9 le 10 ah an ruak in kan char hna, tiah Ye U-Pah Kah Phah in ralkap pakhat nih a chim. October 9 ah Taze PDF ralkap 3 cu an ruak in kan char hna. October 10 ah Ye U-Pah Kah Phah in ralkap Thura Shwe cu Ye U peng khuate pakhat leikuang ah a hliamhma he a ruak kan char, tiah a chim chap.

“PDF ralkap Thura Shwe cu Ye U peng hmun pakhat ah a ruak in kan char. A phone aa put ko nain a phone cu a thlau ta. Thlau hlah sehlaw kan pehtlaih khawh hnga i, kan khamh khawh ko hnga. Kannih cu ka umhmun ah him tein kan zam kho,” tiah Ye U -Pah Kah Phah in ralkap pakhat nih a chim.

SAC ralkap Tatma 33 cu Deyauk khua ah ni thum umhmun an khuar i, nihin October 11 zinglei ah Shwe Tagye(ရွှေတကျေး) le Khapaung Kyaing(ခပေါင်းကြိုင်) khua lei ah rallam an sial, tiah theih a si.

Myaung Peng Ah Khuate Pahnih A Khangtu SAC Ralkap Motor Cu An Kir Leiah Bomb Puahhnawh An Tong I Ralkap 6 An Thi, Sagaing ramṭhen, Myaung peng ah khuate 2 a khangtu SAC ralkap pawl cu an kir lei ah an motor citmi cu PDF nih bomb an puahhnawh hna caah SAC ralkap 6 an thi, tiah theih a si.

Myaung peng Nyaung Kar Yar(ညောင်ကားယား) le Panngio(ပန်းညို) khua a khangtu SAC ralkap pawl cu, motor 12 in an kir lei ah Myingyan-Nabu Ai(မြင်းခြံ ,နဘူးအိုင်) lam ah Myingyan(MGN 35) Guerrilla phu nih, bomb lung 5 ṭem chihmi in kan puahhnawh caah SAC ralkap motor 7 an rawk i ralkap 6 an thi, 20 leng hliamhma an pu, tiah Myingyan 35 Guerrilla phu nih cathanh an chuah.

SAC Ralkap Tilawng Cu PDF Nih An Kah Caah SAC Ralkap Officer Pakhat Telh In Ralkap 7 An Thi, Sagaing ramṭhen, Kani peng Chindwin tiva thluan in a kalmi SAC ralkap tilawng cu, PDF nih an kah caah SAC ralkap officer 1 telh in ralkap 7 an thi, tiah theih a si.

SAC ralkap tilawng cu October 6 ah Kani khua in a chuak i, ṭangṭi PDF nih an kah hna caah zaanlei sml 2:30 hrawng ah Uhmah(အုမ္မ) khua ah an riak. October 7 zinglei sml 7:00 hrawng ah an chuak ṭhan i, Taungkulung(တောင်ကိုးလုံး) chaklei an phak ah 60mm telh in hriamngan in an kah ṭhan hna caah SAC ralkap officer 1 pakhat telh in ralkap 7 an thi, tiah theih a si.

Khin U Ah Umhmun Khuarmi SAC Ralkap Cu PDF Nih An Kah Hna Caah 13 An Thi, Sagaing ramṭhen, Shwe Bo pengkomh Khin U peng Ywathit Kone(ရွာသစ်ကုန်း) khua ah umhmun khuarmi SAC ralkap le pyusawhti cu October 9 zinglei ah PDF nih an kah hna, tiah theih a si.

SAC ralkap le pyusawhti 50 hrawng nih, umhmun an khuarnak ah October 9 zaan sml 9:12 tiang kan kah hna i, ralkap 13 an thi, tiah Local Defence Force-Khin U in ṭuanvo ngeitu nih a chim. A luancia October 1 lio zong ah Ywathit Kone khua in a chuakmi SAC ralkap pawl cu Innpat khua pawng ah Local Defence Force – Khin U phu nih bomb an rak puahhnawh hna caah SAC ralkap 6 an rak thi.

ShweBo Ah SAC Ralkap Phurtu Motor Cu PDF Nih Bomb Lung 16 An Puahhnawh Caah SAC Ralkap 7 An Thi, Sagaing ramṭhen, Shwe Bo peng ah SAC ralkap phurtu ke 12 ngei motor pakhat cu, bomb lung 16 in kan puahhnawh caah ralkap 7 an thi, tiah Burma Rangers (ShweBo) nih an langhter.

A luancia October 8 zaanlei sml 5:00 hrawngah Kyauk Myaung peng ṭhen in Shwe Bo lei ah ruahkham(မိုးကာ) a hring an khuhmi motor pakhat cu, Shwe Bo peng Kawywa(ကော့ရွာ) khua lam ṭhen, ah Burma Rangers (ShweBo) phu nih bomb lung 16 in an puahhnawh, tiah theih a si.

Cu bomb puahhnawhnak ah SAC ralkap 7 a hmun ah an thi i, 20 leng hliamhma an pu. SAC ralkap nih hriamhme in an kah ko hna nain PDF leiin a thimi le aa hliammi an um lo, tiah theih a si. SAC ralkap nih duh paoh in meithal an kah caah Shwemi(ရွှေမိ) dawr pawng ah tualchung mi 1 le Minkyawng(မင်းကျောင်း) khua pawng ah tualchung mi 1 hliamhma an pu, tiah Burma Rangers (ShweBo) nih cathanh an chuah.

Ukraine Ram Khualipi Cu Russia Nih Vanlawng Hmangin An Kah Caah Ukraine Rammi 10 Hrawng An Nunnak A Liam, A luancia zarh ah bomb puah nakin a rawk dihmi Crimea hlei kong lehrulh chamnak ah nizaan October 10 ah Russia nih Ukraine khualipi Kev khua chungah vanlawng in bomb an thlak, tiah theih a si. Ukraine ram Kev khualipi, mi an tamnak hmun, pangpar dum le khualtlawngmi an umnak hmun ah Russia nih hriamngan in an kah hi a si.

Russia nih hriamngan kah ruangah Ukraine rammi 10 hrawng an nunnak a liam i, Ukraine ram hmun tampi ah electric mei a rawk dih, tiah Ukraine ram nawlngeitu hna nih cathanh an chuah. Russia nih Ukraine khuapi ah hriamngan in an kah ruangah Ukraine nawlngeitu hna nih ralrin peknak dar an tum i, rammi hna cu anmah le si khawh tawk cio in an i runvennak an ngei cio, tiah theih a si.

Russia president Vladimir Putin nih, Ukraine nih Russia ram chungah kahdohnak a tuah rih ahcun lam hlatpi in kah khawhnak missile bomb in ka kah cang hna lai, tiah a tlerh hna.

Malaysia Kal Aa Timmi Myanmar Rammi 15 Cu Thailand Nawlngeitu Nih An Tlaih Hna, Thailand ram thlanglei Yanaung pengkomh ah Kawthaung(ကော့သောင်း) in Thailand ah a kalmi Myanmar rammi 15 cu, nizaan October 10 zinglei ah Thai nawlngeitu nih kan tlaih hna, tiah No. 25 Thailand ke ralkap nih cathanh an chuah.

Yanaung peng Sauksaram(စုက်စာရမ်) hmunram Nakha khua pawng ah Myanmar rammi phurtu motor pakhat cu Thailand ram nawlngeitu hna nih a hlan kan in a thawngpang an theih caah October 9 zaan sml 11:00 ah Thailand ram Yanaung pengkomh ah hram a bunhmi No. 25 ke ralkap hna nih an tlaih hna, tiah theih a si.

Phannga(ဖန်င) pengkomh Khuraburi hmunram lei ah a kalmi Myanmar rammi a phurtu motor cu Thai ralkap le nawlngeitu hna nih lam pakhat ah kan tlaih hna, tiah an langhter. Thai ralkap le nawlngeitu hna nih, Myanmar rammi pa 9 le nu 6 an tlaih hna pinah Thailand rammi kum 44 motor khaltu zong an tlaih, tiah theih a si.

Tlaih a tongmi Myanmar rammi 15 cu Kawthaung in Thailand ram ah tilawng in an kal i, Malaysia ah kal aa timmi an si, tiah Thailand nawlngeitu hna nih cun an langhter. Thailand le Maylaysia ah kal ai timi Myanmar rammi 300 leng kan tlaih cang hna, tiah FED nih an langhter nain hi nak tam deuh zong an phan kho, tiah theih a si.

SAC Palik He Kahdohnak Ah YDF Ralkap Bawi Bik Changtu Le YDF Ralkap Pakhat An Nunnak A Liam, Magway ramṭhen, Gangaw peng chaklei Kyunkhonethar(ကျွန်းခုံသာ) khua pawng ah Yaw Defense Force(YDF) ralkap bawi bik changtu Ko Phyo le YDF ralkap pakhat cu an pahnih in cycle he an kal lio October 9 zaanlei ah SAC palik 8 he an i tong i, hmaitonh in kahdohnak a chuak, tiah theih a si.

Cu kahdohnak ah YDF ralkap bawi bik changtu Ko Phyo(21) le YDF ralkap 1 an nunnak a liam. SAC kuttang palik Deputy Sergeant Ye Win Aung a thi ve i, palik 2 cu an phei le an baan ah hliamhma an pu, tiah theih a si. YDF ralkap bawi bik changtu le ralkap pakhat an ruak cu nizaan October 10 zinglei ah an vui hna, tiah theih a si.

North Dagon Ah Motor Pakhat Bomb Puah Ruangah Motor Khaltu Fak Tukin Aa Hliam, Yangon ramṭhen, Dagon khuathar Sittaung(စစ်တောင်း) City Mark hmai ah zaanlei sml 4:30 ah motor pakhat chungin bomb a puah caah motor khaltu cu fak tuk in aa hliam, tiah tualchung mi hna nih an chim.

Nizaan October 10 zaanlei sml 4:30 ah Honda Fit motor a sen mi chung in bomb a puah caah motor khaltu cu fak ngaiin ai hliam, a ke 2 in tan ding a si pinah, a hmai le a ṭaang ah bomb pelpawi nih a hliamh, tiah theih a si.

“North Dagon Sittaung City Mark hmai ah bomb puah thawng a thang. Zaanlei sml 4:30 ah voihnih a puak i minung pa zeizat dah an thih ti cu ka hngal lo. Bomb nih a hliamhmi hna cu an thi ko lai,” tiah tualchung mi pakhat nih a chim. Cu bomb puahnak ah hliamhma a pumi motor khaltu pa cu sii-inn ah an kalpi i, SAC ralkap nih North Dagon peng vialte cu lam an kham i checkhlatnak an tuah, tiah theih a si. Crd-The Chin Post