Biakinn ah Bawipa thangṭhat dingah na phak tikah hi bantuk dirhmun na phak ahcun

Biakinn ah Bawipa thangṭhat dingah na phak tikah hi bantuk dirhmun na phak ahcun!
===========
Biakinn ah Bawipa thangṭhat dingah na phak tikah hi bantuk dirhmun na phak ahcun, Na thluak rianṭuanmi normal asi ti lo. Na thinlung duhnak na control kho ti lo. Na thlarau muihnak chungah a um rih. Na kut hrim nih a lem tuk cang. Caan hman naa palh!

Hi bantuk damnak caah sii a um lo caah Doctor te nih an damh kho lo. Thiang Thlarau lawng damter khotu asi.
Thiang Thlarau nih na thinlung an thlen lo ahcun na taksa duhnak cu naa sum khawh caan sum khawh lo caan asilai i hitihin na nun a liam thai te ko lai.

Harsatnak le fahnak thil kan tonmi nakin taksa nuamhnak thil hi ṭihnung deuhmi an si. Zeicatiah kan ithei lo buin, duhsahtein kan taksa, thinlung, thlarau a kan thah cuahmah!

Hi heih kantih bikmi cu si cu, nule pa ralrin bak a hauko cang ai a cirin kal a fale zawng an kal ve tisi cu. i ralrin kan hau ko. Awl nak in cun Bawipa dawtnak tak tak an co rih lo caah si ee. Hi dirhmun phak hi cu hell chung luh he ai naihtuk cang.

Naa theihminak leng in Bawipa nih tampi an kilven i thluachuah an pek hi philh hrim hlah. A zungzal ilawm ko. A zungzal in an kilven lai i, a zungzal in thluachuah an pek ko lai. Nawlngai lomi nih harsatnak an ton ahcun ingaihchihnak nih a zulh hna. Nawlngaimi nih harsatnak an ton ahcun thluachuahnak nih a zulh hna.

Na nun a rawk ciami, caan tampi na rak hlohmi kha a hramthok in sersiam ṭih hrim hlah! A tlai hrimhrim lo. Bawipa nawlngaih tu ithim. A velngeihnak a dong kho lo.

Bible nih innpa dawt a chimmi (Luke 10:25-37). Innpa dawtnak kong hi Bawipa dawtnak thinlung in a rami asi. Cu Bawipa dawtnak thinlung nihcun a nawlngaih duhnak thinlung ngeih asi i, a nawlngaih duhnak thinlung nih innpa/ral asimi hna tiang rikhiahmi ngeih loin dawt khawhnak thinlung a pek.

Israel miphun le Samaria miphun hi chunglei le lenglei he zumhnak kong he aa ralchan taktakmi an si. Damiah nih an ṭeihmi pa, an velhmi pa hi (Jews) miphun asi. Asinain Jews miphun asimi lila “tlangbawi” nih a hmuh. Asinain zaangfah thinlung cu a ngei ko lai. “Aw zaangfak taktak asi” ti tiang cu a ti kho men. Asinain innpa dawtnak thinlung a ngei lo i tuahserhnak um loin a kal taak ko. Cun Levi mipa zong hi Jews miphun lila asi ṭhiam tlangbawi bantukin innpa dawtnak a ngeih lo caah a kaltaak ṭhiamṭhaim ko.

Asinain Samaria mipa nih a ral asimi Jews miphun an velhmi pa kha a hmuh tikah, Miphun thleidannak thinlung a ngei ti lo. Peng/tlang thleidannak thinlung a ngei ti lo. Holh thleidannak thinlung a ngei ti lo. Khrihfabu thleidannak thinlung a ngei ti lo. Zumhnak thleidannak thinlung a ngei ti lo. Ministries, organzations, denominations, communities thleidannak thinlung a ngei ti lo.

A hmuhmi cu an velhmi pa, a lenglei nih a thuammi muisam “colors” kha zoh loin “minung asinak” i a temhinnak, a fahnak le chanh a hauhnak dirhmun kha a zoh tikah innpa dawtnak thinlung a ngeih khawhnak asi. Lenglei in aa thuammi, a muisam colors in cun zoh sehlaw, Ka miphun asi lo. Jews miphun cu ka ral asi. Kan Khrihfabu aa dang. Kan peng/tlang aa dang. Kan zumhnak aa dang. Kan thlacam bu asi lo. Kan ministries, organizations, denominations, communities rianṭuan ṭi hawi asi lo. Kan ibunhmi, kan ipekmi min aa dang. Hi pa hi a ka ral ngaimi le a do ngaimi asi. tiah “keimah he kaa sai lo” tiin kaltaak khawh asi. Zeicahtiah a miphun lila thlangbawi le Levi hmanh nih an kaltaak.

Van chap chih ka duhmi cu, Samaria mipa nihhin an velhmi pa a bawmh lai ah Camera in a tla hmasa lo. (a ngeih lo zong asi lai) Social media: Facebook, Instagram ah a bawmhnak kong a post lo. (A tuah lo ca si lai) Phaisa zeizat dah ka liam piak i ka bawmh, ka pek ta ti a post hrimhrim lo. (Internet um lo ca asi lai)

Chim ka duhmi cu Bawipa mit hmuh le Amah mit hmuh te ah thinlung dawtnak he diriam tein le dawtnak thinlung ngei tein a tuah/bawmh ko. Cucu Bawipa sin in a rami innpa dawt cu asi. Cucaah Khrih nih thilṭha nan tuahmi zumlotu hna an tuah bantukin va tuah hlah uh! A thlitein nan Pa Pathian mit hmuh ah tuah u tiah kan ral dawtnak le pek/bawmhnak kong (Matthai 5-6) cungah a kan cawnpiak cu asi.

Bawipa nih thluachuah an pekmi, na kut cungah a ummi kha thleidannak thinlung ngeih loin na tuah khawh tawk tein bawm/pe ve hna. Pek awk, bawmh awk na hmuhmi le na theihmi kha tlangbawi le Levi pa bantukin lanh taak ve hrim hlah! Samaria pa bantuk thinlung thleidannak ngeih loin zuan hnawh ve. Khakha Bawipa duhmi le cohlaanmi asi.

Asinain na tuah/bawmh/pek hna tikah zumlotu nih an tuahmi bantukin siloin Khrih cawnpiaknak le a nawlngaihnak in va tuah! Bawipa sin in dawtnak asi ahcun mi zapi nih an theih/hngalh a herh lo. A thlitein pek a duhmi le a thlitein a hmutu Bawipa nih an fialningtein tuah law a thlitein thluachuah tampi an pek ṭhan lai. Credit: James Vanneilian