Thawngpang Chia Fonh!!
=============
Sagaing ramṭhen Myinmu peng Lattaukdaw(လက်ထုတ္တော) khua cu SAC ralkap nih May 6 ah luhhnawh in an khangh caah khuachung inn 500 leng a kangh pin ah khua mi pakhat mei kanghnak in a nunnak a liam tiah tualchung mi nih an chim.
Inn 600 hrawng khuasaknak Lattaukdaw khua cu SAC ralkap nih an khangh caah inn 500 leng a ciam, inn 80 hrawng lawng a tang cu pin ah tualchung mi Ko Aung Soe(kum 40) cu mei nih a kangh chih caah a nunnak a liam tiah an chim.
Lattaukdaw khua he meng khat tluk aa hlatnak hmun ah tualchung hriamtlai phu le SAC ralkap kar kahdohnak a chuah hnu ah SAC ralkap cu khuachung ah lut in tualchung mi umnak inn an khangh tiah khua mi pakhat nih a chim. SAC ralkap nih khuachung an khangh lio ah a zaam manh lo mi hna cu an tuk velh hna, phone le an thilri zong an chuh hna. Khuachung inn an khangh hnu chunhnu suimilam 2:00 hrawng ah SAC ralkap cu khuachung in an chuak tiah tualchung mi nih an chim.
Myanmar ram pumpi huap ni 6 chung ah Covid-19 zawtnak aa chawnh mi 1000 lengtiang an phan tiah ngandamnak lei vuanci zung nih cathanh a chuah. May thla ni 1 in May 6 tiang ah Covid zawtnak aa chawnh mi dihlak hi 1005 tiang an phan i, cu chung ah May 7 tiang Covid zawtnak ruang ah mi 3 an nunnak a liam tiah mi bawmchantu phu hna sin in theih a si.
” Sizung ah zohkhanh mi an si i Covid zawtnak in an nunnak a liam tiah fehter a si caah Covid zulhphung in an ruak zong vui an si. Covid zawtnak in nunnak liam mi hna chungkhar zong zawtnak check an si ve nain SAC kuttang um ngandamnak lei vuanci zung nih cun zawtnak ruang ah nunnak liam mi cazin a langhter lo” tiah ruak vuitu ah aa tel ve mi bawmchantu phu chungtel pakhat nih a chim.
Covid zawtnak ruang ah nunnak liam mi pakhat hi kum upa cang mi a si i, Hinthada in Pyi sizung thlopbul a si nain May 1 ah Covid zawtnak in a nunnak a liam. Adang pakhat hi Hintada sizungpi ah si aa thlop nain, Covid zawtnak in a nunnak a liam ve tiah theih a si. Cun adang pakhat hi Mahlaing in Mandalay sizung ah thlop mi kum upa cang mi pa pakhat zong nihin May 7 ah Covid -19 zawtnak in a nunnak a liam tiah mi bawmchantu phu sin in theih a si.
Covid zawtnak ruang ah nunnak liam mi hna kong he pehtlai in ngandamnak lei vuanci zung nih phungning tein cathanh chuahmi a um rih lo tiah theih a si. Kachin ramkulh Hpakanh khua ah pa 2 cu May 6 ni ah thah an tong tiah khua mi pakhat nih a chim. “Tuzing ka pa 2 a thi mi ruak cu hmuh an si than, mei thal in kah mi an si, a thi mi pa 2 cu mizei an si timi theih an si rih lo” tiah a chim.
May 5 ni zongah Hpakanh peng Sia-yaw-khah khua pawngah pa, minung 2 cu nam in mizei theih lo mi nih thah hna pin ah mah ni lila ah Hpakanh khua chungah SAC ralhrang nih pa 2 cu cycle cung an kal lio ah meithal in an rak kah hna i an rak thi fawn tiah kan theih.
Pyin Oo Lwin peng, Taung yatanar sang cu SAC ralhrang nih May ni 8 ah hramhram in hrawh dih ding in nawl an chuah caah sangmi mipi hna nih anmah te in an inn an hrawh dih hna, tiah tualchung mipi nih an langhter.
Taung yatanar sang cu an dirhnak kum 40 lengkai a rau cang i, hrawh ter an sinak a ruang bik cu Myin Aung Hlaing fapa sizung saknak ding caah a si, tiah tualchung mipi nih an chim.
“May ni 5 lio ah a voi khatnak hrawh ding in nawl an chuah lio ah SAC ralhrang bawi le a kuttang hna cu motor 2 he a rak ra i, hrawhpiak nan si tik ah vuivai lo le lehrulhnak tuah lo dingin mipi chimhchnawhnak a rak tuah hna. Cu hnu ah SAC ralhrang motor pakhat in a rak ra ṭhan i, hrawhpiak nan si ṭhan lei lo ti ah an au nain May ni 8 ah an hrawh ṭhan hna, SAC ralhrang pawl zeihmanh zumhawk an tlak lo, mipi dehhlen lawng an rian” tiah tualchungmi pakhat nih Khit Thit Media ah a chim.
Taung yatanar sang hi inn 1,200 leng a umnak sang a si, Gram inn pawl le Meter Box tampi a hmumi inn zong an tampi, atu cu mah inn cio hrawhdih a si caah mipi hna harsatnak phunkip kan tuar, tiah tualchung mipi nih an langhter.
May 6 Naypyidaw ah tuah mi Academy laksawng peknak puai ah a kal mi lemcang U Aung Thar cu Yangon an kir lei motor cung ah ruah lo piin a thi tiah kan theih.
May 7 zinglei suimilam 8 tluk ah a thih hi a si. “Motor cung an kai ka ah ka ba tuk tiin a chim lengmang, tlawmpal ah bawmchan tu sii lei riantuan an phak tik ah cun a nunnak a liam cang” tiah lemcang pakhat nih a chim.
“May 6 zan ah a paw that pah lo caah ekinn ah a kal, a kum zong upa a si cang, a chungkhar zong kan pehtlaih khawh cang hna” tiah a cunglei upa nih a chim.
U Aung Thar cu nupi ngei lo in a u nu he Shwepyithar khua ah a um mi an si, a mah cu kum 74 a si ah a tubantuk in a thih hi a si.