Asia Ramkomh Pawl Nih Zulhphung 5 An Ngeihmi cu Min Aung Hlaing Nih A Buar Hoi Cang!
Asia Ramkomh Pawl Nih Zulhphung 5 An Ngeihmi cu Min Aung Hlaing Nih A Buar Hoi Cang!
===========
Asia Ramchung Nih An Ngeihmi Zulhphung (5) Hna Cu SAC Ralhrang Phu Nih An Zulh/Tuah Lo Caah Indonesia President Lung A Rawk! Asia ramchung nih hnatlakmi le lungtlingmi zulhphung (5) hna cu nawlngeihnak latu SAC ralhrang ralkap nih an zulh, an tuah, an tlinh duh lo caah ka lung a rawk bak ko tiah Indonesia President nih a chim tiah theih a si.
Malaysia ramchung Bernama thawngzamhnak ah nizan ah cuticun a chim bak ko tiah RFA nih a langhter. Kan hnu naiah Cambodia Prime Minister Hun San i Kawlram chung a luhnak ah Asia ramchung nih ngeihmi zulhphung (5) hna cu kan zulh, kan tuah, kan tlinhter lai tiah biakamnak an tuah lomi kongah ka lung a rawk kho tuk tiah Indonesia President nih a chim.
Kawlram chung khualtlawnnak i a theipar hna he pehtlai in January 21 ah khan Hun San nih Indonesia President sinah phone in a chawnh nakah Asia ramchung nih a ngeihmi zulhphung (5) hna le SAC ralhrang nih an tuah dingmi thil (5) hna hi aa pehtlai lomi an si tiah Indonesia President nih a chim than tiah theih a si.
Yangon hrambunh ramkhel lei thawngzamhnak pakhat nih Asia ramchung nih a ngeihmi zulhphung (5) le Min Aung Hlaing hruaimi phu nih an chimmi thil (5) hna hi zeiti hmanhin pehtlaihnak an ngeih lo timi hi Hun San nih a theih ko buin cu thil pahnih hna cu pehtlaihter dingin heh le hnikin aa zuammi hi Hun San fellonak a si tiah a chim.
Asia ramchung aiawh in Kawlram kongah special palai an ngeihmi cu Kawlram chung mizei phu he hmanh pehtlaihnak ngeihter dingin SAC ralhrang ralkap sinah Indonesia President nih a forh tiah theih a si.
Tuluk Nih Thaiwan Ramri Pawngah Raltuknak Vanlawng (40) Tluk A Zuan Ter! Tuluk cozah nih Thaiwan kyun pawngah January 23 zaan caan ah raltuknak vanlawng (39) bak a zuan ter hna caah tukum thar chungah a tam bik a si lai tiah theih a si.
J-16 raltuknak vanlawng (24) le J-10 raltuknak vanlawng (10) pinah bawmnak petu vanlawng le electronic vanlawng hna zong an i tel tiah Thaiwan runvennak ministry lei nih an chim. Thaiwan vanlei boruak ralkap hna zong nih a raltuknak vanlawng hna cu direct in a thlah colh ve i, vanlei boruak runvennak hmangin Tuluk vanlawng hna cu ngiathlainak a tuah tiah Thaiwan runvennak ministry zung nih an chim.
A liamcia kum thawk khan Thaiwan kyun pawngah Tuluk vanlawng hna cu nifatin ti awkin an zuan ter hna. A liamcia Oct thla zongah khan nikhat chung lawngah Tuluk raltuknak vanlawng (56) bak an rak luh tikah a fak bikmi le a lianngan taktakmi thihphaihnak a si tiah Thaiwan leikap nih an chim.
Tuluk ram nih kum 2021 hnulei in cun Thaiwan ramri pawngah raltuk ningcang cawnnak tibantuk a tuah lengmang caah vawleipi zong nih an zoh/an ngiathlai ve. Tuluk ram nih Thaiwan ram cu anmah ramchung pakhat ah a chiah nain Thaiwan rammi hna nih cun vawleipi theih in zalonnak a thanh ah siseh a thanh lo zongah siseh Thaiwan cu amah tein a ummi ram pakhat a si tiah ruahnak an ngei ve. Credit: The Federal Times