Benjamin Sum Nih CNDF Hriamtlai Phu Sakhaan ah kan ralkap pawl thazaang a va pe Hna!

Benjamin Sum Nih CNDF Hriamtlai Phu Sakhaan ah kan ralkap pawl thazaang a va pe Hna!
===========
Myanmar Idol Season 4 ah pahnihnak laksawng a comi hlasakthiam muidawh tlangval Benjamin Sum cu Chin National Defense Force hriamtlai phu sakhan ah a va kal i, thazang peknak le hlasak piaknak in caan sunglawi a va hmangpi hna, tiah thawngpang theih a si.

Chin National Defense Force (CNDF) sakhaan ah kan ralkap pawl thazaang a vung pemi Benjamin Sum. Chin miphun chungin hlasakthiam minthang kan ngeihmi hna Benjamin Sum hi atu avoi khatnak a kal a si men lai. David Lai zong anmah Mara hriamtlai phu sinah a rak kal bal ve cang.

Benjamin Sum cu uar a um tuk hringhran Ko. Chin miphun caah Bawipa nih thluachuahnak pe chin sehlaw, lam in hruai chin ko seh, tiah thlaza kan cam piak.

Panglong hnathlaknak kan i tlaih rih ko: KIO Vice-Chairman. Kachin miphun hriamtlai phu Kachin Independence Organization (KIO) in Vice Chairman nih Panglong hnatlaknak (Panglong Agreement 1947) kan i tlaih ko riah tiah a chim.

Ramkomh Kawlram zalonnak ngah khawhnak ding ah, Tlangcung miphun le Kawi miphun aiawh in General Aung San telh in tuahmi tonpumhnak ah Tlangcung miphun hna nih 1947 ah rak tuahmi Panglong hnatlaknak kha kan cohlan rih ko tiah KIO Vice- Chairman Gam Shawng nih tlangcung miphun hna aiawh in 2022 February 12 ah kum 75 camtuak ah, NUG hruainak in tuahmi Panglong hnatlaknak ni sunglawi ah a chim.

Cozah nih chan khat hnu chan khat Panglong hnatlaknak cu an duh poah in an mernak zong a chim chih. 2008 phunghrampi kha i tlaih in Federal ramkomh sernak ding nawl cu ram i ṭhencheunak a si tiah an rak i khamh. General Aung San nih ramkulh (State) covo, miphun ngan nih hip lonak le State i ṭhen khawhnak biakamnak a kan ngeihmi cu tlangcung miphun hna nih a tutiang kan i tlaih rih ko tiah a chim fawn.

National Unity Government (NUG) a cozah le National Unity Consultative Council (NUCC) nih 2008 phunghram cu a rawk cang tiah a thanh caah Federal lampi cu a hungong cang tiah a chim. NUCC zong nih Panglong hnatlaknak a buar ruang, a luancia caan vialte chung rak hremnak ruang le, thleidannak ruang ah tlangcungmi vialte kan ngaithiam uh tiah cathanh a chuah.

Pu Zing Cung: “Hramhram Ralkap Uknak Ahram in Bongh le Federal Democracy caah Mizapi Dohthlennak A Si Philh Hlah Usih” 2022 January 27 ah tuahmi NUCC Mipi Tonnak (People Assembly) ah Chin National Front (CNF) Chairman Pu Zing Cung nih biachimnak a ngeih mi chung in a tlaknak in kan hun lakmi a si.

Dawtmi Hruaitu upa le Tlangcung miphun vialte hna, National Unity Consultative Council (NUCC) hruainak in tuahmi People Assembly ah Interm Chin National Consultative Council (ICNCC) aiawh in biachimnak caanṭha ka hmuh caah ka lawm tuk hringhran.

Tulio caan hi luatnak (zalonnak) le dinfelnak a duhmi mizapi vialte hna kan caah tuanbia ṭial tlak ni a si. 2021 February 1 thok in Kawl ralkap cu mitam deuh duhnak kalh in hramhram uknak a lak kum khat a tling deng cang. Ralkap nih hramhram in mi tlaih-thah, tlaihhrem, mipi thilri chuh le biaknak lei inn pawl kha tinhmi ngei tein a hrawh len caah ram pumpi ning in harnak kan tuar.

Sihmanhsehlaw, Kawlram pumpi lungrual tein kan dohnak zong kum khat a tling ve cang lai. A nemnak tein duhlo-langhternak in kan thok ko nain Kawl ralkap i a sual tukmi a tuahsernak ruang ah a tu ahcun ram pumpi huap in hriam kan tlaih caan tiang a phan cang.

Kan nih Chin miphun hna zong nih Chinram le Chin miphun hna aiawh in mah tein khuakhan lairelnak le a tlukruang mi Federal Ramkomh (pi) serkhawhnak i ruahchan in ICNCC hi kan rak dirh.

A tu bantuk caan tiang kan dothlennak (pi) a kal khawhnak hnga riantuan duhlo in a nuarmi Civil Disobedience Movement (CDM) a tuahmi vialte, nu le pa vialte hna, Generation Z pawl, hriamtlai phu pawl, tlangcung hriamtlai pawl, ramkhel lei palai pawl, mipi cawlcangnak phu pawl le ram caah a nunnak pe in ral a tu mi hna le a lam kip dirkamh in temhnak a ing mi nu le pa vialte nan cung ah CNF chairman min in upatnak kan pek hna.

Hramhram uknak hrawh cikcek le Federal Ramkomh pi serkhawhnak caah ramkhel, Chawleh, pawngkam humhminnak hramhram uknak hrawhnak he aa pehtlai mi zulhphung le tuaktannak, i thlennak (အသွင်ကူးပြောင်းရေး) he aa pehtlai mi biaruahnak pawl vialte a tu People Conference thok in rianṭuan ṭi ding in ruahchannak ka ngei. Mah Conference dih cun mipi pawl nih an i ruahchan mi a phichuak ṭha le hmailei Federal rampi ser khawhnak lam a chuahpi lai tiah zumhnak ka ngeih caah a rak chuak khomi upa pawl vialte le aiawhtu nan thinlung, ruahnak, thazang dihlak in rianṭuan ṭi ding in kan sawm hna.

Nihin caan i kan tuahmi dothlennak hi hramhram uknak a rawh cikcek i Federal rampi sernak ding caah mipi hruaimi dothlennak a si kha philh hna hlah u sih.

Kanmah CNF le ICNCC zong mipi duhnak he aa tlak in hramhram uknak hrawh cikcek ding biakamnak he kan doh. Hi dothlennak a ṭhawn khawh chinchin nak hnga mipi hna zong nih kanmah le kan si khawhnak lam cio in i teltum ding ah kan sawm ṭhan rih hna. Credit: The Chinland Post