Australia Laimi Nih Ralrin A Herh Ngai Mi Domestic and family Violence cu zeidah dah a si?
==========
Domestic and Family Violence cu mi pakhat nih midang pakhat cung ah kutke thlak in fahnak pek, khatlei hnatlak pinak tel loin nu pa sualnak tuah pi le a herh lo ah thinglung ngaihchiat ter.
Tahchunhnak ah a tanglei ka vang langhter mi hna hi Domestic and Family Violence cheukhat hna an si.
1. A um kalnak kip le zapi sin a chuahnak kip ah hnatlakpinak tel loin motor siseh ke in siseh zulh le dawi lengmang. 2. Hnatlak pinak tel loin a riantuannak hmun le a umnnak inn pawng in hngah peng. 3. Hnatlak pinak tel loin cakuat, phone chawnh, social media in um thiam lo in chawnh le cakuat.
4. I chuah pi mi takpum le chungkhar kong soi le thlanglamh lengmang. 5. Hmantlak le video hnatlak pinak tel loin thangchiat duh ah chungkhar, hawikom, social media, community le zapi sin ah tarlangh. 6. Ngandamnak ca hmanmi Sii le Ai din thloh
7. Chungkhar sin caan hman, hawikom sin caan hman, biaknak hmun kal le hawisin chuahlangh sianh lo. 8. Cozah sin in bawmhnak hmuh mi peisa a siloah riantuannak in hmuh mi phaisa hman sianh lo.
9. Chungkhar khuasak tintuknak ca le fa le caah a herhmi thil cawk le peisa hman sianh lo.
10. Chungkhar phaisa a lut mi le hmannak theihter duh lo. 11. Chungkhar thilri le hnipuan hrukaih mi hrawh piak le hlonh piak. 12. Riantuan nak nawl le mah tein peisa hmuhnak nawl sianh lo. 13. Bank phaisa cawi tik le a cozah sin a biapi mi minthut tibantuk inn cawk tik ah nupi/va le min telh duh lo.
14. Pumpak herhmi thil cawk le peisa hmannak nawl pek lo. 15. Lungnuam lo ding in tthihpheih le zalong tein um kho lo ding in hnahnawh lengmang. 16. Nupi/Vale teirul chamnak caah tiin sualnak ngei lo mi fa le vuak, kan thah lai, kan vuak lai tiah tthihpheih.
17. Chungkhar buainak ruang ah mah le mah kai that lai harnak kai pe lai tiah tthihpheih. 18. Nupi/Vale nih biapi ah chiahmi rothil, inn zuat sathil thah piak le hlonh piak. 19. Hnatlak pinak tel loin umkalnak kip ah a thli ten zulh le dawi lengmang.
Tahchunhnak ah – A thli tein a phone zohpiak, a email a facebook le social media a tuahmi a thli tein zohpiak, a um kalnak ah GPS hmang in zulh le dawi, A cunglei ka van langhter mi hna hi zeirel loin kan um sual i kan zulh duh lo a si ahcun kum 3-5 kar thawng ah thlak khawh a si. Ka langhter mi lengah a dang tampi a um rih. Hnu deuh ah pehthan kai zuam te lai.
Australia cozah nih DFV cu biapi tukin a chiahmi a si caah zulh phung an sermi hna hi kan zulh ding le nawl kan buar lo ding a biapi tuk. Note. A tu catial tu hi Sang Bawi a si i Australia ram Brisbane ah Police Officer a tuan lio mi a si.