A Turu Lawlaw; CNO/CNDF nih Ni 5 chung kahdohnak cathanh an chuah!!

Tibual Kahdohnak CNO/CNDF Nih Cathanh A Chuah!!
==========
Cu cathanh chungah an langhter mi cu , ” kum 2022, Sikpar ni (15), Zing slm 5:30 ah CNO/CNDF nih Tibual SAC ralhrang sakhan cu hriamnam ngan, Drone, hriamnam hme he kan kahdoh hna ii SAC ralhrang lei nih hriamnam ngan in voi (3) lehrulhnak an kan tuah than ii slm 3:00 chung kap hnih in kahdohnak fak a chuak.

SAC ralhrang cu fak tuk in phomh an si caah zing lei slm 9:00 hrawngah Jet Fighters in voi (3) bomb an kan thlak. Zaan lei suimilam 6:00 ah a voi 4nak Jet Fighters in an kan kahdoh. A voi 2nak bomb an thlak ah an mah lei Sakhan paawng ah a tla ii inn pa 2 a kaang. A nikhatnak kahdohnak ah SAC ralhrang lei in minung pa 8 an thi. Kan mah CNO/CNDF lei in minung pa 2 nih hliam fak lo an tuar. ZFU/PDF-Zoland, CDM-Siyin le CJDC phufonh hna nih an kan bomh.

Sikpar ni 16, Zing lei ah voikhat, Zing lei slm 02:00 hrawngah voikhat kap hnih in kahdohnak fak piin a chuak ii SAC ralhrang lei an fah tuk caah zaan lei slm 2:55 ah MI-35 Helicopter in minutes 20 chung an kan kah. A voi 2nak kahdohnak ah SAC ralhrang minung pa 5 an thi ii hliamtuar tampi an um. Kan mah CNO/CNDF lei in kan him.

Cu pinah Kalay Myo lei zongah CNDF Tatmaha (1), Tatyin (3) le CDF-KKG phufonh nih SAC ralhrang an va kahdoh hna ii SAC ralhrang lei in minung pa 1 a thih pinah minung pa 1 nih hliamfak a tuar, ti zongin cathanh ah an langhter. Cun Sikpar ni 17, Zing lei slm 9:30 le zaan lei sml 2:00 ah hriamnam ngan he kah hnih in kahdohnak a chuak ii zaan lei slm 3:45 ah SAC ralhrang nih MI-35 Helicopter minutes 45 chung kahdohnak an tuah than.

Cu ni zaan lei ah MEDF nih Drone in bomb tampi he an kan bomh. A voi 3nak kahdohnak ah SAC ralhrang lei in minung pa 6 an thi ii hliamtuar tampi an um ii kan mah CNO/CNDF lei in minung pa 1 nih hliamfak lo a tuar. Sikpar ni 18, zing lei ah CNDF nih SAC ralhrang sakhan cu an kahdoh than ii SAC ralhrang lei nih hriamnam ngan hamng in kahdohnak an tuah than tiah theih a si. A voi 4nak kahdohnak ah SAC ralhrang minung pa 4 an thi ii CNO/CNDF in minung pa 1 cu 60 MM nih a khen sual caah hliamfak lo a tuar, tiah theih a si.

Sikpar ni 19 zing lei slm 5:00 thawk in Tibual sakhan cu laak dingah CNDF nih an kahdoh hmasa hna ii SAC ralhrang lei nih Jet Figter pa (2), Helicopter pa (5) he zing lei slm 10:00 in zaan lei slm 1:00 leng tiang CNDF cu an kah hna, tiah theih a si. Cu kahdohnak ahcun CDF-Lautu nih an bomh hna, tiah theih a si.

SAC ralhrang lei nih Tibual sakhan ah ralkap thazaang an chap ii hliamtuar mi le a thi mi pawl cu Kalay Myo Siizung ah an va khuat hna, tiah theih a si. CNDF nih Tibual sakhan pawng um Bualte khuate ah an kah than hna ii, Cu kahdohnak cu Slm 1:00 leng chung a rau ii SAC ralhrang lei in a tlawmbik minung pa 6 an thi. Cu ni Slm 6:30 hrawngah SAC ralhrang nih Bualte khua inn an khangh piak hna, ti zongin cathanh ahcun an langhter.

Cu ni 5 chung kahdohnak ahcun CNO/CNDF nih Drone in voi 300 leng bomb an thlak hnawh hna ii SAC ralhrang lei in minung 30 leng an thih pinah a thi mi chung in ralbawi deuh zong an i tel, Ti zong in cathanh ahcun an langhter.

Falam Christian Minister Fellowship Cathanh, Falam Christian Minister Fellowship Cathanh, East Lairam, Falam khuapi Falam Christian Minister Fellowship nih cun Falam khuachung le Khrihfabu kip sinah a tanglei bantukin nawlnak a tuah.

FCMF EC meeting nih biachahnak a ngeih mi cu kum 2022 Christmas le kum 2023 kumthar Program hman ning kongkau ah a tanglei langtermi bantukin Falam khuachung Khrihfabu kip zate le chungkhar kip nih zulh cio dingin FCMF nih nawlnak an tuah.

Khrihfabu kip nih lenglei ah thawngthei lo dingin Pathian thangthatnak le rawldumnak tuah khawh dingcun hman ding. Biakinn tamhnak ( decoration) cu biakinn chung lawngah tuah ding, biakinn lenglei tamh lo ding. Pumpak inn ngeitu zong nih lenglei inn tamh lo ding, khuachung kip ah tamhnak tuah lo ding. Carolling tuah in vah lo ding. Sweet December lawmhnak zaantim Program le kumthar hngahnak Midnight Service tuah lo ding.

Tayatchaung Peng Ah Vanlawng Khalh Cawnnak Ah An Hmanmi Vanlawng Pakhat A Tla, A Thimi An Umlo, Taningtharyi ramṭhen, Tayatchaung peng ah nihin November 19, zinglei ah SAC ralkap nih vanlawng khalh cawnnak ah an hmanmi vanlawng pakhat a tla, asinain vanlawng khaltu le a hnuzultu bel a thi mi an um lo tiah tualchung mi hna nih an chim.

Nihin, November 19 zinglei suimilam 10:00 ah Htawai pengkomh Tayatchaung peng Kyauizat(ကျွဲဇပ်) khua le Chaungwapin(ချောင်း ၀ ပြင်) khua kar ah vanlawng pakhat leikuang lak ah a tla, a tlami vanlawng cu cawnnak ah hmanmi vanlawng phun a si tiah theih a si.

SAC Ralkap Sakhan Cu KNDF Nih Sniper In An Kahdoh Hna Caah SAC Ralkap 5 An Thi, Karenni ramkulh Hparuso le Demoso peng ah ummi SAC ralkap sakhan hna cu KNDF nih sniper hmang in an kahdoh hna caah SAC ralkap 5 an thi tiah theih a si. Nizaan November 18, chunhnu suimilam 1:00 hrawng ah Hparuso khah-mah-yiah 428 in SAC ralkap hna cu Karenni ralkap KNDF battalion 4 nih sniper hmang in an va kahdoh hna i SAC ralkap 3 an thi tiah KNDF/ battalion 4 nih nihin November 19 ah cathanh an chuah.

Cun November 17, ah Demoso peng ni tlaklei ah ummi Sinmataung SAC ralkap sakhan cu KNDF battalion 7, battalion 1 le battalion 9 phuthum fonh nih an kalhnawh hna i an va kah hna caah kaphnih kar kahdohnak caan tlawmpal a chuak i SAC ralkap minung 2 an thi tiah KNDF battalion 7 nih fehternak an tuah tiah theih a si.

Myanmar Ram Pumpi Huap In Nikhat Chung Ah SAC Ralkap Chungtel Minung 71 An Thi, Myanmar ramchung ram pumpi huap in November 18, nikhat chung ah theih khawhtawk cazin ning in SAC ralkap chungtel minung 71 an thi tiah tualchung hriamtlai phu hna nih cathanh an chuah.

November 18, nikhat chung kahdohnak ah Magway ramṭhen Myaing in SAC ralkap 7 le Pakokku in 20 an thi, Sagaing ramṭhen Myinmu ah 4, Chaung U ah 5, Mandalay ramṭhen Myinchain ah 15, Yangon ramṭhen Khayan ah 1, Karenni ramkulh Demoso ah 3, Shan ramkulh Lashio ah 16 tiin nikhat chung ah SAC ralkap 71 an thi. Sagaing ramṭhen Khin U in tualchung hriamtlai PDF leiin minung 2 an nunnak a liam ve tiah theih a si.

SAC Nih KIA Le AA Telh In Tlangcung Hriamtlai Chungtel Minung 41 Luatnak An Pek Hna, KIA, AA, RCSS/SSA le KNU chungtel simi minung 41 cu thongtla dirhmun in luatnak kan pek hna tiah SAC ralkap nih thawng thanhnak an tuah tiah theih a si.

KIA, AA le KNU phu hna cu SAC ralkap he kan hnu hrawng ah kaphnih kar kahdohnak fak ngaiin a tuahmi tlangcung hriamtlai phu an si.
A luancia thla chung ah KIA nih puai an tuahnak hmunah SAC ralkap nih van lei kahdohnak a tuah caah SAC ralkap cungah lehrulh chamnak kan tuah hrimhrim lai tiah tlangcung hriamtlai phu hna nih fak ngai in ralrin peknak an rak tuah.

RCSS/SSA phu hna cu SAC ralkap he daihnak sernak ding ah biaruahnak a ngei mi phu an si tiah theih a si. SAC ralkap hna nih thongtla luatnak a pekmi hna chung ah KIA chungtel 17, AA in 17, RCSS/SSA in 5 le KNU in 2 tiin an dihlak ah 41 an i tel.