SAC Ralkap Nih Myingyan Khua An Khangh I Innkang Lak Ah Tarnu Pakhat Nunnak A Liam!
===========
Mandalay ramṭhen, Myingyan peng Mangyisu khua cu SAC ralkap nih mei in an khangh i inn 100 hrawng a ciamh pinah tarnu pakhat zong mei nih a kangh chih ruangah a nunnak a liam, tiah theih a si. May 24 zinglei suimilam 1:00 tluk ah SAC ralkap le pyusawhti 50 hrawng cu Skat motor 3 in khua chung ah an lut i, khuami hna thilri pawl cu motor chung i an khin hnu ah inn cu an khangh hna, tiah Myingyan peng ummi pakhat nih a chim.
Myangyan peng ummi pakhat nih cun, “SAC ralkap le pyusawhti nih meithal an thlah len caah khuami cu an zaam dih. Tarnu pakhat hi inn kang lak ah a tlau i hawitluk lo pa pakhat cu kan chanhchuah khawh nain atu tiang a holh kho rih lo, thaw chuah zong aa harh ngai,” tiah a chim. SAC ralkap le pyusawhti pawl cu zinglei suimilam 2:00 tluk ah Mankyisu khua he meng 3 tluk aa hlatnak Kyaukkan le Laythit khua lei ah an kir, tiah theih a si.
“Khuami hna cu pawngkam phungki sianginn le an chungkhar umnak khua ah an zaam hna. Inn kangmi phalh ding in timhtuah a si ko nain SAC ralkap le pyusawhti nih ti khonnak tikuang cu meithal in an kah caah ti a zut dih i, mei phalhnak ding ti a um ti lo,” tiah Myingyan peng a ummi pakhat nih cun a chim.,Inn 270 a umnak Mangyisu khua cu SAC ralkap nih voihnih an khanghnak a si i, a luancia thla 5 lio ah khan SAC ralkap le pyusawhti nih inn 5 an rak khangh cang, tiah theih a si.
US Le Papua New Guinea Nih Runvennak Lei Ah Rianṭuanṭi Ding In Hnatlaknak An Ngei; US cozah nih South Pacific ram 15 aiawh hruaitu hna tonnak a ngeih hlan ah South Pacific ram chungtel a si mi Papua New Guinea defence minister cu tonnak a ngeih i, runvennak lei ah rianṭuanṭi ding in hnatlaknak a ngeihpi. Hi hnatlaknak catlap ah hin US Secretary of State Antony Blinken le Papua New Guinea defence minister hna nih min an thut.
Ram pahnih hna nih hnatlaknak an ngeih ning ah cun US nih Papua New Guinea ramchung i vanlawng tual hna le lawng ngan dinhnak vialte cu a hman khawh lai i Papua New Guinea cu US nih bawmhnak tampi a pek ve lai. Nichuahlei ram lak i a ṭhawng ngai mi China nih ram a kauh chim chin lengmang lio ah South Pacific ram a simi he hi bantuk hnatlaknak an ngeih khawh mi hi US ca ah cun a biapi ngai mi a si.
Wawbate Khua Pawng Ni Hnih Chung Kahdohnak Ah SAC Ralkap 30 An Thi; Mon ramkulh, Ye peng Wawbate khua pawng ah rallam a sialmi SAC ralkap pawl cu ni hnih chung kan kah hna i SAC ralkap 30 an thi, tiah Albino Tiger Company – 1 nih an langhter.
May 19 zanlei suimilam 3:30 hrawng in Ye peng Wawbate khua pawng ah rallam a sialmi SAC ralkap 250 leng cu Kyiaphyu Column 2 le PDF ṭangṭi phu hna nih hmaitonh in suimilam 1 chung an kah hna i SAC ralkap 19 an thi.
May 20 zing suimilam 8:00 tluk ah SAC ralkap pawl cu hnu an kir i, Kyiaphyu Column 2 le PDF ṭangṭi phu hna nih an dawi hna i an kah ṭhan hna lio ah bawmtu SAC ralkap an phan. Kaphnih kar kahdohnak a zual ngai i SAC ralkap 11 an thi chap. Ni hnih chung kahdohnak ah SAC ralkap 30 leng an thi i, hliamhma pumi zong an tam. PDF ṭangṭi phu lei in ralkap pakhat hliamhma hme a tuar ve, tiah Khit Thi Media nih a ṭial. Credite; The Chin Post