Atu hrawngte hi cu CNF/A le CDF Le PDF tibantuk hnahnawhnak pek phun rumro in kan i la!

A DONGH TIANG…KAN RAK TI LO MEI?
===========
Kan i funtom ni cu tei kan i thok ni a si. Kan i țhen ni cu zawtlak kan i thok ni a si. Kawlram mizapi chung ah 70% hi cu 2021 February thla in kan i funtom hna, ti ko usi. Chin State chung ah cun 90% kan (rak) i funtom ti ko usi. Kha caan kha tei kan i thok caan a si. Hi vialte kan lung aa rual (i funtom) ahcun zei ral nih dah an kan tei lai! MAH nih a kan tei lai, na ti ko lai maw? Na ti kho lai ka zum lo!

Nain, caan karlak ah, thil tampi ruang le mi cheukhat ruangah, kan lung aa rualnak thazaang hi a zor hniahmah mi a lo. MAH chiah mi rap nih a foih cuahmah mi kan tam ko rua. Mah lungtho te hrimhrim zong in MAH rap chiah a bawmtu kan karh mi a lo. Cu bantuk lungput le dirhmun a ngei mi kan karh chin lengmang ahcun, kan ram hi zei dah a lawh te hnga?

Atulio ah mizapi chung in (Hakha chung hrimhrim zong ah) Pilat bang a kut aa țawl mi kan tam chin, tiah bia a leng. Kan i fahsak men lai nain, bia hmaan a si cuh! Pilat bantuk ngaingai dirhmun a phan lo nain, atu tiang dirhmun fekfuan a ngei kho rih lo mi an tampi, ti a si. Aa phuhrung mi kan um len lai. Bia hmaan a si cu ta! Cu hna lakah mifim, cathiam, mi tampi nih bochan ngaingai mi zong tampi an i tel, ti a si. Aa phuhrung mi kan um len lai. Bia hmaan a si caah a si ko!

Cu pin ah, atu hrawng hi mah pumpak hlawknak ca men ah rian a kawl i a țuan mi an tam tuk, ti a si. Thilti kho le mi-ngei tampi caah caan țha taktak a si, ti si. Aa phuhrung mi kan um hoi lai. A hmaan caah a si cuh! Lam an ti, ti le mei an ti, sang le veeng țhanchonak an ti, khua himnak an ti! Mah rap ah aa foih mi kan tlawm ti rua lo!

Hawi he aa lo lo deuh tete zong kan um ve rih, an ti. Atu hrawngte hi cu PDF le CDF/CNF/A tibantuk hnahnawhnak pek phun rumro in kan i la. Dohthlennak tha kan pek, nain CDF/CNF/A pawl nih harnak an kan pek chin, ti hrawng khin khua kan ruat i sualphawtnak bia kan chim. A cheu cu fiimkaan deuh in kan um i bia kan chim tuk lo (kan lung chung tu in cun kan i khat). Hi bantuk lungput le dirhmun hin maw dohthlennak kan rak thok? Dohthlennak tuah lio ah hin kan pumpak, chungkhar le thilri tampi zong an him lai lo, kanmah nunnak lila zong a him lo kho, ti hi kan rak hngalh lo buin maw kan rak aukhuan sawh cio?

Cu lawng hlah! A phun hi a tam i hmakhat ah chim cawk ding a si lo. A sau tuk lai. Atu thla 10 leng chung kan temhtuar hnu, tlaih le hrem, thah le nawn, khangh le ciamh kan huah lengluang hmuh le tem ko bu zong in mizapi cawlcanghnak tu sual a phaw i Dohthlennak lungput (spirit) dertertu bia chim lawng a țhawng i zei ngaingai a țuan lo mi kan tam ngai, ti a si. An bia cu: ”Ei, kan tei hna lai lo cuh. Kanmah lam kan i sungh. Tei khawh ding phun an si lo…”ti hrawng khi a si, an ti. Kan i phuhrung maw? I phuhrung ko hna usi. A hmaan fom cu ta! Nain, i phuhrung tiang lawng a za lo!

Hi bantuk bia, lungput, ruahnak, zumhnak le tuahsernak nih hin kan ram le kan miphun zei bantuk dirhmun lei ah dah a kalpi khawh? ti hi kan i hal chih a herh! Teinak lei ah a kan hruaitu maw a si? Sunghnak lei ah a kan tlaktertu dah a si? Funtomtu maw a si? Țhencheutu dah? Funtomnak nih zei dah a chuahpi i țhencheunak nih tah zei dah a chuahpi? Cuai hun thlai chun ko hmanh!

Rialdip Uknak (dictatorship) a dirpitu hna poh nih mizapi lakah an rak chiah cio tawnmi rap hi atutan ah MAH zong nih fek ngai in kap tampi in a chiah ve. “Dawtnak, Dinnak le Daihnak Pathian fale kan si” aa ti mi tal nih hin cun MAH rap tehna hi cu i foihter hin sawh hna hlah usi. Kan i funtom ni cu teinak hmuh kan i thok ni a si bantukin kan i țhen ni cu zawtlak kan i thok ni a si ve, ti hi kan lung ah chia cio hna usi. Credit: Petros Petros