Biakinn I Kan Thawh Cangmi Cheuhra Cheukhat Cu Pathian Ta A Si Ti Maw?

BIAKINN I KAN THAWH CANGMI CHEUHRA CHEUKHAT CU PATHIAN TA A SI TI MAW?
==========
Mipi nih kan hmuhmi cheuhra cheukhat cu PATHIAN nih ‘ka ta a si,’ a ti (Lev 37:30). ‘Ka inn ah rak pu u,’ a tibantukin, kanmah le kan biakinn cioah kan chuahpi hna (Mal 3:10). Biakinn i chuahpi cangmi, PATHIAN ta cheuhra cheukhat cu, PATHIAN nih, ‘tonnak thlam chung i an rianțuan man ah Levi mi kha ka pek cang hna,’ a ti (Nam 18:21, 24). PATHIAN nih Levi mi kha a pek cang hna ahcun, Cheuhra cheukhat cu Levi mi hna ta a si ve cang.

Levi mi nih cheuhra cheukhat an hmuhmi chungin cheuhra cheukhat cu BAWIPA sinah an pek țhan lai i cucu tlangbawi ngan Aaron kha an pek lai a ti (Nam 18:28-29). Cheuhra cheukhat cu, Dawttu PATHIAN nih a rianțuantu hna le a zaangfahmi hna, mipem, pangeilo le nuhmei hna i zohkhenhnak caah a halmi hna kha a si. Biakinn saknak le biakinn zohkhenhnak te hna a dang tein thawh a si (Exo 24:2-8,30:15).

PATHIAN ta cheuhra cheukhat, PATHIAN nih a rianțuantu hna a pek țhan cangmi hna chaw cu, a rianțuantu hna nih annun khawhnak caah le an nun i khamhnak caah an hman tikah PATHIAN ta an hman a si ti lo. PATHIAN nih a pekmi hna anmah ta an hmantu a si cang. Kanmah le kan ngeihmi dihlak; kan ram, kan miphun, kan thilri le hriamnam hna he BAWIPA ta kan si.

THANTLANG KHUA A UMMI NIH AN RAK PALH MI LE KHUAPI DANG ZONG NIH KAN I RALRIN DING MI! Thantlang khua a kangh cu, Khuachia hna nih an duah caah a si ko. BAWIPA PATHIAN nih a kan remhpi țhan lai i țha chinchin le dawh chichin in kan remh țhante ko hna lai.

Salm 127:1 ah kan hmuh bantukin, BAWIPA nih khua kha a ven lo ahcun a ti bantukin, khua vengtu, PATHIAN THIANG THLARAU kan cung i aa lawmh lo sual ahcun, hngilh loin khua kan vennak hna hi santlailo an si ko lai.

Thantlang khua a ummi hna nihhin THIANG THLARAU an lawmhter lo ti cu, KHRIH Lamkaltu ka sinak in ka chim ngam. THIANG THLARAU an lawmhter lo caah, PATHIAN nih dan a tat hna ka ti fawn lo. THIANG THLARAU aa lawmh lo caah, a venpi ti hna lo i khi bantuk tiangin khuachia hna nih chiatnak an tuah khawhnak khi a si. Kan veite zong nih an i ven sek ko nain mu, THIANG THLARAU nih a ven lo hnu cun khuachia ven cu a har ko.

Thantlang khua ummi mipi sualpalhnak hi biapi bik a si lo. Khuanu khuapa hna sualpalhnak le khuami mipi hna sualpalhnak a aiawhtu, Khrihfabu hruaitu hna le khua aiawh thlacamtu hna an sualpalhnak hi THIANG THLARAU a lawm ter lotu le a ngaihchiat tertu bik cu a si.

Zeidah an sual i an palh? BAWIPA PATHIAN nih a thlahmi a lamkaltu/chitithuhmi hna kha Khrihfabu hruaitu hna nih siseh, thlacam hruaitu hna nih siseh, an upat hna lo, zei ah an rel hna lo. An thangchiat hna i an pheu hna, an hrial hna i an hnon hna. “PATHIAN nih an kan umpi cio ko, anmah tel loin, kan kal kho tuk ko hna,” tiin, PATHIAN thlahmi alamkaltu/chitithuhmi hna kha daw ti loin, an hnon hna!

Hihi a thlahtu hna dawtlo, upat lo le hnon kha a si. Hihi, Thantlang khua nih THIANG THLARAU a lawmhter lonak a biapi bik cu a si. khua a veng kho lomi Thantlang khua khrihfabu hruaitu lengluang hna le thlacamtu hna nih khan, BAWIPA PATHIAN Hmai ah faakpi in rak i țhum tuah u law, rak i phuang tuah u. Miphun caah, PATHIAN thlahmi alamkaltu/chitithuhmi hna hi zeitluk indah an biapit ti kha cathiang chungin zoh țhan hna u.

Chinmi Khrihfa vialte nih, PATHIAN rian pei ka țuan cu tiin, pastor țuan le Khrihfabu hruaitu si le Thlacam hruaitu si hna hi i lap ti hna hlah u sih. Khua le ram le Khrihfabu a veng kho lomi, PATHIAN rianțuantu lengluang hna hi kan ram le kan miphun le Khrihfabu nih a herhmi an si hna lo.

BAWIPA PATHIAN nih miphun caah a thlahmi alamkaltu/chitithuhmi hna hi zeitluk indah an biapit le, Khrihfa mipi hruaitu tlangbawi/pastor hna nih zeitluk indah PATHIAN an țih ti hi a biapit mu. Hi pahnih hi rem te i a kal ți khawh ko ahcun, khuachia hna cu kham an si lai i khua le ram le Khrihfabu cu PATHIAN nih a kan venpi lai i a him lengmang ko hnga. An rel khawh cio nak hnga share chin hna, KHRIH Lamkaltu, Tluang Lian (Martar).