Australia student visa zeidah a lawh lai a fiang kho rih lo!

Australia student visa zeidah a lawh lai a fiang kho rih lo!
=========
Australia student visa zeidah a lawh lai a fiang kho rih lo. Kannih zong visa kan sawk nak thlakhat leng a si cang nain result a chuak rih lo. Agent dang zong visa result a ngahmi an um rih lo.

Zeihmanh a fian rih lo caah visa sawk a duhmi nih agent sin ah sianginn man pek rih lo a tha bik. Sianginn man na pek cang ahcun zarh hnih chung ah CoE an in chuah piak hrimhrim a hau. Sianginn man na pek cang ko nain CoE na ngah rih lo cun na agent nih na phaisa kha free tein amah pumpak duh herhnak ah a hman chung a si kho.

Tulio thlachiat ruat loin mi hlen a hmangmi an karh tuk caah i ralrin ngai cio a herh. An chimmi poah kha tha tein kherhhlai hmasa loin zumh colh lo a biapit tuk caan a si.

Malaysia kalnak kong aka halmi nan tam ngai caah hika zapi theih ding in ka vun tial. Thaizing kip April 1 thawk in visa sawk khawh asi cang lai. Kanmah Yangon zung zong nih visa sawk kan in bawmh khawh ve.

Covid vaccine chunh cia a hau, health insurance le vanlawng ticket (kir lei he) cawk a hau. Ticket man ah $400 deng a dih lai. Kal hlan ah Covid test a hau fawn. Malaysia ah quarantine luh a hau ti lo. A dihlak a dih ding hi ting 15 hrawng a si lai.

Kan zung nih retheiman agent fee ting 2 lawng kan lak. Visa ngah tiang a herhmi poah kan in tawlrelpi lai.
Pehtlaih nak: 09259044574 (Shelly Sui) 09796486552, 09442000351.

Meithal puah le Meithal cawknak phaisaa thawh lawng Dothlennak tuah ah a ruatmi hna sin cakuat. Dawtmi unau hna, Hi ka ca tlangtar nih dothlennak caah cawlcaangtu hna sualphawtmi a lawh sual ah cun ka theithiam hram u tiah nawl hmasa kaan duh hna. Dothlennak tuah hi lam tampi a um i kan zapi tein meithal puahtu si awk kan ttha lo, phaisa thawhtu si awk a ttha ve lo. Nain mikip nih a tu lio ah hin dothlennak thazaang thawn tertu kan si kho ti hi kan i fian cio a herh. Meithal puah le phaisa thawh lawng hi dothlennak ah rel i a dang cawlcanghnak zei rel lo in a ummi unau cheukhat hna sin ah hi ca kuat hi ka ttial duhmi asi.

Nihin kan ram a rawh lio ah mipi nih kan i ruah chan bik mi cu caan tawi te ah teinak hmuh i Federal Democracy ram ser a si. Nain teinak tling kan hmuh khawh ding ah zei can dah a rauh lai timi le fawi tein kan tei khawh lo sual ah kan sungh lo ding in zeidah kan tuah lai timi timhtuahnak ngeimi kan tlawm. Hi ah philh awk a ttha lomi cu kan hruaitu cheukhat nih thlakhat lawng a rau lai, thlathumlawng a rau lai, R2P a ra lai i kan tei colh lai tbk in an rak chim. A si nain, a tu cu kum hnih chung kan lut cang.

A tu zong hi cheukhat nih meithal thazaang a tthat ah cun kan tei colh lai tiah an ruah i hriamtlai kan unau hna le hriamnam caah phaisa chuah lawng hi teinak tling hmuhnak taktak nak lam ah kan ruah. Nain kan tei ah zei tin kan i hruai lai timi le meithal cawk ding ah a tlawmbik thla 3, 4 a rau ti hi a hngaltu le a ruattu kan tlawm. Meithal tlaimi minung Chin ram ah 50000 hrawng kan umnak ah ral do tak tak hi hriamnam tlamtlin lo ruang ah 1000 le 2000 hrawng lawng kan si tihi a theimi kan tlawm.

A si ah cun Budget kongkau ah hriamnam cawknak lei in budget kan hmanmi nakin kan ralkap hna ei ding le aa hliammi kan cawmmi hna nak ah budget tam deuh a dih ti hi a hohmanh nih kan i fiang lo. Zei a si poh ah kan cawlcanghnak hi Budget kan chuah khawhmi thazaang he thluk in dothlennak kan tuah lo ah cun kan dothlennak caan sau a nguh kho lai lo ti hi i fian a herh.

Tahchunhnak ah Hriamtlaimi pakhat nih financial sources cu thlakhat ah $ 5,000 a ngei nain hriamtlaimi nih minung resources a ngeimi hi 2000 leng asi caah $ 5000 cu ei le din hmanh a za lo. Cu caah hriamnam cawknak chinchap cu phaisa a um lo caah ral doh awk a ttha lo. Cu tik ah minung 2000 leng thazaang cu hriamnam ngei minung 10 hmanh a thluk ti lo. Hi dirhmun hi a tak tak in kan tonmi asi caah hi kong lei hi biatak tein hriamtlai bawmchaantu kip nih zohfel tthan hrim a herh.

Hi dirhmun ruang ah mino a bik in Kawlram tanghra aung cia mi tampi cu India ram ah an rak lut. Mizo ram university nih sianginn sang kainak nawl a pek, cun New Delhi ah free in sianginn kai khawhnak UNHCR nih a tawlrel piak hna. Cu tik ah ramthumnak um cheukhat nih an nau le India ram a phanmi cu fimthiamnak an cawnter hna i ram le miphun caah tthathnemnak chuahpitu si ding in an bawm hna. Phaisa thazaang chuah in an nau le an fa le hna cu an zoh khenh hna. Hi bantuk in an fanau le hna hmai lei lamtlau lo ding in teimatu hna hi dothlennak pakhat tuah asi ti hi langhter ka duh.

A ruang cu mipi nih ralhrang kut in luat kan i timh lio ah Ralhrang nih mino pawl fimthiamnak cawngthiam loin hrut dih hna seh tihi an duh. Hmai lei ram a tthat zong ah ram le miphun caah rian ttuantu taktak ngei loin um hna seh ti hi an saduh thah asi. An ruahchannak ngan bik cu mipi nih kan tei hmanh ah an mah le mah buaibainak a chuak lai i kan mah ralhrang hna kut cung ah uknak phan tthan seh, a si lo ah kanmah fa le hna le kan tefa hna lawng fim hna seh law, kan fa le hna le kan tefa hna hruaimi bu le party ah hmailei uknak phan tthan seh ti hi a si.

Cu caah ralhrang hna nih cun a tu lio ram buaibainak ruang ah mino tampi fimnak cawng thiam loin kan um hi an i lawmtuk ti hi theih cio a herh. Ralhrang fa le hna zoh ah cun kawlram sianginn hmanh si loin ram sangsang in degree sangsang ngei lawng te an si hna. Cu tik ah mino fimthiam sang kan ngeih lo ah cun ram a tthat zong ah Ralhrang hna fa le hna le tefa hna nih hruaimi party le hruaimi bu tang ah kan zapi tein kan lut tthan dih kho tihi ruah cia hrim a herh. Cu caah nihin ram tthat lo ruang ah a vaivuanmi mino phaisaa thazaang chuah in sianginn a kai tertu nan dihlak kaan lawmhtuk hna. Nan fanau hna an si nain ram caah ruahchannak pakhat a si caah lawmh lo awk a ttha lo.

Hi lio caan ah ramthumnak um cheukhat cu hriamtlai ah le hriamnam ngei lo le fimcawn awk a ttha lo timi dirhmun ruang ah India ram ah a rak zaam mi kan nau le kan fa le hna zohkhenh kan daithlaang. Dothlennak caah phaisaa ka thawh ka har tuk tiin nau le hna a vaivuanh tertu kan tam. Hi hi ralhrang hmuitinh a si mi mino fim hna hlah seh timi a tlamtlin tertu nan si. Cu caah “meithal puah le hriamnam caah phaisaa thawh in dothlennak ka tuah tiah a ruatmi” timi tlaangtaar in nan sin ah ca kan kuat hna. Nan nau le nan fa le an si nain ram le miphun caah ruahchannak phurtu an si caah khua thuk piin kan ruah piak hram u.

Cheukhat nihkan fa kan nau hna New Delhi ah Biaknak lei hmanh nih cohlan lomi Bible sianginn ah phaisaa le caan dih ter in kan chiah hna. Cheukhat nih zei sianginn hmanh kaiter loin New Delhi ah Rian nan ttuanter. Bible Sianginn kong he pehtlai in tlawmpal chim ka duhmi cu, a tu Delhi ah M.Th, M.Div tbk Degree la in biaknak lei zong ah rian ttuan kho lo, pawcawmnak lei zong ah Degree nih tthathnem nak ngei loin kum 7,8 caan a pe sualmi tampi an um.

Hi mino vialte hna hi New Delhi ah Ramkip nih pompi mi Free sianginn hna ah kai hna sehlaw a tu lio cu ram le miphun nih bochanmi Degree le fimthiamnak ngeitu an si dih cio cang hnga. Nain caan le phaisaa dihheunak menmen le caan tawituk in khua ruatmi hna kan tam tuk caah kan nau le tampi an vaivuan. Ziah mittha lo nih kumkhat te ram a hruai ruangah zeitluk in dah kan ram a rawh ti kan hngalh, kumkhat leng kan vaivuanh ruangah kan ram ah zeitluk in dah harnak kan ton timi kanhngalh ko buin kan fanau hna vaivuan rih ding in kan sian hna. Kumkhat hnih vaivuanh rih ding in kan sian hna ngam.

Fimthiam nak ngeimi minung tlawmtuk kanngeih ruang ah hitluk kan ram a rawh hi kan lung a kan fimter khawh hnga lo. India Cozah nih pompi mi sianginn ramkip nih cohlanmi fimthiamnak Certificate free bak in kan ngah khawh lio ah Bu nih cohlan lomi Bible sianginn kai le a herh lonak ah kan fanau hna caan a lak in kan dih ter hna. Ram hruaitu a si kho ding kan nau le rian kan luhter hna i phaisaa hnu kan dawiter colh hna. Ruat tthan hrim uh. Hi tining tein cun kan ram ah teinak kan hmuh hmanh ah Ralhrang fale hruaimi Bu le Party hna ah kan rak ton cia mi harnak philh dih in a nuam dingmi dirhmun kan phan te lai. Cu caah dothlennak taktak cu tampi a um i kan tei lo hmanh ah kan sungh lo ding i zuam usih.

Kan fanau hna fimthiam sang ngeihter zong hi dothlennak pakhat a si ti i fiang hram usih. Cu caah meithal puah le phaisaa thawh lawng hi dothlennak ah ruah hi kan ram a fahter chinchin mi ruahnak a si ti hi i fian cio a herh. Zeitluk in dah Chinmi lak ah dothlennak kan i fian lo tiah cun hliamhma tuarmi kan ralkap hna New Delhi an phanh tikah a zoh hmanh zoh loin Hriamtlai tu caah tiah heh fund raising tuah in hriamtlai bu hna sin in Certificate hmuh khawh kan i zuam.

Phaisaa thazaang chuah khotu si ah cun Ram caah rian ttuantu tak tak in ruah i ruahnak, thazaang le caan tampi pek in dothlennak tuahtu zei rello phun in um tbk. Cu caah dothlennak sullam le Ralhrang pawl nih caan tawi, caan sau caah an hmuitinh hngalhkhawh i zuam lo in dothlennak kan tuah sual ah cun a tu lio kan dothlennak ah teinak kan hmuh hmanh ah fimthiamnak sang ngeimi Ralhrang tefa hna kut tang ah chan khatkhat ah cun kan lut tthan dih te ko lai. Fimkhur a herh dothlennak tak i fian a herh. Upatnak he, Salai Dokhar, April 2, 2022