Chin Ramkulh Chung Thlichia Nih A Hrawhmi Inn 926 Caah SAC Ralhrang Nih Bawmhnak A Pek
=========
Chin ramkulh chung ah Mokha thlichia nih a hrawhmi mipi inn, Building 926 caah SAC ralhrang nih canphio, thirkhenh hna cu Hakha khuapi um Department of State General Administration Hall ah nihin July 7, zing suimilam 10 ah bawmhnak a pek, tiah theih a si.
Bawmhnak peknak hmun ah SAC ralhang runvennak lei vuanci (Ministry of Defense) in pahnihnak ralbawi Min Nine, SAC ralhrang kuttang ṭuan Chin ramkulh vuanci Dr. Vung Suan Thang, Minister of Heritage Kyaw Nyein le Minister of Ethnic Affairs Sein Hla Tun hna zong an i tel, tiah theih chih a si.
Cu pinah SAC ralhang runvennak lei vuanci (Ministry of Defense) in pahnihnak ralbawi Min Nine nih thilchia nih a hrawhpiakmi hna caah tiin tangka Nuai 327.824 zong Chin ramkulh vuanci Dr. Vung Suan Thang sin ah a pek, tiah theih a si.
Cu hnu ah Chin ramkulh peng 6 chung ah thlichia nih a hrawhmi mipi hna caah bawmhnak an pekmi tangka hna cu Chin ramkulh vuanci Dr. Vung Suan Thang nih Hakha peng caah tangka in Nuai 29.830, Falam peng caah Nuai 22.675, Tedim peng caah Nuai 6.160, Matupi peng caah Nuai 224.645, Paletwa peng caah Nuai 64.739, Mindat peng caah Nuai 24.775 tiin a ṭhenphawt hna, tiah theih a si.
Chin ramkulh chung ah Mokha thlichia nih a hrawhnak hmun peng 6 chung ah lungtho tein a bawmchan tu hna caah peng pakhat ah tangka sing 5 cio tingco cio dingin sing 30 zong an bawmh chih hna, tiah theih chih a si.
Waibulah peng hi Falam pengkulh chung mi peng a si. Kalaymyo in meng 16, Natchuangkhua in meng 12, Falam khua in meng 42 a hlatnak peng pakhat a si. Myanmar Administration zung nih 2019 kum ah khuakonh(ohsuh) sinak in peng sinak an pek. Chinram Chief Minister Salai Lian Luai nih 4-4-2019 ah peng awnnak a tuah. Khuakonh(ohsuh) lio ah Waibulah,
Mual Zawl, Kawp Phang, Kim Rawng, Nem Zawl, Kim Mon Chaung khua hna an um. Waibulah peng Suangdawn area chung um Pengchung ah khua 16 an um. Pengchung ah veng (4) an um; Inn(117), Milu pa(316) le Nu (321) an dihlak milu(637) an um. Waibulah khua cu rili a sang (3460 pe) ah tlak mi khua a si. An pawcawmnak, Tlanglo le Dum,
(A) Theitlai/ Tisik Anhnah Cin Mi, Facang, Hmathak, Fangvoi, Lingmaw, Tanphaya (သံပရာ), Misur, Fuu, Annthor, Maienn, Anntam, Kawpi, Khachuan, Baa, Piat, Bahrum, Sawmpi, Aithing, Zawngtah, Pawrpok (ခရမ်းချဉ်သီး), Bawnbok, Peeti, Rungtuban, Khachuan.
(B) Theitlai/ Tisik Anhnah Cin Mi, Anntam, Kawpi, Khachuan, Annthor, Piat, Misur le Tanphaya (သံပရာ), Lingmaw, ခရမ်းချဉ်သီး, Rungtaban, (C) Khuachung Khua Leng Zuatmi Satil Min Hna, Vok, Ar, Caw, Naa, Sia, Rang, Meheh., (D) A Biapi In Zuat Mi Satil Hna, Vok le Ar, Caw, Naa, Sia le Meheh zong a biapi deuh in zuatmi an si ve.
Waibulah peng ah Ralhrang an rak kai ning, SAC ralhrang hi Sagaing ram, Kalaymyo in Chinram luhnak Waibulah peng cu voi tampi rak luh hnawh in harnak an pek cang hna. 2021 kum june 30 ni chun hnu ah Ralhrang 70 cu peng chung lut in meithal voi 30 hlei puah in mipi lau le thinphang in an um. 2021 kum October 4 zaanlei ah Ralhrang cu Ral-On khua tiang an rak lut than.
2022 kum January 7 chun hnu ah Ralhrang 220 cu khua chung ah lut in meithal voi 30 thlah hnawh in mipi thinphang in an tuah than hna. Waibulah Pawng Kahdohnak-Waibulah khua cu Sagaing ram le Chinram pehtlaihnak neihniam khua a si caah Ralhrang rual cu Natchawng, Chawngkhuah, Hakhalay khua in Chinram ah an rak kai ton. Khuachung le khua pawngkam ah Mipi ralkap he kahdohnak a um lengmang.
2021 kum March (29-31) tiang Kalaymyo peng Sithar khua, Natchaung khua le Ngapha khua kahdohnak ah Waibulah khua mi pakhat nih ram caah a nunnak a pek. 2021 kum April 1 Natchawng khua ah kahdohnak a um. 2021 kum June (29-31) tiang Locom khua pawng le Waibulah khuachung kahdohnak ah SAC le Chin National Defence Force-CNDF kar kahdohnak fak taktak a um.
2021 kum July 1 ah SAC le CNDF/Tanrual mipi ralkap karlak kahdohnak cu khuachung ah a um. 2021 kum October 4 Waibulah khuachung ah kahdohnak a um than. 2022 kum January 6 in Ralhrang 100 cu Waibulah khuachung ah hriamngan in an hun kah in lut an timh hnu ah Mipi ralkap he kahdohnak a um. Kahdohnak Ruang ah Khuachung Mipi A Thi mi-SAC ralhrang an sualning cu kahdohnak a tong mi khuachung mipi nih hmuh ton peng a si. Mipi a thimi 2 le hliam a tong mi 4 tiang an phan.
2021 kum March 29 Sithar khua le Natchaung khua kahdohnak ah Pu Kum Tei fapa Salai Macsimin nih ram caah a nunnak a pek. 2021 kum June 28 Locom khua pawng kahdohnak ah Pu Saw Lian Thang le Pi Cuai Nuan fapa salai Naing Aung nih ram caah a nunnak a pek. SAC Nih Waibulah Khuachung Mipi An Tlaihmi-2022 kum January 6 ni ah SAC nih hriamngan he khua pawngkam an hun kah. January 9 chun 12:00 ah Khuachung mipi 5 cu ralhrang nih tlaih in an kal pi.
(Salai Tuan Ceu), (U Lan Cung), (Salai Steven), (U Nuam Luai), (Salai Thian Do Sang), (U Khen Zam) hna cu a hnu ah an thlah than hna. Waibulah Khua SAC Nih A Hrawkmi-SAC ralhrang nih Waibulah khuachung mipi inn tampi a hrawh. Khuachung ngeihmi zung inn 3 an hrawh. Mipi inn thlalangawng,
Bizu, Belkheng tampi an hrawh hlei ah thilri mansung tampi an fir. 125/135 Motor cycle (10) mei an kangh hlei ah motor cycle 20 an hrawh piak hna. Mahhlei ah Vok, Ar, Maheh innzuak saṭil 200 hlei an thah, an ei. Inn chung hman mi meiseh 3 mei an khangh. Waibulah Peng Ralzaam Le Harnak-Waibulah peng pawngkam le khuachung kahdohnak ruangah mipi tampi harnak le ralzaam dirhmun an phan.
Zawngsawm, Teret, Naukhin, Lungtat, Domual, Singai, Mualzawl, Aizawl le hmun tampi ah ralzaam dirhmun in an um.
Sagaing ramthen Kalaymyo peng Natchaung, Chawngkhuah, Hakhalay, Yezu, Tanphu, Sithar khua um mipi 4000 hlei ralzaam in an um.
Ralruang Ah Harsaknak Dang Tonmi-SAC ralhrang ruang ah mipi hman mi phone line, internet line an phih lengmang ruang ah mipi eidin le zatlang nun an harsa ngai. Sianginn an khar. Biaknak lei pehtlaimi puai le pumhnak an tuah kho ti lo hlei ah Covid ral nih a tlak hna. SAC ralhrang an kai caan paoh ah mipi um kalnak lam an khar lengmang tiah theih a si.
2023 July 7 hnu bik thawng theih mi ah SAC ralhrang cu Waibulah lam in kai an timh caah Mipi ralkap nih Waibulah lam pi cu an khar chung tiah khuami sin in thawng theih a si.