A Turu E!! Min Aung Hlaing, Kyaatsuu in thil khuaruahhar taktak kan ser lai!!

Kyattsuu In Nuclear Le Electric Kan Ser Lai-Min Aung Hlaing
====================
Nawl ngeitu hlun Than Shwe chan lio ah KyaatSuu ( ကြက်ဆူ) cu an cin i Sehrawn oil serchuah khawhnak timhlamhnak ngeih a si bantukin Nuclear le electric kan serchuah lai tiah, SAC ralhrang lutlai Min Aung Hlaing nih a chim. October ni 3 ah UMFCCI le MSME in rian ngeitu hna le Min Aung Hlaing tonnak an ngeih lio ah a tu bantukin Kyaatsuu in Nuclear in Electric serchuah dingin a chim hi a si.

Than Shwe a chan lio ah Kyaatsuu in diesel serchuah in motor ca zongah behchap in mawngh (khal) a si lai tiah a chunmang cu aa manh i, Kawlram pumpi chungah Kyattsuu cu a cinter dih hna nain zei pipi hmanh a chuahpi mi um loin zaanmang man ah aa cang.

Min Aung Hlaing nih hramhram in uknak a laak hnu zongah pawngkam kokek harnak a chuah pi khotu ti mei laknak cu a nun khawh thannak hnga ding caah tiin biatak tein tuanvo an laak than, tiah kan theih. A tu ah hramhram in uknak a latu Min Aung Hlaing nih electric mei hman nak a tetta khawhnak hnga dingah LED mei cu thlen in hman a herh nak kong cu, October ni 3 ah tuah mi UMFCCI le MSME in rian ngeitu hna sinah a chim.

October 3, Nikhat Chungah SAC Ralkap 47 An Thi, 11 Nih Hliamhma An Tuar, October 3, nikhat chung a cangmi kahdohnak ah SAC ralkap chungtel 50 hrawng an thi tiah NUG nih cathanh an chuah. Atu langhter mi SAC ralkap a thimi cazin nak in a lengah a thimi an tamdeuh kho i, nikhat chung ah minung 11 nih hliamhma an tuar tiah an langhter.

NUG nih mah tein i runvennak ding ca thawngthanhnak a tuah kum khat chungah SAC ralkap chungtel 20,150 leng an thi cang i, 7,000 leng nih hliamhma an tuar tiah an thanhmi ah cun an langhter. PDF le tualchung hriamtlai phu lei in minung 1,500 renglo hrawng an nunnak a liam tiah NUG caan karlak president Duwa Lashi La nih a chim.

SAC Ralkap Nih Monyway Kyaymon (မုံရွေးကြေးမုံရွာ) Khua An Khangh Pinah Tualchungmi 80 Hrawng An Tlaih Hna, Sagaing ramṭhen, Monywa peng, Monyway Kyaymon khua cu SAC ralkap nih an luh hnawh i an khangh, cun tualchungmi 80 hrawng zong an tlaih hna tiah theih a si.

Monyway Kyaymon khua cu nihin October ni 4 zing suimilam 9 hrawngah SAC ralkap thazaang 80 an lut i an khangh pinah ngakchia le nu telh in 80 hrawng cu phungki sianginn pakhat ah an tlaih hna, cun khuachung ah an i chawk i lamkam inn hna a um mi hna cu kan in kah hna lai tiin an hro hna tiah theih a si.

Zing suimilam 5 hrawng ah Monywa-Mandalay lampi ah bomb puahhnawh an tong i a thimi tam ngai dawh an si, khuachung ah an rak lut i an hmuhmi paoh an tlaih hna, an chungkhar ning in an tlaihmi le an sang ning in an tlaihmi zong an um. Innchung um mi zong kan in kah hna lai tiin an hro hna hnu ah an tlaih hna tiah tualchungmi pakhat nih a chim. Monyway Kyaymon khua hnu lei ah nihin October ni 4 zing suimilam 5 hrawngah SAC ralkap pawl bomb puahhnawh an ton hnu in atu bantuk in khuachung ah luh in an khangh hi a si tiah theih a si.

Tedim Ah Motorcycle Firtu 2 Tlaih An Tong, Chimhhrinnak An Tuah Hnu Ah An Thlah Than Hna, Chin ramkulh, Tedim ah October 3, zaanlei suimilam 5:00 hrawng ah motorcycle firtu 2 cu Tedim khuami nih an tlaih hna tiah theih a si. Motorcycle firtu 2 hna cu hremnak le tukvelhnak zeihmanh tuahlo in, chimhhrinnak tuah in an cawnpiak hna hnu ah thla an campiak hnu i an thlah ṭhan an si tiah Tedim khuami mino hna nih an chim.

Zaanlei suimilam 2:00 hrawng ah Tedim khuachung Myomah sang um Bethel Biakinn pawnghrawng ah motorcycle firpiak kan tong tiin Tefim mino hruaitu sin ah a chimtu an um caah, Tedim mino hruainak in cu a tlaumi Motorcycle cu an kawl i zaanlei suimilam 5:00 hrawng ah a firtu 2 hna cu tlaih an si tiah theih a si.

“Tutan tlaih a tongmi pahnih hna hi cu ngaihthiam an si, hmailei ah tlaih an ton ṭhan a si ah cun Tedim Myomah sang, Luaibual sang tiin mi an tamnak hmun ah hti ṭem in nihnih chung ni ah kan pho hna lai, hi ti tuah lawng ah hmailei ah mifir an lau lai” tiah Tedim khuami mino hruaitu pakhat nih a chim. A luanciami thla chung hna zong ah Tedim khuachung ah motorcycle hi atu le tu a tlau lengmang tiah tualchung mi nih cun an chim.

SAC Ralkap Bawi Pakhat Nih Dalan Na Si A Ti I Palik Pakhat A Hngawng A Tan, Magway ramṭhen, Pauk peng Zipyia khua pyusawhṭi training kainak sakhan cu PDF nih an luhhnawh hna, cu lio ah SAC ralbawi nih palik pakhat cu dalan na si tiah a ti i a hngawng a hleh hnu ah a phum tiah theih a si.

October 2, chunhnu suimilam ah pyusawhṭi sakhan cu luhhnawh an tong, palik pakhat nih thawngpeknak a tuah an ti caah Pauk le Myaing peng aa tonnak Tayatpinṭaw(သရက်ပင်တော) tiva pawng ah palik pa cu an thah i a ruak cu vawlei ah an phumtak tiah Myaing PDF in ṭianvo ngeitu nih a chim. Sakhan luhhnawhnak cu chunhnu suimilam 1:30 hrawng ah a cang, sinain palik pa thah a ton caan hi zaanlei suimilam 4:00 hrawng ah a si, khah-lah-yiah 258 in ralbawi pakhat nih a thah tiah mit hmutu nih a chim tiah theih a si.

Monywa-Amyint Lampi Cu Mipi Kal Khawh Lo Ding In SAC Nih An Hrawh, Sagaing ramṭhen Monywa khua Nyaungpinzauk sang thlanglei Monywa-Amyint lampi cu nihin October ni 4 chun suimilam 2 hrawngah SAC ralkap nih vawlei cawhnakseh in an hrawh tiah tualchungmi hna sin in theih a si.

SAC ralkap pawl cu ralkap mawtaw a nganmi pakhat le private mawtaw pakhat in thazaang 30 hrawng an ra i vawlei cawhnakseh in an hrawh tiah tualchungmi pakhat nih a chim. Monywa-Amyint lampi cu Monywa le Chaung U peng pehtlaihnak ah a bik in hman mi a si. A tubantuk in an hrawh caah mawtaw zong kal ngah ti lo tiah theih a si. Crd-The Chin Post