Chin Mi Nih Kan Theih Duh Lo Bik Mi Thawngpang Chia Fonh-Chin Ramkulh March Le April Thla Chung Ah SAC Raltuknak Vanlawng Nih Bomb 121 Leng A Thlak; Mipi 24 An Thi
=========
2023 March le April thla, thla hnih chung ah Chin ramkulh ah SAC ralhrang raltuknak vanlawng nih Bomb 121 leng a thlak tiah Chinland Information Center nih May 8 ah thanh ca an chuah. Hi thla hnih chung ah vanlawng Bomb thlak hnawhnak in CNA ralkap minung 2 telh in mipi 24 an nunnak a liam i minung 33 hliam an tuar. Mah pin ah Khrihfa biakinn 4 telh in mipi inn 50 leng a rawk.
Mah thla hnih chung, Chin ramkulh khua 4 ah Bomb 22 leng a thlak i a dang Bomb 99 cu khua kiangkap ah a thlak tiah cathanh chuah mi ah an langh ter chih. Myanmar ram chung buainak aa thawk 2021, 2022 kum nakin Chinram chung SAC nih Jet Fighter hmang in bomb a thlak hi 2023 kum chung ah bomb a thlak le a kah a tam deuh tiah theih a si. 2021 kum le 2022 kum ahhin cun Jet Fighter in bomb a thlak hi voi 20 fai lawng a si nain 2023 kum chung January thla in nihin May 8 ah Jet in bomb a thlak hi voi 150 leeng a si cang tiah CHRO nih a chim.
Hi kong he pehtlai in CHRO rian ngeitu pakhat nih, “Kum dang nakin tukum chung hi Chinram chung ah Jet Fighter a hman a tam deuh. A thlak zat hi voi 150 leng a si. A bomb a thlak mi incun bomb 300 fai a si i mipi nunnak liam zong an tam,” tiah The Chin Post ah a chim.
Bomb a thlak le a kah ruang ah Thantlang Peng, Khuafo khua siseh, Tlanglo khua siseh, Hakha Peng Malsawm khua le Vantlang khua siseh, Falam Peng Waibula khua, Ramthlo khua siseh, Mindat Peng chung siseh inn le lo rawkral mi zong an tam tiah theih a si.
Hi kong he pehtlai in, Mindat peng chung khuami pakhat nih, “Kan nih Mindat peng hi Jet hmang in an kan kah an kan thlak a tam. Khuami zong hliamtuar le nunnak liam a tam. Khuami tam deuh cu khua ah um ngam ti loin ramtang ah zaammi zong kan tam,” tiah min langhter duh lo pakhat nih The Chin Post ah a chim.
SAC ralkap nih Jet hmang in mipi a kah hna nak kong ah, “SAC nih hin tanglei cun an kan tei ti lo. Ralkap thazaang lei in an kan tei ti lo ca ah mipi hi aa tinh mi a si lai tiah ka ruah. Mipi ka thah hna lai an inn ka khangh lai i hnu an ka chit lai ti aa ruah ca ah mipi aa tinhmi a si.
Asinain, mipi nan lung a zor lo mipi nan tha a chia lo, kanmah ralkap kan tha a chia lo kan lung a zor lo, kan tei hrimhrim lai,” tiah min langhter duhlo mi ralram um pakhat nih a chimchap. 2023 kum chung SAC nih Jet Fighter hmang in mipi kahnak ruang ah mipi a thi, hliam a tuar le inn rawkral a tam tiah theih a si.
May thla zarhkhat nak ah Thailand ram in Malaysia ram ah a kal mi motor pakhat cu khawndennak an ton caah Chin miphun minung 3 an nunnak a liam tiah kan theih. Thailand ram Hat Yai pengkomh ah motor khawn den nak a chuah hi a si. Hi motor cungah Myanmar mi 15 an si i cuchungah Chin miphun 13 an i tel, minung 2 cu Kawl miphun an si.
Chin miphun a thi mi chungah Mara 1, Ngaphaipi 1 le Paletwa mi 1 an i tel hi a si. Hi chungah minung 5 hliam an tuar i siizungah an tlop lio hna a si. Mah pin ah hliamtuar lo minung 7 zong thonginn pakhat ah an chiah hna.
Mah hna pawl cu Chin Community Bangkok nih tawlrel piak dingin an i zuam lio zong a si. Myanmar ram buai hnu in rian a har caah Thailand le Malaysia ram ah hlawh fa in a kal mi an tam i a tubantuk in motor khawndennak le tlaih khih zong a tu le tu an tong hna.