Bochok Tun Myat Naing ralkap Nih Min Aung Hlaing ralhrang an phomh than cang hna timi Thawngpang Kongah

Bochok Tun Myat Naing ralkap Nih Min Aung Hlaing ralhrang an phomh than cang hna timi Thawngpang Kongah
================
Nihin November 9, 2021 ah Rakhine ramkulh Tamanta khua le Yinyoynga khua karlak ah Rakhine ralkap Arakan Army (AA) hriamtlai phu le ralhrang phu pawl an i kap, tiah khuami sin in thawngthei asi. Rakhine ralkap AA le ralhrang hna karlak ah kahdoh nak hi 2020 thawk khan an ngol i atu hi avoi khat nak kahdoh nak an ngeih than asi, tiah khuami pakhat nih cun achim.

Cun, Nihin suimilam 11:00 leng hrawng in meithal thawng le bomb le hriam ngan thawng kan theih. An i kah chung hi suimilam cheuchung hrawng cu arau lai, tiah Yangon khit thit media sin ah khuami pakhat nih cun achim chapnak kong cu theih a si.

Cun khuami adang pakhat nih cun kawl ralhrang hna nih Arakan Army (AA) hriamtlai phu umnak hmunhma ah an rak lut i an kah hmasa hna caah atu bantukin kahdohnak achuah hi asi, tiah thawngtheih chap a si.

Arakan Army (AA) hriamtlai phu chimphuannak nawlngeitu Khine Tuhkhah sin ah Yangon media nih kahdohnak kong he pehtlai in biahalnak an ngei ko nain, zeitluk fak in dah an i kah timi thawng fiang tein chim khawhmi a ngei rih lo, tiah thawngtheih a si.

CHRO nih Chin ramkulh le Kawlram nitlak lei ah a cang mi nuhrin covo kong Embassy upa biaruahnak a ngeih hna. Chin Human Rights Organization (CHRO) nih Kawlram chung ah a ummi Ambassador hna le Embassy in upa hna cu Chin ramkulh, Sagaing le Magway ramthen ah a cang mi nuhrin covo buarnak kong le cu nih a chuah pi mi mipi hartonnak, IDPs kong biaruahnak a ngeih hna tiah kan theih.

Hi biaruahnak cu Denmark Embassy thithruainak le hohatnak in 9 November 2021 ah sml pahnih chung tuah mi a si i Denmark Ambassador le CHRO in Salai Bawi Lian Mang le Salai Za UK Ling nih a bik in biachimnak le biaruahnak an ngeih hna.

“Hramhram in uknak a la mi Min Aung Hlaing le a ralkap nih hriamnam thazaang in an kan det cuahmah. Sualnak ngei lo tampi an thih pin ah kan inn le lo tampi an hrawh, an kan khanghpiak. Kan biakinn le biaknak he aa pehtlai mi inn lo an kan hrawhpiak, khanghpiak.

Kan ram le inncia ah um awk tha ti lo in kan zam. Din ei, bawmnak, le kan nunnak caah a herh mi phanh khawh lo ding zeizongte an kan phih dih. Hi bantuk in Chin mi le Sagaing le Magway ah kan ton mi kong ah ramdang cozah nih zeitin tawlrel ding, khuakhan ding ti hi laklawh in an um ve. Cu kong cu a bik in theih an duh caah Denmark Embassy nih an kan tawlrel piak hi a si,” tiah Salai Za Uk Ling nih a chim.

“A bik in Chin mi kan nunnak le nun himnak caah India cozah nih kutka faakpi in a hun a hau. Mizoram cozah cu unau tiin zeipaoh a kan don. Timhcia in an um. Asinain, an duh tluk in Indian cozah lei nih pawlisi in a tlaih ve hna caah an cawlcang kho lo.

Cun ramdang cozah le INGOs lei luhnak zong Indian cozah nih kan duhning in a hung lo. Cucu ramdang cozah pawl nih India cozah lemsoi in atu kan mipi hartuarnak le tem-innak bawm khawhnak a um nakhnga bia kan ruah hna. A rak kai mi cozah palai (Embassy upa) zong nih kan i zuam lai, India cozah bia kan ruah hna lai an ti caah kan i lawm hringhran,” tiah The Chinland Post ah a chim chih.

CHRO biaruahnak ah Denmark Embassy, British Embassy, German Embassy, Japan Embassy, Australian Embassy, EU Embassy, Finland Embassy, New Zealand Embassy, US Embassy, Switzerland Embassy, Italy Embassy, France Embassy, Norway Embassy, Embassy of the Kingdom of the Netherlands, Sweden Embassy le Czech Republic Embassy hna hna in Ambassadors, tuanvo ngeitu upa hna le UN zung in UN Secretary-General Envoy on Myanmar, OCHA le OHCHR palai an kai kho hna tiah kan theih.

UK nih Kawlram kong ah UN Security Council meeting a auh; Nihin an tuah lai. Kawlram kong ah UN Security Council ah tuanvo ngei tu UK nih November 5 in khan UN Security Council Meeting tuahding ah a auh i, nihin (8 November) tuah tuah ding in biachahnak an tuah.

Hi lakhruak meeting hi Security zungzal chungtel (Permanent Member) a si mi US ram le caankarlak UN Security chungtel Maxico nih zapi theih khawhnak ding in UN Security meeting tuah an duh nain Tuluk nih a leng mi ngaih lo in “Private Meeting” tu in tuah ding a ti caah anmah chung lawng in Kawlram kong ceihmaihnak an ngei lai.

Atu bantuk in Kawlram kong ah Security Council auhpiak ding ah tuanvo ngeitu UK cozah cu CHRO hruainak Chin zatlang bu nih October 26 ah siseh, Thantlang an kaangh in CHRO nih October 29 ah le CHRO le Progressive hruainak in Kawlram zatlang bu 500 renglo nih November 4 ah Chin ramkulh le Kawlram buainak kong ah lakhruak (emergency meeting) auh ding in thanhca an rak chuah.

Hi kong he pehtlai in CHRO in Salai Za Uk Ling nih, “UN Security Council tuah ding in UK nih lakhruak meeting a van auh caah kan i lawm. Hi auhnak ah aa zuam mi Chin zatlang bu, Kawlram zatlang bu cung zong ah lawmh a um. Zatlang bu nih kan tuah khawh mi cu Security Council auhpiak tiang lawng a si. A phichuak cu phundang a si ko hnga. Atu bantuk in lakhruak meeting an kan auhpiak hi an aw-aan an ngaih le kan kongkau biapi ah an chiahnak a langh caah zatlang bu kan auhnak kan hlawh a tling ko,” tiah The Chinland Post ah a chim.

Aluancia October 25 ah CHRO le British cozah biaruahnak an ngeih lio ah CHRO nih Security Emergency meeting auhpiak ding in an rak chimh kong, British cozah nih November thladongh i caan-hman meeting an ngei tik tu ah Kawlram kong agenda ceihte ding in an i timh kong Salai Za Uk Ling nih a peh chah.

“November thla dih ah UN Security caanhman ton pumnak a um tikah Kawlram kong kan ceih te lai tiah British cozah nih an kan ti. Lakhruak meeting auh cu a fawi lo. Cu lakhruak auh ding ah UK in MP pahnih nih an Parliament ah biahalnak zong an rak tuah. Cu tikah UK cozah nih a biapi taktak mi a um ahcun sml 48 – 72 a hlankan in auhnak nawl kan ngei.

Cu ban tuk thilcang a um ahcun sml a tlawmbik 48 – 72 caan pek in kan thanh te uh tiin British cozah nih an rak kan leh. Atu Thantlang thil kan vun ton i zatlang bu pawl fonh in halnak kan tuah i lakhruak meeting an auh colh tikah mipi le zatlang bu lei in kan tuanvo a tlamtling, kan hlawh a tling ko,” tiah Salai Za Uk Ling nih a chim.

Atu lio UN Security Council chungtel hna cu Permanent Member in US, UK, Frace, China, Russia le kumhnih dan tuanvo pek in Estonia, India, Ireland, Kenya, Mexico, Niger, Norway, Saint Vincent and the Grenadines, Tunisia le Viet Nam hna an si. Credit: The Chinland Post